Predicando den MAPUTO—E Capital Fasinante di Mozambique!

Na 1991, Testigo di Jehova tabata duná reconocimento legal den Mozambique. Desde e tempo ei e predicacion dje bon nobo dje Reino di Dios a haci progreso spectacular den e país tropical na costa di zuidoost di Africa. Lo sigiente ta un relato dje manera cu Testigo di Jehova ta efectuá nan trabao di educacion bíblico den Mozambique, specialmente rond di Maputo, e capital.

MOZAMBIQUE ta disfruta di un clima agradabel debí ne influencia dje temperatura di Lamá Indio. Tin un abundancia di playa bonita cu mata di coco na nan rand i també rif di coral. Un boca grandi cu awa protehá ta situá pazuid dje país—un sitio ideal pa su capital, Maputo.

Sin embargo, e boniteza i trankilidad dje país ta na contraste cu e violencia di su historia. Pa siglonan el a lucha bao di dominacion di hende stranhero, promé tabata arabir, anto despues e portugués. Portu­gués a bini cu e plena bendicion dje Iglesia Católico pa plunder tesoro dje tera—ivoor, oro, i esclabo. Finalmente, despues di siglonan di opresion colonial, un lucha interno amarga a cuminza cu a resulta den independencia na 1975. Lamentablemente, e cambio no a haci bida mas sigur, pasobra e país a enbolbele den un gera civil cu a resulta den hopi sufrimento pe pueblo, specialmente pueblo inocente di campo.

Maputo, e Capital

Durante e último 10 aña, miles di mozambiqueño a hui ne siguridad relativo di pueblo i stad. Esei ta specialmente notable den ­Maputo, unda un mezcla di arquitectura portugués original i paisahe africano colorido ta contribui un ambiente vibrante ne stad. Si bo ta dal un keiru awe riba avenida hanchu di Maputo cu tin palu halto na tur dos banda, e promé cos cu bo ta nota ta e cantidad di hende purá pa atende na nan asunto diario. Pero, tin un diferencia. Segun Rodrigo, un misionero den Maputo, “Apesar di mucho hende riba otro i e dificultad di bida diario, hende semper ta cla cu un sonrisa. Ta casi imposibel pa contra cu hende rudo!” Sí, mozambiqueño tin e fama di ser un pueblo espontáneo i amigable.

Naturalmente, mescos cu den e mayor parti di Africa, e lugar natural pa contra cu hende ta na plaza local. Pa yega ei bo por haya cabe’i boto riba un Chapa 100, e nomber local pe cantidad di pickup cu ta ser usá pa transporte público. Manera costumber, ta parce cu mas hende ta colgá na banda dje pickup cu tin padén. Kizás ta mihor pa bai na pia.

Mozambiqueño ta negociante incurable. Bishitante na Maputo mester ripara cuanto hende tin nan mes negoshi riba mesa chikito cant’i caya i na skina di caya. Bo kier cumpra fruta frescu, berdura, yerba, of specerij? Tin mas cu suficiente pa tur hende. Bo kier cumpra galiña bibo, cashipete, of caña pa traha cas? Nada ta mucho molester, i tur cos ta ser hací cu un spiritu amigable. També tin e servicio di polish zapato of laba auto. Cu un bara di heru cayente i un pida di plástic, mucha homber asta por fura documento balioso cu bo tin.

Realmente, tur negoshi riba caya no ta estrictamente legal. Pero, nan ta hacié toch. Hende cu ta bende ilegalmente ta ser yamá dumba nenge, cu kier men “confia bo pia.” Sin duda nan ta yamá esei pasobra ora autoridad ta bini pa inspeccioná, carreda lihé ta necesario pa scapa nan negoshi precario.

Segun e holor, nos a yega cerca e mercado di piscá. Den atardi di tur dia, cant’i oriya di Costa do Sol, tin hopi actividad rond di boto di piscador ora nan ta yega cargá cu piscá. Además di piscá di tur forma i tamaño, tin cangreo, krif, i, naturalmente, e famoso cabarón di Mozambique. Pero, por tá cu bo ta interesá den un otro sorto di piscamento cu ta ser hací den Maputo i su becindario.

“Piscador di Hende”

Desde cu Testigo di Jehova a obtene reconocimento legal den Mozambique, nan tin bon acogida den pueblo. Un homber a expresa su aprecio, bisando: “Mi a mira hopi di boso riba caya den Londres. Realmente, unda cu mi ta bai mi ta mira Testigo di Jehova. Awor mi ta alegrá di mira boso aki també.”

Si aceptacion di Bijbel i literatura bíblica na portugués i tsonga, e idioma local, ta un indicacion, anto e pueblo ei realmente tin un inclinacion spiritual. Paula, un otro misionero, a bisa cu normalmente riba diasabra maínta, ta mashá posibel pa laga hopi mas cu 50 revista ne bazar of plaza central. E buki Loke hovenan sa puntra—contesta práctica ta mashá popular. Gera a haci hopi hoven perde nan cas i mayornan, i ta parce cu nan ta aprecia e conseho i direccion cu e buki ta duna.

Di manera típico i na moda di rienda liber africano, grupo grandi di hende interesá ta reuni rond di un misionero pa tende loke ta ser bisá. Tal reunion na caya hopi bez ta bira conbersacion bíblico bibo. Un hermana ta corda un experencia excitante.

“Na un ocasion ora mi tabata duna testimonio na caya, mi a sustiá ora un jeep militar a para cerca mi haciendo tire canta. Un soldad hoven a grita na algun mirones: ‘Hey, abo, bisa e señora bini aki.’ Ora mi a bai cerca dje, e soldad a dalmi un sonrisa grandi i a bisa: ‘Boso ta bon hende. Nos ta keda contentu pa mira boso aki. Mi ta kere cu señora tin un buki pa hovenan. Mi kier uno també.’ Mi a bisé cu no a kedámi ningun, pero mi a duné e siguranza di cu asina cu nos recibi mas, lo mi entrega uno na su cas.”

Depósito di Literatura

Pa satisface e necesidad aumentante di literatura, e oficina di sucursal dje Sociedad Watch Tower den Zuidáfrica ta manda literatura na un depósito di literatura den Maputo cada dos siman. Un misionero yamá Manuel ta atende ne depósito, i ta responsabel pa organiza distribucion di literatura.

Un maínta un homber di edad mediano a drenta i a puntra pa ki motibo nan a usa e depósito. Manuel a contestá cu e tabata un depósito pa literatura bíblica. E homber a sali, pero a bolbe un bez.

El a puntra: “Bo a bisa cu esakinan ta buki bíblico, berdad?”

Manuel a contestá: “Sí, correcto.”

E homber a puntra: “Pa cua organizacion?”

Manuel a contestá: “Testigo di Jehova.” I a sigi, “E literatura aki ta abastece nos congregacionan local.”

“Ai, Testigo di Jehova!” E cara dje homber a briya. “Tin tanto cos cu mi ta gusta tocante boso. Pero, ne mesun tempo, tin algo cu mi no ta gusta.”

Manuel a puntra cu tacto: “Wel, kico bo ta gusta tocante nos?”

E homber a splica: “Mi ta gusta buki interesante i educativo cu boso ta produci. Loke mi no ta gusta ta cu mi nunca por obtene suficiente. Bo no por imaginábo cuanto hamber nos tin den Maputo pa literatura manera esaki.” Anto el a saca un lista skirbí di publicacion dje Sociedad Watch Tower, incluyendo hopi número bieu dje revista Toren di Vigilancia i Despertad!, cu e no a recibi.

El a bisa Manuel: “Mi ta hiba e lista aki cu mi na tur parti. Ki ora cu mi ta contra cu Testigo di Jehova, mi ta purba di obtene cua publicacion cu nan tin. Si bo por yudámi obtene loke mi tin riba mi lista, mi ta dispuesto di pagábo e prijs di oro.”

E conbersacion a sigi. Manuel a haya sa cu e homber a haci contacto cu Testigo di Jehova pe promé bez despues di 1950 ora el a leza e buki Creacion. Pero, siendo cu e trabao di Testigo di Jehova tabata prohibí durante e gobernacion portugués, el a progresá un poco so.

Ora Manuel a bishita e homber despues den su oficina, Manuel a ripara cu tur publicacion dje Sociedad Watch Tower tabata lorá den plástic i wardá nechi. Manuel por a percura publicacion cu e homber a falta pa completa su coleccion, i el a haci arreglo pa conduci un estudio bíblico cu e homber i su famía.

Tur e plantamento i muhamento spiritual ta cuminza produci hopi fruta segun cu Dios ta sigi “hacié crece.” Tin indicacion fuerte cu e cosecha di hende di curazón recto lo produci un cosecha abundante den Mozambique!—1 Corintio 3:6; Juan 4:36.

Progreso Teocrático Apesar di Obstáculo

Awe, tin mas cu 50 congregacion den Maputo i becindario di dje. Sin embargo, bo no por haya ningun Salón di Reino di Testigo di Jehova. Pakico? Debí ne mal situacion económico, e congregacionan no por a tráhanan, aunque algun tabatin e terreno pa varios aña.a

Sin embargo, tal obstáculo no ta stroba progreso. Actualmente, nan ta tene hopi mas cu 5.000 estudio bíblico di cas den zuid di Mozambique. E necesidad ta asina grandi pa estudio cu tin cierto requisito. Si hende ta pidi estudio, normalmente nan ta spera pe asisti na tur reunion di congregacion.

Un congregacion situá den un barrio mashá pober, recientemente tabatin 189 asistiendo ne reunion diadomingo aunque tin 71 publicador so dje bon nobo. E grupo grandi ta reuni den aire liber dje curá di un cas. Un muraya di zink i caña ta proteha e curá for di bista público. Promé cu cada reunion, nan ta bari e curá limpi, i un parti grandi dje auditorio, incluyendo hopi adulto, ta sinta abao riba mat di caña. Ki atencion nan ta presta ne programa! Siendo cu hopi hende nobo no tin ehemplar di Toren di Vigilancia pa nan sigi e lezamento, nan ta siña presta bon atencion na lezamento di paragraf, i casi tur man ta bai laira pa contesta pregunta cu e conductor ta haci.

Un otro congregacion di 59 publicador tin un asistencia regular di mas cu 140. Normalmente nan ta reuni den aire liber riba un piso. Pero den tempo di awa, e congregacion ta sinta pretá den dos cuarto di un apartamento chikito. Lo demás ta sinta den gang, cushina, i riba balcón. Di nobo, bo mester ripara e aprecio i atencion cu tur hende ta presta ne programa, incluyendo hopi hoven.

Na ningun parti e potencial pa crecimento den futuro den Mozambique ta keda mas bisto cu na asamblea. Recientemente nos a celebra un asamblea di circuito den un plaza bieu di toro den e centro dje stad. Bo por imaginábo e sorpresa di parti di aproximadamente 3.000 publicador ora mas cu 10.000 hende a asisti na sesion?

“E Cosecha ta Grandi”

Experencia asina ta indica claramente cu tin hopi mas trabao ainda pa haci den Mozambique. Algun congregacion a caba di recibi e promé bishita dje superintendente biahero cu e oficina di sucursal a manda. Nan ta recibi yudanza mashá necesario pa yúdanan implementá procedimento correcto dje organizacion den e congregacion.

Congregacion també ta apreciá mashá e reciente yegada di misionero di Galad. Francisco, un anciano den Maputo, a bisa: “Esei ta un paso grandi padilanti pa nos. Nos tabatin e celo. Nos tabatin e amor. Pero, nos no a conoce hopi asunto dje organizacion. Loke nos realmente mesté ta un ruman cu experencia personal pa síñanos con cosnan mester ta hací. Awor, nos ta síntinos mashá contentu cu nos tin misionero cerca nos.”

Misionero, di nan parti, ta keda contentu pa rindi sirbishi ne rumanan. Hans, cu tabata asigná na Mozambique recientemente despues di a sirbi pa 20 aña den Brasil, a splica lo sigiente: “Ta un gran privilegio pa traha den e territorio di Mozambique! Nos ta anticipa cu nos ta cerca di alcanza un aumento tremendo aki. Tin tanto trabao pa haci. Nos por usa 10 of 20 misionero mas aki den Maputo so.”

E velocidad di progreso teocrático cu ta aumenta awor den Mozambique ta hácinos corda e palabra urgente di Jesús: “E cosecha ta grandi, pero trahador ta poco. P’sei, pidi e Doño dje cosecha manda mas trahador den su cosecha.” (Mateo 9:37, 38) Tin tur motibo pa kere cu Jehova lo contestá e peticion urgente na fabor di sirbidor di dje den Mozambique.

Miles di Testigo di Jehova a pasa 12 aña of mas den campo di detencion den nortwest di Mozambique. Ora algun di nan a bolbe recientemente na Maputo, tur cos material cu nan tabatin tabata un pida di paña pa lora rond di nan custía. Loke nan tabatin tabata un abundancia di fe! Contribucion generoso di cuminda i paña di otro Testigo di Jehova den país beciña a yúdanan cuminza un bida nobo.

[Nota]

[Plachi na página 23]

E congregacionan ta disfruta di un bon asistencia pa duna testimonio cristian público diasabra maínta

[Plachi na página 24]

Conoce Haimito di cinco aña di edad. El a nace den campo di detencion. Awe, e mayornan di Haimito ta keda contentu pa ser den Maputo di nobo. Tur siman, Francisco, e tata di Haimito, ta reuni tur e famía hunto pa un estudio bíblico. E dos mayornan ta dedica hopi tempo pa entrená nan yiunan pa ser maestro efectivo den e sirbishi di feld. Haimito ta gusta parti literatura ne plaza central

[Plachi na página 25]

E echo cu congregacion no tin Salón di Reino no ta stroba nan progreso. Den casi tur caso, mas cu dobel e cantidad di publicador ta asisti na reunion