Diverticion den Grupo—Disfruta di su Beneficio, Evita trampa

“No tin nada mihor cu esaki: cu [hende] ta come i realmente ta bebe i ta haci su alma mira loke ta bon pa causa di su trabao duro.”—ECLESIASTÉS 2:24.

1. Di ki manera e guía di Dios ta yuda su pueblo den e asunto di diverticion?

E GUÍA di Jehova Dios ta abunda den bentaha pa sirbidor di dje. Nos por mira esei den e categoría di diverticion. Su direccion ta yuda hende cristian evita di bai te na extremo. Algun religion cu ta insisti pa bistí i conducta ser severo, ta considera cu casi tur placer ta pecaminoso. En cambio, casi tur hende ta busca placer aunque esei ta na conflicto cu ley i principio di Jehova.—Romano 1:24-27; 13:13, 14; Efesio 4:17-19.

2. Con Dios a mira diverticion desde e principio?

² Pero, kico dje pueblo di Dios? Hopi hende cu ta cuminza studia e Bijbel ta haya sorpresa ora nan ta siña cu Dios realmente a crea hende cu e capacidad di disfruta di bida. Dios a duna nos promé mayornan trabao pa haci—pero esei no tabata e trabao pisá i fastioso cu a marca e bida di casi tur hende imperfecto. (Génesis 1:28-30) Imaginábo e cantidad di manera saludable cu tur hende cu ta biba den un paradijs terrenal por disfruta di bida. Corda nan gozo mirando bestia salbahe cu no ta presentá ningun peliger i un variedad di animal doméstico cu por ta un parti di bida diario! I ki cuminda nan por obtene for di “tur palu deseabel pe bista di hende i bon como cuminda”!—Génesis 2:9; Eclesiastés 2:24.

3-5. (a) Ki propósito diverticion tini? (b) Pakico nos por keda sigur cu Dios no a desanimá israelita di divertínan?

³ Realmente, tal actividad por ta considerá como diverticion, locual den Paradijs lo tin e mesun propósito cu awor: es decir, refresca i renoba bo vitalidad pa mas actividad productivo (trabao). Ora diverticion ta logra esei, e ta beneficioso. Esei kier men cu adorador berdadero por haci un lugar den nan bida pa diverticion aunque nan no ta biba den Paradijs ainda? Sí. E buki Perspicacia para comprender las Escrituras ta bisa lo sigiente tocante diverticion den e pueblo di Jehova di antigua:

⁴ “E registro bíblico no ta bisa hopi tocante wega i diverticion di israelita. Sin embargo, e ta mustra cu diverticion no ta solamente propio, sino ta asta deseabel, ora esei tabata na armonía cu principio religioso dje nacion. E recreo principal tabata tocamento di instrumento musical, cantamento, baliamento, conbersacion, i també algun wega. Participacion den rompecabeza i pregunta difícil tabata mashá popular.—Huez 14:12.”—Volumen 1, bladji 709.

⁵ Hende muher hebreo a toca fluit i tamborina pa celebra (hebreo, sa·chaqʹ) e regreso victorioso di David. (1 Samuel 18:6, 7) E palabra hebreo ta nifica básicamente “hari,” i algun traduccion ta menciona “hende muher gozando.” (Version Moderna; The New English Bible) Ora nan a cambia e lugar dje arca, “David i tur e cas di Israel tabata celebra dilanti Jehova cu tur sorto di instrumento.” Mical, esposa di David, no tabatin un punto di bista balanzá, pasobra el a keha e papel di David den e diverticion. (2 Samuel 6:5, 14-20) Dios a profetiza cu preso bolbiendo for di Babilonia lo participa den actividad gozoso similar.—Jeremías 30:18, 19; 31:4; compara cu Salmo 126:2.

6. Con e Scritura Griego Cristian ta yúdanos considera diverticion?

⁶ Nos també mester purba di keda balanzá tocante diverticion. Por ehempel, nos ta comprende cu Jesús no tabata hende secu? El a aparta tempo pa cuminda refrescante, tal como e “banquete grandi di recepcion” cu Leví a ofrece. I ora algun fariseo sobrehusto a critiqué pasobra el a come i a bebe, Jesús a rechaza nan punto di bista i moda di actua. (Lucas 5:29-31; 7:33-36) Corda, també, cu Jesús a asisti na boda i a contribui ne celebracion. (Juan 2:1-10) Hudas, mitá ruman di Jesús, a menciona cu hende cristian tabatin “fiesta di amor,” aparentemente un comimento unda hende den necesidad por a disfruta di cuminda i compañerismo agradabel i trankilu.—Hudas 12.

Diverticion den Grupo na su Tempo i na su Lugar

7. Con e Palabra di Dios ta anima mantenecion di balanza den e asunto di diverticion?

⁷ Eclesiastés 10:19 ta mencioná favorablemente e ‘pan pa haci trahador hari i biña cu ta haci bida alegrá.’ Esei no ta parce como si diverticion ta naturalmente impropio of malu, no ta berdad? No obstante, e mesun buki ta bisa: “Tin un tempo siñalá pa tur cos, . . . un tempo pa yora i un tempo pa hari; un tempo pa lamenta i un tempo pa dal salto.” (Eclesiastés 3:1, 4) Sí, aunque e Bijbel no ta condena diverticion apropiado, e ta dúnanos advertencia. Den esei nos ta haya conseho pa mantene diverticion den grupo den su lugar den loke ta toca tempo i cantidad. E també ta dúnanos advertencia tocante trampa cu ta demasiado frecuente den fiesta grandi.—2 Timoteo 3:4.

8, 9. Pakico e tempo den cua nos ta biba i e asignacion cu Dios a dúnanos mester afecta nos diverticion?

⁸ Nos a ripara cu hudío bolbiendo for di Babilonia—cu tabatin hopi trabao duro pa haci—por a participa den recreo gozoso. No obstante, Jeremías a bisa caba cu lo e no ‘sinta den e grupo íntimo di esnan cu ta hunga triki ni cu ta cuminza hubilá.’ (Jeremías 15:17) Jeremías a recibi e asignacion divino di declara un mensahe dje binidero huicio, pues esei no tabata e tempo siñalá pe diverti.

⁹ Hende cristian djawe ta ser asigná pa proclama e mensahe di speranza di Dios i declara su huicio contra e sistema malbado di Satanás. (Isaías 61:1-3; Echo 17:30, 31) Pues, ta keda bisto cu nos no mag laga diverticion bira e cos importante den nos bida. Nos por ilustra esei cu un tiki salu of specerij special cu ta mehora e sabor di cuminda. Bo ta basha asina hopi specerij cu e ta daña e smak dje cuminda? Claro cu no. Di acuerdo cu e palabra di Jesús den Juan 4:34 i Mateo 6:33, nos interés principal—nos cuminda mes—tin cu ser e hacimento dje boluntad di Dios. Asina, recreo ta bira manera specerij. E mester refrescá i mehorános, i no cansa i gástanos.

10. Pakico nos tur mester reexamina e tempo cu nos ta dedica na diverticion?

¹⁰ Sin embargo, para i considera lo sigiente: E mayor parti di hende no ta bisa cu e tempo i atencion cu nan ta dedica na diverticion ta moderá? Si esei no ta loke nan ta kere, nan lo a haci un cambio caba. Esei no ta indica cu cada un di nos mester para i analiza seria i francamente cua lugar diverticion realmente ta ocupa den nos bida? E no ta cuminza ocupa un lugar importante sin cu nos ripara? Por ehempel, nos ta cende television automáticamente asina cu nos ta yega cas? Nos a establece e costumber di dedica hopi tempo na diverticion tur siman, tal como tur diabierne of diasabra anochi? Nos ta síntinos desilusioná si e dia ei yega i nos ta na cas sin ningun recreo planeá? Dos pregunta mas: E dia despues di un fiesta, nos ta haya cu nos a keda lantá mucho laat of a biahá mucho leu di manera cu nos ta cansá, kizás demasiado cansá pa participa den e ministerio cristian of rindi un bon dia di trabao na nos empleador? Si nos diverticion ta tene tal efecto cada bez of de bez en cuando, e realmente ta recreo apropiado of balanzá?—Compara cu Proverbio 26:17-19.

11. Pakico ta apropiado pa nos repasa e naturaleza di nos diverticion?

¹¹ Por ta bon també pa nos repasa e naturaleza di nos diverticion. E echo cu nos ta sirbidor di Dios no ta un garantía cu nos diverticion ta apropiado. Considera loke apóstol Pedro a skirbi pa cristian ungí: “E tempo cu a pasa caba ta suficiente pa boso cumpli cu e boluntad dje nacionan ora boso a procede den echo di conducta inmoral, mal deseo, demasiado biña, paranda, partida di bebe, i idolatría ilegal.” (1 Pedro 4:3) E no tabata siñala cu su dede, den un sentido, acusando e rumanan di imita loke hende di mundo ta haci. No obstante, ta vital pa hende cristian keda alerta (den pasado i awendia) pasobra ta fácil pa hende bira víctima di diverticion perhudicial.—1 Pedro 1:2; 2:1; 4:7; 2 Pedro 2:13.

Cuidao cu Trampa

12. Cua clase di trampa ta keda destacá den 1 Pedro 4:3?

¹² Nos mester keda alerta en cuanto cua clase di trampa? Wel, Pedro a menciona ­“demasiado biña, paranda, partida di bebe.” Un comentador alemán a splica cu e palabra griego cu el a usa “ta aplica principalmente na bebemento hunto cu otronan den banquete.” Un profesor suiza a skirbi cu esei tabata un costumber dje tempo ei: “E palabra mester referi na fiesta organizá of a inclui club unda nan a practica tal actividad bergonzoso mencioná.”

13. Di ki manera e uso di alcohol ta un trampa na fiesta? (Isaías 5:11, 12)

¹³ Uso di bebida alcohólico den fiesta grandi a coge hopi hende den laz. No ta como si e Bijbel ta prohibi uso moderá di tal bebida, pasobra e no ta hacié. Prueba di esei ta cu Jesús a conbertí awa na biña na fiesta di casamento den Caná. No tabatin hende ei cu a bebe di mas, pasobra Jesús a obedece e conseho di Dios di evita e compañía di hende cu ta bebe di mas. (Proverbio 23:20, 21) Pero, corda e detaye aki: E director dje fiesta a bisa cu na otro fiesta nan a sirbi e bon biña promé ‘anto ora hende tabata burachi, nan a sirbi e biña inferior.’ (Juan 2:10) Pues, hudío tabatin e costumber di bebe burachi na fiesta di casamento unda biña a abunda pa tur.

14. Di ki manera anfitrión cristian por evita trampa cu bebida alcohólico por presenta?

¹⁴ P’sei, algun cristian, doño di fiesta, ta decidi di ofrece biña, cerbez, i otro bebida alcohólico solamente si nan por supervisa personalmente loke invitado ta ser sirbí of ta bebe. Si e fiesta ta mucho grandi pe doño supervisa personalmente, tal como casamento hudío cu nos a caba di mencioná, alcohol na cantidad por ta un laz peligroso. Tal bez tin hende presente cu a lucha i a vence e problema di bebemento. Bo por comprende cu e presencia di alcohol sin ningun supervision por tenta hende asina pa bebe di mas i daña e ocasion pa tur hende. Un superintendente den Alemania, cu ta tata tambe, a bisa cu su famía ta beneficiá di asociacion agradabel den compañía di otro hende creyente. Pero, el a sigi bisa cu e rísico di problema siguramente ta mas grandi ora cu cerbez ta abundante.

15. Con bo por alcanza bon supervision na ­fiesta?

¹⁵ E fiesta den Caná tabatin un “director dje fiesta.” (Juan 2:8) Esei no kier men cu un famía cu ta invita un grupo na nan cas pa come of pasa un rato di compañerismo mester nombra un director. Esposo ta responsabel pa supervisa e ocasion. Pero, sea cu e grupo ta dos famía so of un poco mas grandi, mester keda bisto cu un persona ta responsabel pa loke ta pasa. Hopi mayornan ta controla esei ora nan yiu homber of yiu muher ta ser invitá na fiesta. Nan ta haci contacto cu e doño pa puntra ken ta supervisa henter e ocasion, i si e ta keda te na fin. Mayornan cristian asta ta cambia nan mes orario pa nan ser presente di manera cu tanto hende di mayor edad como hoven por disfruta di compañerismo mutuo.

16. En cuanto e tamaño di fiesta, ta apropiado pa duna consideracion na kico?

¹⁶ E sucursal di Canadá dje Sociedad Watch Tower a skirbi: “Algun anciano a comprende cu conseho riba limitando e tamaño di fiesta di recepcion di casamento kier men cu fiesta grandi ta un violacion dje conseho. Nan a conclui cu si nos ta ser consehá pa tene fiesta chikito so, na un tamaño cu nos por manehá, ta malu pa invita 200 of 300 hende na recepcion di casamento.”a En bez di duna demasiado énfasis na un tamaño na nan gusto, nan mester presta atencion principal na bon supervision, maske cuanto hende tin. E cantidad di biña cu Jesús a traha ta indica cu tabatin basta hende asistiendo ne casamento den Caná, pero ta bisto cu tabatin bon supervision. Otro fiesta den e tempo ayá no tabatin esei; nan tamaño por a ser un factor cu a stroba bon supervision. Mientras mas grandi ta e fiesta, mas grandi ta e dificultad, pasobra ta mas fácil pa hende mas swak, cu ta incliná di bebe di mas, pasa e límite. Na fiesta sin supervision, nan por instiga actividad cuestionabel.—1 Corintio 10:6-8.

17. Con nos por demonstra balanza cristian ora nos ta planeá un fiesta?

¹⁷ Bon supervision di fiesta ta inclui su planificacion i preparacion. Esei no kier men duna e fiesta un nomber pa hacié distinto of memorable pero cu ta imita fiesta mundano, tal como baile grandi unda bistí special ta necesario of fiesta cu disfraz. Bo por imagina israelita fiel den e Tera Primintí preparando un fiesta unda tur hende tabatin cu bisti manera pagano di Egipto of di otro país? Nan a planeá baliamente indecente of música ruidoso cu tabata na moda den e mundo pagano? Ayá na Ceru di Sinaí nan sí a cai den trampa di música i baliamento tal como loke tabata e moda i popular den Egipto. Nos sa con Dios i su sirbidor maduro Moisés a considerá tal diverticion. (Éxodo 32:5, 6, 17-19) P’sei e doño of supervisor di fiesta mester sa si lo tin cantamento of baliamento; i den tal caso, nan tin cu ser sigur cu esei ta di acuerdo cu principio cristian.—2 Corintio 6:3.

18, 19. Kico nos por siña for dje echo cu Jesús tabata invitá na un casamento, i con nos por aplicá esei?

¹⁸ Finalmente, nos ta corda cu ‘Jesús i su disípelnan tabata invitá ne fiesta di casamento.’ (Juan 2:2) Ta cierto cu un hende cristian individual of un famía cristian por simplemente bishita otronan pa pasa un rato agradable of edificante. Pero den e caso di fiesta planeá, experencia ta mustra cu un determinacion di antemano ken pa invitá ta yuda evita problema. Un anciano di ­Tennessee, EUA, cu a cria yiu homber i muher cu ta den e ministerio di tempo completo a enfatizá e importancia di esei. Promé cu e of su esposa a acepta un invitacion, of a duna su yiunan permiso pa bai, el a haci contacto cu e doño dje fiesta pa informa cuanto tabata invitá. Su famía tabata protehá contra trampa den locual algun a cai den fiesta habrí pa tur hende, sea cu tabata un comimento, picnic, of ehercicio, tal como wega di bala.

¹⁹ Jesús a recomenda pa no invita na fiesta solamente pariente, amigo bieu, of hende di bo mes edad of situacion económico. (Lucas 14:12-14; compara cu Job 31:16-19; Echo 20:7-9.) Si bo ta scoge cu cuidao esnan cu bo ta invita, ta mas fácil pa inclui hende cristian di diferente edad i circunstancia. (Romano 12:13; Hebreo 13:2) Algun di nan por ta hende spiritualmente swak of hende nobo cu por beneficiá di asociacion cu hende cristian maduro.—Proverbio 27:17.

Diverticion den su Lugar

20, 21. Pakico diverticion por tene un lugar apropiado den nos bida?

²⁰ Ta apropiado pa nos como hende temeroso di Dios ser interesá den nos diverticion i percura pé ser apropiado i cu nos ta keda balanzá den e cantidad di tempo cu nos ta dedicá na dje. (Efesio 2:1-4; 5:15-20) E skirbidor inspirá di Eclesiastés tabata di acuerdo: “Mi mes a encomenda gozamento, pasobra humanidad no tin nada mihor bao di solo cu come i bebe i goza, i pa esei compañánan den nan trabao duro durante e dianan di nan bida, cu e Dios berdadero a dúnanan bao di solo.” (Eclesiastés 8:15) Tal placer balanzá por refresca e curpa i yuda vence problema i frustracion cu ta común den e sistema actual.

²¹ Por ehempel, un pionero di Austria a skirbi na un amiga bieu: “Nos a pasa un bonita buitendag recientemente. Rond di 50 di nos a bai na un lago chikito cerca Ferlach. Ruman B​——​——​ a bai dilanti den su van, hibando tres grill, klapstoel, mesa, i asta mesa di pingpong. Nos a goza esei mashá hopi. Un hermana a hiba su sinfonía di man, pues tabatin hopi cantica di alabanza. E rumanan, hoven i bieu, a disfruta dje compañerismo.” E ruman tin bon memoria dje recreo bon supervisá cu nan a mantene liber di trampa, tal como mucho bebimento of conducta inmoral.—Santiago 3:17, 18.

22. Nos mester tene cua advertencia presente ora nos ta disfruta di un fiesta?

²² Pablo a consehános pa percura pa no entrega na deseo di carni imperfecto, ni sikiera trahando plan cu por híncanos den tentacion. (Romano 13:11-14) Esei ta inclui plan pa fiesta. Ora nos ta aplica su conseho na fiesta, nos por evita circunstancia cu a hiba algun hende na naufragio spiritual. (Lucas 21:34-36; 1 Timoteo 1:19) Mas bien, nos lo scoge sabiamente recreo saludable cu por yúdanos mantene nos relacion cu Dios. Dje manera ei, nos por beneficiá di diverticion den grupo cu por ta considerá como un bon don di Dios.—Eclesiastés 5:18.

[Nota]

Kico Nos a Siña?

◻ Cua punto di bista balanzá nos ta haya den e Bijbel tocante gozamento di fiesta?

◻ Pakico nos mester presta atencion ne naturaleza dje diverticion i ne tempo dedicá na dje?

◻ Menciona algun cos cu anfitrión cristian por haci pa evita trampa.

◻ Kico diverticion por logra pa hende cristian si e ta apropiado i balanzá?

[Plachi na página 18]

E doño of director di fiesta ta responsabel pa evita situacion cu por bira trampa pa esnan invitá