Mi a Acepta e Invitacion den e Tempo di Cosecha

SEGUN CU WINIFRED REMMIE A CONTÉ

“E COSECHA ta grandi, pero trahador ta poco.” E palabra ei di nos Señor Jesús a bini di un compasion profundo pa hende cu tabata raspá i plamá manera carné sin wardador. Mi a experimenta e mesun sintimento, i pe último 40 aña, mi semper a purba di reacciona favorablemente ne yamada dje Doño pa traha den e cosecha.—Mateo 9:36, 37.

Mi a nace den Westáfrica den un famía cu siete yiu, tur mucha muher. Nos mayornan tabata tierno, pero estricto; nan també tabata mashá religioso. No tabata posibel pa scapa for di misa i zondagscol cada siman. Esei no tabata un problema pa mi pasobra mi a stima cosnan spiritual. Realmente, na edad di 12, mi tabata nombrá pa conduci klas di zondagscol.

Casamento i aventura

Na 1941, ne edad di 23 aña, mi a casa cu Lichfield Remmie, un boekhouder ne ministerio colonial. Nos tabata bon situá materialmente, pero nos amor pa aventura i e deseo di acumula riqueza material a híbanos na Liberia na 1944. Un cambio grandi den e bida di mi esposo, i eventualmente den mi bida, a yega na 1950 ora el a conoce Hoyle Ervin, un misionero di Testigo di Jehova. Despues di solamente tres siman di studiamento, mi esposo a cuminza participa den e trabao di predica.

Mi a bira molestiá ora mi casá no a bai misa mas. En todo caso, e tabata un protestante fuerte cu asta a yuna durante cuaresma. E promé bez cu mi a miré sali pa predica, cu su tas den su man, mi a bira furioso. “Kico ta faltábo?” mi a puntra. “Un homber importante manera abo ta bai pa predica hunto cu e soketenan ei!” El a keda calmo i a dominé durante e zundramento.

Su mañan, ruman Ervin a bishita nos cas pa studia cu Lichfield. Manera costumber, mi a keda leu durante e estudio. Kizás tabata asina pasobra ruman Ervin a puntrámi si mi sa leza. Kico? Si ami sa leza? Ki un insulto! Mi kier a mustré cuanto educacion mi tabatin! Mi kier a desenmascará su religion falso!

Aceptacion dje berdad

No mucho tempo despues di esei, mi a ripara e buki “Dios sea berdadero” riba mesa dje sala. Mi a pensa, ‘Ki un título ridículo. Dios semper tabata berdadero, no ta berdad?’ Ora mi a pasa door dje buki, pronto mi a haya un otro cos pa keha. E buki ta bisa cu hende no tin un alma, hende ta un alma! Asta cachó i pushi ta alma! Esei realmente a molestiámi. Mi a pensa, ‘Ki un siñanza bobo!’

Ora mi casá a yega cas, mi a confronté, rabiá. “E gañadornan ta bisa cu hende no tin alma. Nan ta profeta falso!” Mi casá no a pleita; mas bien, el a contestá trankilamente: “Winnie, tur esei ta den e Bijbel.” Despues, ora ruman Ervin a mustrámi cu pacenshi den mi mes Bijbel cu nos ta alma i cu nos alma ta mortal, mi a keda babucá. (Ezekiel 18:4) Loke a impresionámi specialmente tabata e texto di Génesis 2:7, cu ta bisa cu: “E homber [Adam] a bira un alma bibiente.”

Ki un equibocacion mi a haci! Mi a mira cu e pastor a gañámi i mi no a bai misa mas. Mas bien, mi a cuminza asisti na reunion cristian di Testigo di Jehova. Ki impresioná mi a keda pa mira e amor den nan! Esei tabatin cu ser e religion berdadero.

E tempo di cosecha den Cabo Palmas

Rond di tres luna despues, mi casá tabatin e oportunidad di horta un suma grandi di placa for di su compañía—pero e no a hacié. Colega di dje a bisa cu mofa: “Remmie, bo ta bai muri pober.”

Sin embargo, debí na su onradez, el a haya promocion i tabata mandá na Cabo Palmas pa habri un oficina nobo ei. Nos a predica celosamente i despues di dos luna so, nos tabatin un grupo chikito sumamente interesá den e mensahe dje Bijbel. Despues, ora Lichfield a bai ne capital, Monrovia, pa haya material pe oficina nobo, el a bautiza. També, el a pidi yudanza dje Sociedad pa atende na hende den Cabo Palmas cu tabata mustra interés den e berdad.

E Sociedad a reacciona, mandando hermano i hermana Faust na Cabo Palmas. Hermana Faust a dunámi yudanza invalorable, i na December di 1951, mi a simboliza mi dedicacion na Jehova Dios cu mi bautismo. Awor, mas cu nunca, mi a keda determiná di ‘recoge fruta pa bida eterna.’ (Juan 4:35, 36) Na April di 1952, mi a bira pionera den e ministerio di tempo completo.

Jehova a bendiciona mi esfuerzo un bez; dentro di un aña, mi a yuda cinco hende dedica i bautiza. Uno di nan, Louissa Macintosh, tabata prima dje presidente corriente di Liberia, W. V. S. Tubman. El a bautiza i a drenta den e ministerio di tempo completo i a sigi fiel na Dios te na su morto na 1984. Na varios ocasion el a duna testimonio ne presidente.

Na Buchanan Pabao

Na 1957, durante e bishita dje superintendente di districto, mi casá i mi tabata invitá pa bira pionero special. Despues di un consideracion cu oracion, nos a acepta e asignacion. Lichfield mester a dedica algun luna pa termina su trabao seglar den Cabo Palmas, pues mi a bai promé cuné na Buchanan Pabao, un territorio nobo, pa principiá e trabao ei.

Ora mi a yega, e famía Maclean a recibími. Su mañan, segun costumber, nan a hibámi cerca e subcacique dje tribu di Pele. E cacique i su famía a recibími calorosamente, i mi a duna testimonio na un grupo chikito di hende den su cas. No menos cu seis hende cu a scuchámi e dia ei, incluyendo e subcacique i su esposa, a bira Testigo di Jehova despues.

Pronto mi a hayámi conduciendo un estudio di Toren di Vigilancia cu mas cu 20 hende asistiendo. Mi tabatin cu depende mashá riba Jehova Dios, i el a dunámi e fortaleza i capacidad necesario pa atende na su carnénan. Ora mi a sintími cansá of inadecuado, mi a corda hende fiel di antigua, specialmente hende muher tal como Débora i Huldá, cu tabata sin miedu den e cumplimento dje comision di Jehova.—Huez 4:4-7, 14-16; 2 Rey 22:14-20.

Den Mart di 1958, despues di tres luna so den Buchanan Pabao, mi a recibi un carta pa informámi dje bishita dje superintendente di circuito, John Charuk. Mi a huur e bodega di un cas cu por a contene un grupo grandi. Anto mi a bai na Buchanan Pariba pa topa cu ruman Charuk, pero e no a bini. Despues di a spera te anochi, mi a bolbe mashá cansá na Buchanan Pabao.

Rond di meianochi, mi a tende batimento na porta. Ora mi a habrié, mi a mira no solamente e superintendente di circuito sino també mi casá, kende su yegada inesperá a sosode conbenientemente cu e yegada di ruman Charuk. Con nan a hayámi? Nan a contra cu un jagdor i a puntré si el a conoce un señora cu tabata predica tocante Jehova. El a contestá cu “Sí,” i a dirigínan na mi lugar. Ki feliz mi a sintími cu den tres luna so den Buchanan Pabao, mi luz tabata luza tanto briyantemente!—Mateo 5:14-16.

Nos a disfruta di un asistencia máximo di 40 durante e bishita di ruman Charuk. Cu tempo nos a establece un congregacion próspero, i nos por a construi un bonita Salón di Reino. Sin embargo, bida no tabata semper liber di problema. Por ehempel, na 1963 persecucion religioso a cuminza den Kolahun, i nan a detene i a encarcelá mi casá. Nan a zuté asina hopi cu e tabatin cu ser hospitalizá.

No mucho tempo despues cu el a sali, den e mesun aña, nos a celebra un asamblea na Gbarnga. Ne último dia, soldad a detene tur esnan cu tabata asisti i a mándanos saludá e bandera. Ora nos a nenga, soldad a fórzanos di hiza nos man na laira i mira directamente na solo. Nan també a zuta algun di nos cu cabo di rifle. Como un yudanza pa mi warda mi integridad na Dios, mi a canta den mi curazón e cantica di alabanza “No tene miedu di nan!” Despues di esei, e soldadnan a céranos den un prisón sushi. Tres dia despues, tur stranhero a haya nan libertad, i Lichfield cu mi tabata deportá na Sierra León. E testigonan local a haya nan libertad su mañan.

Mas privilegio i recompensa

Nos tabata asigná pa traha cu e congregacion di Bo, den zuid di Sierra León. Nos a sirbi ei pa ocho aña promé cu nos tabata mandá na Njala. Ora nos tabata den Njala mi casá tabata nombrá como superintendente sustituto di circuito, i mi tabatin e privilegio di bai cuné ora el a traha den tal sirbishi. Anto, rond di 1975, nos tabata reasigná ne congregacion di East Freetown.

Mi a experimenta e recompensa di mira hopi hende cu locual mi a studia e Bijbel acepta e adoracion berdadero. Mi tin mas cu 60 yiu i nieto spiritual como “carta di recomendacion.” (2 Corintio 3:1) Algun tabatin cu haci cambio drástico, tal como Victoria Dyke, cu tabata un profetisa dje secta Aladura. Despues di un consideracion di 1 Juan 5:21, e finalmente a dispone di su cantidad di imagen i obheto di veneracion. El a simboliza su dedicacion cu bautismo i despues a bira un pionero special, yudando hopi di su famía acepta e berdad.

Na April di 1985, mi a perde mi casá den morto, un poco luna so promé cu nos boda di 44. Pero, mi no ta lagá mi so. Mi a sigi sirbi mi Ayudante, Jehova Dios, como un predicador di tempo completo. I mi ta sinti un enlace special cu hende cu mi a yuda yega di conocé. Nan ta mi famía den un sentido special. Mi ta stímanan i nan ta stimámi. Ora mi ta malu, nan ta bini na carreda pa cuidámi i, naturalmente, mi ta yuda nan també.

No cabe duda, si mi tabatin cu haci tur cos di nobo, cu mucho gusto lo mi tuma e machete den mi man i participa den e cosecha como compañé di trabao di Jehova Dios.

[Plachi na página 23]

Winifred Remmie awe