Huan A Siña Hende Ku e Mesías Lo A Bini

Huan tabata yu di Zakarías ku Elísabèt. El a bira profeta. Yehova a bisa Huan ku e mester a siña hende ku e Mesías lo a bini pronto. Pero Huan no tabata siña hende den e snoanan ni den e statnan. Mas bien, Huan tabata prediká den desierto. Hende di Herúsalèm i hende di tur parti di Hudea a bai serka Huan pa e siña nan. E tabata bisa e hendenan ku si nan ke hasi Dios kontentu, nan mester a stòp di hasi kos malu. Hopi hende ku a skucha loke Huan a bisa a sinti duele di e kosnan malu ku nan tabata hasi, i Huan a batisá nan den riu Yordan.

Huan a hiba un bida simpel. E tabata bisti paña trahá di lana di kamel, i e tabata kome dalakochi i stropi di abeha di mondi. Hende kier a sa ken Huan tabata. Asta e fariseonan i e saduseonan, ku tabata hende masha arogante, a bai serka Huan. Huan a bisa nan: ‘Boso tin ku arepentí di boso pikánan i kambia. No kere ku boso ta spesial djis pasobra boso ta bisa ku boso ta yu di Ábraham. Pasobra esei no ke men ku boso ta yu di Dios.’

Hopi hende tabata bai serka Huan i puntr’é: ‘Kiko nos tin ku hasi pa Dios keda kontentu ku nos?’ Huan a bisa nan: ‘Si boso tin dos paña, duna un paña na un hende ku tin mester di dje.’ Bo sa dikon Huan a bisa nan esei? Pasobra e tabata ke pa e hendenan sa ku si nan ke hasi Dios kontentu, nan mester a stima hende.

Huan a bisa e kobradónan di belasting: ‘Boso mester ta hende onesto. No kobra e hendenan di mas.’ Anto el a bisa e sòldánan: ‘No aseptá plaka pasá bou di mesa, i no gaña.’

E saserdotenan i e levitanan tambe a bai serka Huan i puntr’é: ‘Ta ken bo ta? Tur hende ke sa ta ken bo ta.’ Huan a kontestá: ‘Manera Isaías a profetisá, ta ami ta e persona ku ta grita den desierto ku ta yuda hende hala serka Yehova.’

Hende tabata gusta loke Huan tabata siña nan. Hopi hende tabata puntra nan mes si ta Huan tabata e Mesías. Pero Huan a bisa nan: ‘Un hende ku hopi mas outoridat ku mi ta bini despues di mi. Ami no ta digno di lòs su sandalianan. Ami ta batisá boso den awa, pero e lo batisá boso ku spiritu santu.’