Hesus na Mucha

Hose i Maria tabata biba na Názarèt huntu ku Hesus i nan otro yu hòmbernan i nan yu muhénan. Hose tabata traha komo karpinté pa kuida su famia. Hose tabata siña su famia tokante Yehova i tokante e leinan di Yehova. E famia tabatin kustumber di bai snoa pa adorá Yehova. I tur aña, nan tabata bai Herúsalèm pa selebrá Pasku Hudiu.

Tempu ku Hesus tabatin 12 aña, su famia a bai Herúsalèm manera semper nan tabata hasi. E biahe tabata largu. Masha hopi hende a bai Herúsalèm pa selebrá Pasku Hudiu. Despues di e fiesta, Hose i Maria a kuminsá nan biahe pa bai kas bèk. Nan a pensa ku Hesus tabata den e grupo ku tabata biaha huntu ku nan. Pero ora nan a bai buska Hesus serka nan famianan, nan no por a hañ’é.

Hose i Maria a bai Herúsalèm bèk, i nan a buska Hesus tres dia largu. Finalmente, Hose i Maria a bai tèmpel i nan a haña Hesus einan. E tabata sinta meimei di e maestronan, e tabata skucha nan i hasi bon pregunta. E maestronan tabata asina impreshoná ku Hesus ku nan a kuminsá hasi Hesus pregunta. Nan a keda asombrá ora nan a tende Hesus su kontestanan. Nan por a mira ku Hesus tabata komprondé e leinan di Yehova bon.

Hose i Maria tabata hopi preokupá. Maria a bisa: ‘Mi yu, nos a kana buska bo tur kaminda. Unda bo tabata?’ Hesus a bisa nan: ‘Boso no tabata sa ku mi mester ta aki den kas di mi Tata?’

Hesus i su mayornan a bai Názarèt bèk. Hose a siña Hesus e trabou di karpinté. Kon bo ta kere ku Hesus lo tabata na mucha? Segun ku Hesus tabata krese, el a bira mas sabí. I tantu Dios komo hende tabata stim’é.