Nos A Ser Rescatá for di un Lahar!

DIA 1 di october di 1995 a habri mescos cu tur otro dia cu e famia Garcia a yega di experenciá. Famia Garcia ta testigo activo di Jehova, i nan cas tabata situá den un urbanisacion na Cabalantian, Bacolor, den provincia di Pampanga, Filipínas. Aunke nan cas tabata cerca di sector cu a experenciá lahar di Ceru Pinatubo, e no a ser afectá directamente. Dam cu e gobiernu a traha pa proteccion contra lahar a protehá Cabalantian. Pero, cosnan tabata di cambia lihé.

Un tormenta severo a basha 22 centimeter di yobida riba Ceru Pinatubo. Mainta trempan telefon a ring den cas di Garcia. Tabata un hende cu a marca un number robes, pero e persona a bisa cu un dam a kibra i cu e famia mester prepará pa un diluvio.

Experencia Penoso A Cuminsá

Nonato Garcia, tata dje famia i superintendente presidente dje congregacion Villa Rosemarie, a relatá: “Diadomingo mainta promé cu cinc’or’, awa a cuminsá subi rond di nos cas.

“Mi a kere cu nos solamente lo haña un inundacion di awa, p’esei nos a cuminsá hiba nos pertenencianan na piso ariba. Pero, despues di dies or’ di mainta, mi a mira cu lodo di lahar tabata bruhá cu e awa. E riu a sigui subi i bira mas fuerte te cu e tabata severo i tabata hiba baranca cuné. Nos a subi riba e dak.

“Despues, e riu tabata hiba auto i asta cas. Un cas cu un baranca grandi a dal, a kibra i a ser hibá. E lahar a laga su dak cerca di nos cas. Tabatin hende riba e dak. Mi a yama nan i a animá nan pa bini riba e dak di nos cas. Pa nan haci esei, nan a coge un kabel cu mi a tira pa nan. Mi a mara esaki na mi curpa, i mi a hala nan un tras di otro cerca nos. Mas hende a bini di otro dak cu lodo di lahar tabata tapa. Miéntras tantu, yobida a sigui.

“Tramerdia helicopternan a cuminsá pasa na laira. Pero ningun a baha pa scapa nos, aunke nos a waya man frenéticamente. Nos a kere cu mester tin hende den mas necesidad, i e helicopter tabata busca nan promé. Mi no a kere cu nan lo busca nos pronto, pasobra tabatin hopi hende riba dak di cas sin por a baha.

“Oracion ta un cos mashá importante durante situacionnan asina. Asta ora e peliger ta grandi, despues di haci oracion bo no ta sinti miedu. Nos no a pidi Jehova pa haci un milager, sino nos a pidi loke tabata su boluntad, sabiendo cu calamidad por afectá cualkier hende. Pero, ami sí a pidi fortalesa, curashi, i sabiduria. Tur esaki a yuda nos enfrentá e situacion cu nos tabata aden n’e momento ei.”

Carmen, casá di Nonato, tabata di acuerdo: “Loke mi casá ta bisa tocante oracion ta realmente berdad. Mi tin inclinacion di bira mashá nervioso den un situacion ora mi stimánan ta den peliger. Ora mi a mira cu e dak tabata tapando cu lodo di lahar i cu baranca tabata dal e, mi a bisa mi casá: ‘Ta parce cu no tin speransa pa nos.’ Pero el a animá mi, bisando: ‘Laga nos haci oracion.’”

Nonato a sigui: “Cuat’or’ djatardi e stroom di lahar tabata mashá fuerte ainda. Barancanan grandi tabata dal e cas. Montonnan di piedra dje lahar a tapa rond di mitar dje dak. Mi a cuminsá pensa cu pronto lo bira scur i cu lo ta mashá difícil pa biaha. Pues, miéntras cu tabatin claridad di dia ainda, nos a dicidí di bai.

“Mi a tira un stul den e lodo dje lahar pa wak si e ta sink, i mi asta a sinta riba e stul, pero e no a sink. Pues, mi a haña un pida palu largu pa hinca den e lodo. Mi a usa esei pa haña lugá duru cu por wanta nos peso. Asina, nos cu vários di nos bisiñanan, por a cuminsá pasa riba e lodo. Nos tabata 26 hende total.

“Nos a bai den direccion di un dak hopi mas haltu den e distancia. Usando e pida palu, nos a sigui hinca e lodo pa haña lugá pa pasa. Caminda cu e lodo tabata hopi moli ainda, nos a gatia.”

Cu lágrima na wowo, Carmen a splica: “Na algun lugá nos tabata net na cantu dje stroom di lahar i tabatin cu cana di banda riba un faha di tera smal. Na un lugá mi a baha te na mi pechu den e lodo i a bisa mi casá: ‘Mi no por sigui. Mi ta bai muri.’ Pero el a bisa: ‘No, bo por hacié. Subi.’ Cu e yudansa di Jehova, nos a sigui.”

Nora Mengullo, un miembro dje famia, a agregá: “Tabatin lugá unda tabata muchu moli pa pasa na rudia, nos a lastra riba nos lomba, pushando nos curpa cu nos pia. Tabatin bes cu nos a sink muchu leu den e lodo, pero un a yuda saca otro, specialmente e muchanan.”

Rescatá—Por Fin!

Nonato a sigui e relato: “Miéntras cu hopi esfuerso nos a pasa na cantu dje lahar na rudia, un helicopter a pasa i a mira nos situacion precario—no riba un dak, sino meimei di montonnan di piedra dje lahar. Un di nos compañeronan a hisa su yu di ocho luna na haltu, cu e speransa cu nan por mira nos situacion. Nan a baha pa hiba nos. Nos a laga mucha i hende muher subi promé den e helicopter, siendo cu nan no por a hiba nos tur.

“Finalmente, nan a busca nos tambe i a hiba nos na un centro di refugio. E hendenan einan no por a duna nos paña pa bisti, aunke tur nos paña tabata yen di lodo di lahar. Mi a bisa nan cu mi famia lo no bai cu e otro hendenan na e centro di refugio, pasobra nos kier a bai na un Salon di Reino. Ora nos a yega ei, nan a duna nos paña i cuminda mesora, i a duna otro yudansa. Mas ruman dje congregacion a yega, i nan tambe a yuda nos.”

Carmen ta agregá: “Aunke nos no por a spera yudansa di otro fuentenan, nos a sinti e bendicion di nos hermandad cristian.”

Aunke e lahar a tapa e cas di dos piso di famia Garcia, nos ta keda gradicidu cu nan i nan tres yunan, Lovely, Charmy, i Charly, a scapa for dje experencia penoso huntu cu otro Testigonan di Jehova den e área.

[Plachinan na página 23]

Segundo piso di famia Garcia su cas parcialmente cobá for di lodo

E famia di Nonato Garcia dilant’i nan cas derá den lodo