Ekilibrio—Un Don di Dios

MI AMIGUNAN a bisá mi cu, “Esei ta efecto di laman i e por dura pa algun dia.” Tabata october di aña 1990, i mi a caba di baha for di bapor di turista riba tera firme despues di a pasa shete dia riba Laman Caribe. Pero, loke mi a kere lo a bira experencia di algun dia a sigui pa hopi luna. Ta como si mi ta na bordo dje barcu ainda. Algu a sosodé cu mi sistema vestibular, e sistema delicado di ekilibrio dje orea interior cu su coneccion central den e celebro.

Kico E Ta? Con E Ta Funcioná?

E centro di coordinacion di bo ekilibrio ta situá na base di bo celebro yamá rama di celebro. Ora bo ta salú, bo ta mantené bo ekilibrio debí na impulso incontabel cu bo celebro ta ricibí for di bo wowo, músculo i orea.

Bo wowo ta manda señal continuo n’e rama di bo celebro tocante bo alrededor. Nervio den bo músculo, yamá proprioceptor, ta manda informacion na bo celebro tocante e clase di superficie unda bo ta cana of ta mishiendo. Pero, ta bo sistema vestibular ta loke ta sirbi como sistema guiador interno cu ta bisa bo celebro unda bo curpa ta den espacio en relacion cu e tera i su forsa di gravedad.

E sistema vestibular ta consistí di cincu parti cu tin cu ber cu ekilibrio: tres canal semicircular i dos sacu. E canalnan semicircular ta ser yamá canal superior, canal horizontal, i canal inferior. E dos sacunan ta yamá e utrículo i sáculo.

E canalnan semicircular ta drumí plat, 90° en relacion cu otro, manera muraya i vloer di cas ta topa den skina. E canalnan ta manera gang formando un laberinto scondí den e wesu duru dje craneo yamá wesu temporal. Dentro di tal laberinto den e wesu ta un otro laberinto yamá laberinto membranoso. Na punta di cada tubu semicircular membranoso, tin loke por parce un hinchamentu, locual ta ser yamá ampoya, of boter. Paden dje laberinto membranoso tin un líkido special yamá endolinfa. I pafó dje membrano, tin un otro líkido ainda di un otro composicion kímico yamá perilinfa.

E parti hinchá dje tubu yamá ampoya, of boter, ta contené cel special di cabei den e forma di paki cu ta tapá den un bola di manteca yamá cúpula. Ora bo ta move bo cabes den cualkier direccion, e líkido endolinfático ta tarda un poco tras di movementu dje canal mes; i p’esei e líkido ta dobla e cúpula i e paki di cabei cu e ta contené. E movementu dje paki di cabei ta causa cambio den e coriente eléctrico di cel di cabei, i esei en turno ta manda mensahe na bo celebro via celnan di nervio. Mensahe ta pasa no solamente for di celnan di cabei individual p’e celebro via loke ta yamá nervio aferente sino tambe ta bolbe for dje celebro te na cada cel di cabei via nervio eferente pa duna cel di cabei informacion compensador ora esei ta necesario.

Canal semicircular ta detectá si bo ta hala bo cabes stret of ta bir’é den cualkier direccion, tal como lèn dilanti of patras, ta lagu’é drumi na un banda of otro, of ta bira links of rechts.

En cambio, e utrículo i sáculo ta detectá aceleracion linear; p’esei nan ta ser yamá sensornan di gravedad. Nan tambe ta contené cel di cabei den loke ta ser yamá “mácula acústica.” Por ehempel, e sáculo por manda informacion pa bo celebro cu por duná bo e sintimentu di subi ora bo ta den lift. E utrículo ta e detector principal cu ta reaccioná ora bo ta coriendo den un auto i ta acelerá di ripiente. E ta manda informacion na bo celebro pa duná bo e sintimentu di ser halá dilanti of patras. Anto bo celebro ta combiná e informacion aki cu otro impulsonan pa bo tuma decision, tal como con pa bo move bo wowonan, brasa i pia pa reaccioná na bo aparente movementu. Esei ta yudá bo mantené bo orientacion.

E ta un sistema maraviyoso cu ta duna onor na su Dibuhante, Jehova Dios. E sistema ta obligá asta científico investigador di keda impresioná dor di su dibuho. Profesor di biologia i fisiologia A. J. Hudspeth, a skirbi den e revista Scientific American: “Sin embargo, mas investigacion por solamente haci nos straña mas na ki sensibel i complicá ta e aparato biológico miniaturisá aki.”

Funcion Malu dje Sistema Vestibular

Den mi caso e problema den mi orea interior a haña e diagnósis di otospongiosis of otosclerosis. Esaki ta un condicion ora e wesu den locual e sistema vestibular ta localisá ta bira moli of manera spons. Normalmente e wesu ta keda masha duru, asta mas duru cu wesu den otro parti di bo curpa. Den e proceso di bira moli, nan ta kere cu bo curpa ta producí un enzima cu ta penetrá den e líkido dje orea interior i ta cambia e kímico di dje of realmente ta venená e líkido. Esaki por causa e sintimentu straño di movementu constante aunke bo ta pará of ta drumí ketu.

Pa ami, a parce cu e suela bou di mi pia tabata subi i baha manera ola di laman tantu como 30 centimeter haltu. Ora mi tabata drumí, a parce cu mi tabata drumí den bom di un boto di rema den ola di laman di un meter haltu. E sintimentu no a bai i bini manera den e caso di atake di biramentu di cabes, sino a bini i a permanecé 24 ora pa dia, luna tras luna. E único alivio tabata ora mi tabata fo’i mi tinu na soño.

Causa i Tratamentu

Hende no sa ainda e causa di otospongiosis/otosclerosis, aunke e por tin coneccion relacioná cu herencia. Ta dificultoso pa ciencia médico studia e condicion, pasobra ta parce cu e ta sosodé cu hende so. Rara bes, of casi nunca, esei ta sosodé cu bestia. Otospongiosis por causa tinnitus (fluitmentu den orea), un sintimentu di cu cabes ta yen, of ta lihé, perdementu di balansa, of vários forma di vértigo (biramentu di cabes). E mésun condicion por haci beugel pega den orea interior i causa perdementu di oido resultando for di interferencia cu e transmision di olanan sonoro n’e órgano di corti; yamá tambe “transmision di surdu.” Si otospongiosis ta alcansá e coclea of caracol (spiral), e por causa tambe perdementu di oido sensorineural, destruyendo funcion di nervio.

Tin tratamentunan pa e condicion aki. Algun ta enbolbé operacion (mira ¡Despertad! di 8 di juli, 1988, página 19); otronan ta haci esfuerso pa tarda e decaimentu di wesu dunando kalki i fluoruro. Dieta liber di sucu ta ser sugerí avéces pasobra e orea interior tin un gran necesidad pa sucu di sanger. Realmente, e orea interior tin mester di tres bes mas sucu como energia cu un parti igual dje celebro. Un orea salú ta trata basta bon cu variacion di sucu di sanger; pero despues di daño n’e orea, tal variacion por haci bo cabes bira. Ta parce cu cafeina i alcohol tambe ta perhudicial ora bo orea interior no ta funcioná bon. Aunke e biahe riba e barcu di turista, mencioná na principio dje artículo aki, realmente no a causa e problema, cambio den temperatura, humedad, i custumber di come probablemente a causa e perdementu di ekilibrio.

Bo orea interior ta haci mas cu sirbi como bo oido. Di un manera maraviyoso, e ta yudá bo mantené ekilibrio. Su dibuho mester haci nos admirá e obra di nos Trahador, i duna nos un aprecio mas profundo pa su creacion.—Contribuí.

[Diagrams/Plachi na página 26]

(For fully formatted text, see publication)

Bo Asombroso Sistema Vestibular

Bista Exterior

CANAL SUPERIOR

BENTANA OVAL

BENTANA RONDO

COCLEA

CANAL INFERIOR

CANAL HORIZONTAL

Bista Interior

WESU TEMPORAL

LABERINTO MEMBRANOSO

AMPOYA

SACULO

Detector vertical di movecion

COCLEA

Organo di tende

MACULA

UTRICULO

CRISTA

Detector horizontal di movecion

Ta midi movementu angular