Aliwan Solusyon so Inkaruksa

Ondarakel so totoon mangibabaga ya pian talagan nasolusyonan iray problema tan agpantatalosan et mas maong no idalan lad inkaruksa. Pero kabaliktaran itan ed imbangat tan ginawa nen Jesu-Kristo. Imanoey pigaran imbangat tan ginawa to.

Saray imbaga nen Jesus

Diad samay kabkabat ya Sermon ed Palandey, imbangat nen Jesus ya agnasolusyonan so agpantatalosan no idalan itan ed pasnok tan inkaruksa. Nia ray alimbawa.

• “Amin a labay yon gawaen na totoo ed sikayo, ontan met so nepeg yon gawaen ed sikara.” (Mateo 7:12; Lucas 6:31) Aya may tatawagen ya Golden Rule.a Ibabangat itayo na saya ya nepeg tayon tratoen so arum diad paraan ya labay tayon pantrato da met ed sikatayo. Anggapo tay too ya labay ton aliwliway pantrato ed sikato, kanian kaukolan tayon respetoen tan panengnengan na kamaongan so amin ya totoo, anggano dumay labay tayo ed labay da.

• “No walay manampal ed kawanan ya aping mo, iyarap mo met ed sikato so kawigi.” (Mateo 5:38, 39; Lucas 6:29) Ag-ibabangat dia nen Jesus ya paulyanan tayo labat so arum ya sakitan da tayo. Noagta labay to ya ipetek imay aliwan ibabangat na arum ya lider na relihyon ya ayos labat kuno so ombawi. Imbaga tod saray papatumbok to ya dapat kalmado ni ran siansia tan ag-ira ombabawi anggano aliwliway impantrato na arum ed sikara.b

• “Itultuloy yon aroen iray mamubusol ed sikayo.” (Mateo 5:43, 44; Lucas 6:27) Ibabangat itayo nen Jesus ya ipanengneng tayoy kamaongan ed saray mamubusol ed sikatayo tan ed saramay aliwan patas so pantratrato da ed sikatayo. Balet aglabay ya ibaga nen Jesus ya konsintien tayo lay aliwan gagawaen da.c Tandaan tayo ya no maong so pantrato tayo ed sikara, ompan napalemek tayo lanlamang so puso ra tan panengnengan da tayo met na kamaongan.

Saray ginawa nen Jesus tan saray gawaen to ni labat

Imbangat nen Jesus ya aliwan solusyon so inkaruksa, tan impanengneng to itan diad mismon kabibilay to. Singa bilang, diad samay labi ya arestoen da lay Jesus, sakey ed saray patumbok to so angidepensa ed sikato. Pero oniay imbaga nen Jesus ed sikato: “Ipawil moy espadam ed kaluban to, ta amin iramay mangusar na espada et ompatey ed espada.” (Mateo 26:52) Nanengneng tayo ya inaro nen Jesus anggan saramay mamubusol ed sikato ta pinerdona to ra anggano aliwliway impantrato da ed sikato, impikasi to ni ra ingen!—Lucas 23:33, 34; 1 Pedro 2:23.

Ibabaga na Biblia ya asingsingger lan panampoten nen Jesus, say Prinsipe na Kareenan, so amin ya klase na inkaruksa. (Isaias 9:6, 7) Pian naaruman ni antam ed sayan balibalin nagawa ed arapen, basam so artikulon “No Panon ya Manampot so Guerra tan Panlalaban.”