Paaligwas Moy ‘Dunong Mo ed Panagbangat’

1. Antoy kaukolan tayon paaligwasen, tan akin? (2 Timoteo 4:2) (Nengnengen met so litrato.)

ONIAY ingganggan nen Jesus ed saray papatumbok to: “Ibangat yo iray totoo . . . pian magmaliw iran disipulok, . . . ya ibangat yo ran mangunor ed amin ya ingganggan kod sikayo.” (Mat. 28:​19, 20) Labay ton ibaga sirin, amin ya Kristiano et nepeg ya manbangat. Tua, iyaasingger nen Jehova ed katuaan iramay “walaan na dugan kipapasen na puso” tan igigiya itayo na saray anghel pian naromog tayo iray ontan ya totoo. (Gawa 13:48; Juan 6:44; Apo. 14:6) Pero, kaukolan tayo met ya gawaen so betang tayo. Isipen pay alimbawa nen apostol Pablo tan Bernabe. Ibabaga na Biblia ya nen nampulong ira ed sinagoga diad Iconio, “alay abig so impansalita ra kanian dakdakel a Judio tan Griego so nagmaliw a mananisia.” (Gawa 14:1) Akin et agawaan itan nen Pablo tan Bernabe? Seguradon nansagpot ira pian napaaligwas day ‘dunong da ed panagbangat.’ (Basaen so 2 Timoteo 4:2.) Kaukolan itan ya gawaen na amin ya Kristiano.

2. Akin et wala ray agagi ya say pakalikna ra et agda lan balot napaaligwas so paraan na panagbangat da?

² Wala ray agagi ya say pakalikna ra et agda lan balot napaaligwas so paraan na panagbangat da ta abebay aral da tan makapuy ira kunon man-explain. Diad tua, alikna met itan na saray lingkor nen Jehova nensaman. (Exo. 4:10; Jer. 1:6) Say arum balet, nadidismaya ira ta anggapoy naromog dan iyaralan na Biblia, aliwan singa arum ya agagi ya dakel so balibalin eksperiensya da ed ministeryo. No ontan so naliliknam, tandaan mo ya wala ran talagay ag-ondengel ed maong a balita, tan say reaksion na totoo diad ministeryo et aglabat akadepende ed dunong tayon manbangat. Singa abitla nen niman, baleg so papel nen Jehova tan saray anghel pian niyasingger ed katuaan iray mapaabeban totoo. Pero siempre, gawaen tayo met so anggaay nayarian tayo pian nipasabi tayoy maong a balita diad paraan ya nasagyat ya ondengel iray totoo. Pantongtongan tayo sirin ed sayan artikulo so taloran makatulong pian napaaligwas tayoy dunong tayon manbangat.

TALOSAN TAN IMALASAKIT MO IRAY TOTOO

3. Akin et labalabay na totoo so ondengel ed si Jesus?

³ Ibabaga na Biblia ya “amta [nen Jesus] no antoy walad puso na too.” (Juan 2:25) Kanian amta to no antoy iisipen tan nalilikna na saramay pinulongan to. Natatalosan toy situasyon da, kanian no anto may kaukolan da, aman so imbangat tod sikara. Anengneng to ya narasan irad espiritual tan nabebelatan ira ed dakdakel ya tradisyon tan ganggan ya ginawa labat na saray lider na relihyon. (Mat. 9:36; 23:4) Kanian diad samay Sermon ed Palandey, imbangat nen Jesus ed saray totoo no anto ray nepeg dan gawaen pian nalemewan tan nainawaan ira. Labalabay day ondengel ed si Jesus ta dugarugad situasyon da iray ibabangat to.

4. Panon tayon nipanengneng ya imamalasakit tayo ray totoo? (Nengnengen met so litrato.)

⁴ Kada too ya napupulongan tayo et apektado ed saray mauges ya nagagawa ed mundo nen Satanas. Nipanengneng tayo ya imamalasakit tayo ra no isipen tayoy dadalanen da. Singa bilang, kasin walay agawad lugar yo ya panaaburidoan na totoo? Kasin mapagpaga iray atateng ed teritorya yo ta singa aliwa lan ligtas iray ananak da ed eskuelaan? Kasin dakel so anggapoy trabaho? Imadyin mo pay bilay na sarayan totoo. Anta mair-irap la lanti situasyon da, anggapo ni ilalo ra ta agda amtay ibabaga na Biblia ya gawaen na Dios diad arapen! (Isa. 65:​13, 14; 2 Tim. 3:1) No atan so sankanonot mo, nakasian mo ra tan labalabay mo ran tulongan.

5. Akin et duman maong si Jesus ed saray Fariseo? (Mateo 11:​28-30)

⁵ Maomaong so impantrato nen Jesus ed saray totoon pinulongan to, kanian sankalikna day malasakit to. Anengneng da ya dumay Jesus ed saray Fariseo. Abebbeba tan andi-kakanaan so pakanengneng na saray Fariseo ed saray ordinaryon totoo. (Mat. 23:13; Juan 7:49) Pero si Jesus, maomaong tan marespeto ed sikara. “Mauyamo tan mapaabeba” kanian kada no manbabangat, madengedengel ed sikato iray totoo. (Basaen so Mateo 11:​28-30.) Aligen tayoy Jesus. Panengnengan tayoy kamaongan tan respeto iray totoon napupulongan tayo.

6. Panon tayon nipanengneng so kamaongan tan respeto ed saramay ag-ondengel o kontra ni ingen ed mensahe tayo?

⁶ Panon to balet no ag-ondengel iray totoo tan ompan kontra ni ra ingen ed mensahe tayo? Binilin itayo nen Jesus ya agtayo ra bubusolen. Say kuan to ingen: “Manggawa kayoy maabig ed saray mamubusol ed sikayo, mansalita kayoy maabig ed saray mangaayew ed sikayo, [tan] ipikasi yo iray mangiinsulto ed sikayo.” (Luc. 6:​27, 28) Antoy makatulong pian maong so pantrato tayo ed ontan iran totoo? Isipen tayo la ya ompan walay ambelat ya rason akin et ontan so reaksion da. Tua, wala ran talagay totoo ya sarado lay isip da. Pero say arum, ompan agda labay so mitongtong ta abanaan tayo ya walay panaaburidoan da o walay problema dad pamilya. Odino ompan naksawan ira o aliwliway liknaan da nen linma tayod abung da. Antokaman so situasyon da, ‘komon ta naynay a maabig iray salita tayo, ya atimplaan na asin.’ Isipen tayo nin maong no ‘panon so nepeg tayon iyebat ed kada too.’ (Col. 4:6) On, no talosan tayoy situasyon na totoo tan imalasakit tayo ra, agtayo pinunuyan so negatibon reaksion da tan mas napaaligwas tayoy paraan na panagbangat tayo.

USAR MO SO BIBLIA

7. Panon tayon amta ya imbase nen Jesus iray bangat to diad Salita na Dios? (Juan 7:​14-16)

⁷ Lanang ya ibabase nen Jesus iray bangat to diad Salita na Dios, aliwan diad sarili ton opinyon o ideya. Simpli labat so panagbangat to, kanian mainomay ya natalosan tan natandaan na totoo iray leksion ya ibabangat to. Mandinayew iray totoo ta no mansalita, “walaay autoridad, . . . aliwan singa saray eskriba.” (Mar. 1:22) Nen panaon nen Jesus, say bungay sangi na saray eskriba et saray bangat na respetado tan kabkabat iran rabbi. Pero duma si Jesus ta say bungay sangi to et saray akasulat ed Salita na Dios. Anak na Dios si Jesus tan abaybayag ya nambilay ed tawen antis ya linmad dalin, kanian sarasarag to komon ya pabiliben iray totoo ed talino to tan ipalupad sikara ya dakel so amta to. Pero agto itan ginawa. Kada no manbabangat, amin ya ibabaga to et nanlapud Salita na Dios. (Basaen so Juan 7:​14-16.) Aligen tayoy alimbawa nen Jesus.

8. Panon ya inalig nen apostol Pedro so paraan na panagbangat nen Jesus?

⁸ Inalig na saray disipulo nen Jesus so paraan na panagbangat to. Uusaren da so Salita na Dios kada no manbabangat ira. Singa bilang, imanoen pa imay paliwawa nen apostol Pedro nen Pentecostes 33 C.E. Aliwan atagey so inaral nen Pedro, pero asabi toy puso na saray totoo nen inusar toy Kasulatan pian ipaliwawa iray propesiya ya asumpal ed si Jesus. (Gawa 2:​14-37) Kayari ton nampaliwawa, “abautismoan iramay maliket ya angawat ed salita to, tan diad saman ya agew et niarum so manga 3,000 totoo.”—Gawa 2:41.

9. Akin et importante ya usaren tayo so Biblia no manbabangat tayo?

⁹ Say Biblia so sankaabigan ya makatulong pian nasabi tayoy puso na totoo. (Heb. 4:12) Usaren tayo sirin so Biblia diad ministeryo. ‘Ipulong tayo so salita,’ aliwan say sarili tayon opinyon o ideya. (2 Tim. 4:2) Ibabaga na Proverbio 2:6 ya “si Jehova so mangiiter na karunongan; manlalapud sangi to so kakabatan tan pakatebek.” Kanian no uusaren tayo so Biblia diad pambabangat tayo, singa si Jehova ya mismo so pansasalitaen tayo. (Mal. 2:7) Labay tayon naamtaan na totoo ya say karunongan ya walad Biblia et arawin dalin ed karunongan na too. Nanlapu itan ed Dios tan nabasa ditan no anto ray kaukolan tayon gawaen pian magmaliw ya maliket so bilay tayo tan napaliket tayoy Amalsa.—2 Tim. 3:​16, 17.

10. Panon mon nidanet ed Bible study’m ya say aaralen yo et talagan nanlapud Biblia?

¹⁰ No ipaparaan moy leksion ya iyaral mo ed Bible study’m, manisip kay paraan pian nidanet mod sikato ya say aaralen yo et nanlapud Biblia. Tua, manguusar tayo na saray litrato tan video, pero importantin natalosan na iyaaralan mo ya say Biblia so basiyan na amin ya aaralen yo. Kanian legan na panaaral yo, basa yo iray teksto ya mangidadanet ed manunan punto, tan seguroen mo ya natatalosan to no antoy labay ya ibaga na saratan ya teksto. No walay litrato o video, ipaimanom no antoy koneksion to ’tan ed saray prinsipyod Biblia ya tatalakayen yo. Kasin kaukolan ya dakel so ibagam o dakel so basaen yon teksto? Andi. Say importante, ikdan moy panaon imay iyaaralan mo ya natalosan toy punto na kada teksto. No agto atalosan, ompan kaukolan to lamet ya basaen. No ontan so paraan na panagbangat mo, nidanet ed samay iyaaralan mo ya amay gagawaen yo et aliwan panag-aral na libro, litrato, o video, noagta panag-aral na Biblia.—1 Cor. 2:13.

11-12. (a) Panon tayon nipanengneng so anos no mangiyaaral tayo? (Gawa 17:​1-4) (Nengnengen met so litrato.) (b) No Biblia so pantongtongan, antoy ag-amta na arum ya totoo, tan panon tayo ran natulongan?

¹¹ No mairap ya talosan o panisiaan na iyaaralan mo so sakey ya punto, itultuloy mo labat ya iyaralan. Tandaan, kaukolan mon ‘ipulong so salita a walaay anos.’ (2 Tim. 4:2) Aliwan parepareho so kada too. Ompan parad sika, mainomay ya talosan so sakey ya katuaan. Pero diad biang na iyaaralan mo, ompan kaukolan to ni panaon pian natalosan to itan. Makaaral tayod si Pablo. Nen pinulongan to ray Judio ed Tesalonica, agdan tampol atalosan so imbangat to. Aminpiga nin “akikatunongan ed sikara manlapud Kasulatan,” insan da nala so punto to.—Basaen so Gawa 17:​1-4.

¹² Panon mo nin nipanengneng so anos? Tepetan mo may iyaaralan mo pian naamtaan mo no antoy walad nonot to, tan agmo aapuraen ya onebat pian makapannonot ya maong. Agka salita lan salita. Dengel mon maong so ibaga to. No malinew lad sika no antoy walad nonot to, insan mo la natan ipaimano iray teksto ya pakabasaan no antoy nibaga nen Jehova. Tan nia ni tandaan mo: Wala ray totoo ya anggapoy kakkaamta rad Biblia tan agni ra ingen akanengneng na Biblia. No ontan so iyaaralan mo, maabig no iyawitan moy inimprintan kopya na Biblia. Ipanengneng mod sikato imay walad bandad arap na Balon Mundo a Patalos ya “No Antoy Naaralan ed Salita na Dios” pian nanengneng to ya talagan dakel so naaralan tod Biblia. Singa bilang, no ipaimanom ed sikato so sakey o duaran teksto ya wadman ed tepet 15, natalosan to ya makatulong so Biblia pian magmaliw tayon maliket. On, no ipanengneng mod iyaaralan mo ya balbaleg so nitulong na Biblia ed bilay to, mas magmaliw ya epektibo so panagbangat mo.

IPAARAP MOY ATENSION ED SI JEHOVA

13. No manbabangat tayo, siopay pangipaarapan tayoy atension? Mangiter na ilustrasyon.

¹³ Labay tayon tulongan iray totoo pian nakabkabat day Jehova tan onasingger so liknaan dad sikato. (Sant. 4:8) Say kimey tayo et sarag tayon ikompara ed trabaho na sakey ya technician ya mangokontrol na liwawa diad concert. Legan na concert, agto ipaarap so liwawa ed sarili to. Ipaarap to itan ed saray walad stage pian sikara so nanengneng na audience. Ontan met so nepeg tayon gawaen no manbabangat tayo. Ipaarap tayoy atension ed si Jehova, aliwan diad sarili tayo.

14. Panon mon natulongan so iyaaralan mo pian napakiwas ya paliketen so puso nen Jehova?

¹⁴ Tulongan moy iyaaralan mo ya aroen toy Jehova tan napakiwas ya paliketen so puso To. (Pro. 27:11) Kaukolan ton natalosan ya say pagmaliw ya lingkor nen Jehova et aliwan singa pimembro ed sakey ya asosasyon, ya basta natumbok moy ipapagawa ra et duga la. Ipurek mod sikato ya no bilang ta manggaway pananguman ed bilay to, gawaen to itan lapud inaro toy Jehova. Singa bilang, no nanairapan ya itunda so sakey ya bisyo, tepetan mo: “Akin kasi et kabusol nen Jehova iyan bisyo? Akin et igaganggan nen Jehova ya itundam itan anta amta to balet ya labalabay mo? Ayan ipapagawa tod sika, akin et patunay iya ya inar-aro to ka?” On, no ipasal moy iyaaralan mo ya nonoten ton lanang si Jehova, diman to nalikna ya walay Ama tod tawen ya mangaarod sikato. Kanian naar-aro to met si Jehova tan napakiwas ya gawaen so panlabayan To.

ITULTULOY MON PAALIGWASEN SO DUNONG MO ED PANAGBANGAT

15. Antoy gawaen mo pian tuloytuloy mon napaaligwas so dunong mod panagbangat?

¹⁵ Ipikasim ed si Jehova ya tulongan to ka pian nanengneng mo no anto ni ray kaukolan mon paaligwasen ed paraan na panagbangat mo. (1 Juan 5:14) Nipanengneng mo ya pankikimeyan mo itan ya pikakasim no ondengel kan maong diad aral, ta ditan itayo ipapasal nen Jehova no panon so epektibon pambangat. No man-Bible study ka, mangitagar kay agagi ya maong ya manbangat. Ibagam ya obserbaan da ka, tan tepetan mo ra no anto ni kaukolan mon paaligwasen. Tandaan mo met ya anggano kakkabisadom so leksion ya iyaral mo, agbalet itan kabisado na Bible study’m. Kanian no ipaparaan moy leksion, ipasen mo ya sika may iyaaralan na Biblia. Tan legan kayon manaaral, tulongan mo may study’m pian nanengneng to ya talagan parad pankaabigan to imay aaralen yo. No ontan so gawaen mo, onapit so liknaan to ed si Jehova tan nalikna toy tuan liket.—Sal. 1:​1-3.

16. Akin et maabig no tuloytuloy tayon paaligwasen so dunong tayod panagbangat?

¹⁶ Say pambangat ed arum nipaakar ed si Jehova so sakey ed saray panliliketan tayon gawaen natan. Diad balon mundo, dakel ni bangatan tayo! Tandaan tayo sirin iramay naaralan tayo ed sayan artikulo: talosan tan imalasakit tayo ray totoo, usaren tayo so Biblia, tan ipaarap tayoy atension ed si Jehova no manpupulong tan mangiyaaral tayo. No gawaen tayo iratan, seguradon onaligwas so dunong tayo ed panagbangat!