Pangaligan Iran Presentasyon

Pangigapoy Panangiyaral na Biblia ed Unonan Sabado na Nobyembre

“Imano yo pa iyan makapainteres ya tepet. [Basaen so unonan tepet diad beneg na Nobyembre-Disyembre ya Panag-bantayan.] Antoy nibaga yo? [Basaen so duaran parapo kayari na satan a tepet tan anggan sakey a teksto.] Labay koy ompawil dia pian pantongtongan tayo no akin ya bendisyon ed saray totoo so Panarian na Dios.”

Say Panag-bantayan Nobyembre-Disyembre

“Mitotongtong kamin magano ed saray totoo nipaakar ed sarayan salita ya walad kabkabat a pikakasi ya imbangat nen Jesus ed saray papatumbok to. [Basaen so Mateo 6:9, 10.] Wala la kasi angipaliwawa ed sikayo nipaakar ed no anto so Panarian na Dios tan no akin ya indanet itan a maong nen Jesus ed impambangat to? [Abuloyan ya onebat.] Ipapanengneng na sayan magasin no antoy ibabaga na Biblia nipaakar ed Panarian na Dios, ontan met ed arum nin marakdakep iran gawaen na satan diad dalin.”

Awake! Nobyembre

“Labay na amin so magmaliw a maliket, balet dakel so aliwan maliket natan. Parad sikayo, panon tayo kasin magmaliw a tuan maliket? [Abuloyan ya onebat.] Apaneknekan kon makatulong so Biblia pian magmaliw a maliket so bilay. Singa bilang, imano yo pa iyan prinsipyo ed Biblia. [Basaen so Hebreos 13:5.] Ipapaliwawa na sayan magasin so apatiran paraan ya base ed Biblia pian magmaliw itayon tuan maliket.”