Ondengel Pian Makaaral
1. Akin a kaukolay pansagpot ya ondengel pian makaaral ed distriton kombension?
1 Magano lay 2013 ya distriton kombension tayo. Nansagpotan ya imparaan so programa pian niiter so pankaukolan na agagi ed interon mundo. Kasin naayos mo lay eskedyul mo pian naatendian so interon taloy agew ya kombension? Lapud amayamay so onatendi, dakel so makadisturbod sikatayo. Kanian, pansagpotan ya isentroy isip tayo ed programa. Tan lapud mas andukey so sesyon nen say aral ed kongregasyon, mas kaukolan tayoy man-concentrate. Sakey ni, nayarin nakesawan tayo ed biahe tan arum ni ran bengatla. Antoy gawaen tayo pian atentibo tayon ondengel tan makaaral?—Deu. 31:12.
2. Panon tayon niparaan so puso tayo parad programa ed kombension?
2 Antis na Kombension: I-post ed Web site tayo ya www.jw.org/pag so programa ed kombension, tan kaibad satan so title na amin ya paliwawa tan sakey o duaran teksto na kada paliwawa. No walay Internet yo, sarag yon nengnengen iyan impormasyon pian niparaan yoy puso yo ed saray ipresenta. (Esd. 7:10) Diad Panagdayew na Pamilya yo, agta maabig no pantongtongan yoy programad kombension pian napaseseg kayon talaranan itan?
3. Antoy makatulong pian atentibo tayod programa?
3 Legan na Programa: No nayari, onla kayo lad CR antis ya onggapoy sesyon. Maabig no erepen yoy cell phone yo pian agnadisturbod tawag o text tan napaliisay pan-text legan na programa. No kaukolan ya aka-on so phone yo, i-silent itan pian no walay ontawag et agnadisturboy arum. No usaren yoy electronic tablet yo legay programa, seguroen ya agnadisturboy arum. Paliisan so mangan odino oninum legan na programa. (Ecl. 3:1) Onnengneng ed espiker. Anapen tan basaen iray tekston bitlaen to. Tan mannota.
4. Panon ya natulongan na atateng iray anak da ya ondengel pian makaaral?
4 Labay tayo met ya ondengel tan makaaral iray anak tayo. Oniay ibabaga na Uliran 29:15: “Say ugaw a napaulyan makapabaing ed ina to.” Kanian, marakep no sanaabay ed yurongan iray pamilya pian naseguro na atateng ya ondedengel ed programa iray anak da tan agmaniistoryaan, mante-text, o manaakar-akar. Anggano ugugaw ni ra tan agda natalosan so paliwawa, nipasal iran mandeen tan ag-onugip.
5. Akin ya makagunggona so panrepaso ed programa, tan panon tayo iyan gawaen?
5 Kayari na Programa ed Kada Agew: Agkayo manpupuyat. Masakbay kayon onugip pian makapampainawa. No repasoen yoy nadngel yo, mas natandaan yo itan. Kanian, maong no pantongtongan a magano na pamilya yo so programa kada labi. No onla kayod restawran kaibay kakaaro yo, agta maabig no awit yoy notes yo tan inabang so pigaran punton agustoan yo? Kayari na kombension, nayari yon pantongtongan ed Panagdayew na Pamilya yo no panon yon iyaplika iray impormasyon. Sarag yo met so mangiganay panaon kada simba pian nabasay pigaran parte na anggan anton balon release.
6. Kasin magenap lay basta iyatendid kombension? Ipaliwawa.
6 Agtayo nagunggonaan ed sakey a ponsia no agtayo mangan. Ontan met so nibaga tayo ed espiritual ya ponsia ya itarya ed distriton kombension. Komon ta minabang tayo diad iyatendi ed kada sesyon, diad idengel a maong, tan diad pangiyaplikad naaralan tayo.