Sakey ya Okasyon Pian Natagano ed Espiritual tan Manggayaga
1. Panon ya aasikasoen nen Jehova so espiritual a pankaukolan na saray lingkor to?
1 Maaron aasikasoen nen Jehova so espiritual a pankaukolan na saray lingkor to. Bangta maslak a totoo ed mundo et naeerasan ed espiritual, sikatayo balet so natataganon maong ed espiritual. (Isa. 65:13) Say sakey a paraan a tataganoen itayo nen Jehova ed espiritual et diad panamegley na tinaon a distrito iran kombension tayo. Kasin paparaanan yon atendian so amin a sesyon na magano lan “Igigiya na Espiritu na Dios” a Distriton Kombension? Mananam ya espiritual a tagano so nitarya.
2. Say pamplanon masakbay parad kombension so mangilalanor ed anto?
2 Manplanon Masakbay: “Saray plano na makuli et seguradon parad pankaabigan.” (Uli. 21:5, NW) Kanian, no iseguro yo la iray plano yo ya atendian so taloy agew a kombension, ag-ipapaleen so pampatanir ed amo yo no nakaukolan yoy manbakasyon. No kaukolan yoy manpundo, kasin niyuksoy la iraya? Labay yo met ya iplano so panangugto yo ta pian makapilimog kayo ed saray agagi legan na ugto diad pankombensionan. Iyuksoy so isabi diad kombension a masakbay kada agew parad pananap na panyurongan tan mibiang ed panlukas a kanta tan pikakasi.
3. Anton klase na kawes so plano tayon isulong?
3 Labay tayon seguroen a say kawes ya isulong tayo et masimpit tan mauksoy. (1 Tim. 2:9, 10) Saray distriton kombension so maabig a pankanawnawa pian makapantasi ed komunidad. Diad pamasiansia ed mapagalang ya itsura legan a walad pankokombensionan tan diad pangisulong tayo ed saray badge card, nibiig itayo na saray makakaimaton manlapud saray agmananisia tan paborabli so impresyon da.
4. Anto so ontulong ed sikatayo tan ed saray kapamilyaan tayo pian minabang a maong ed programa?
4 Ondengel a Maong: Seguradon agtayo labay a nasaew so anggan samet ya akataryan daakan ya espiritual a tagano! (Uli. 22:17, 18) No itumbok tayoy Biblia tayo legan a babasaen iray teksto tan mangala na antikey a nota, ontulong itan ed sikayon nisentroy nonot ed programa tan napaliisan so pakadisturbo. Insan diad labi, nausar tayo iray nota tayo pian itongtong ed arum iray nipabitar ed programa. Diad agano niran taon et naobserbaan a walaray kalangweran a manaabay diad kombension tan mantotongtong odino manti-text legan na programa. No walay ananak tayo, pati saray tin-edyer, makagunggona no wala ra ed abay tayo tan ondengel ed programa bilang pamilya imbes ya abuloyan iran onyurong ed abay na arum a kalangweran.
5. Panon tayon lalon naliketan diad kombension?
5 Panliketan so Pantutuyaw: Say mananam a tagano so lalon makapaliket no pandudungoan itan kaiba iray kaaro. (Uli. 15:17) Mipadpara, lalon panliketan tayoy kombension lapud pililimog ed saray agagi tayo. Kanian, legan ya anggapo ni sesyon, maabig no ikabat tayoy inkasikatayo ed saray inmatendi pian panggayagaan so pantutuyaw! (Sal. 133:1) Sano imbaga na tsirman ya onyurong tayo la antis ya onggapoy musika, nepeg tayo lan sampotan so tongtongan tan onyurong la parad igapo na programa.
6. Mangisalaysay na personal ya eksperiensya a mangipapanengneng no panon itayon makapantasi ed totoo ed pankombensionan.
6 Anamoten so Amin a Pankanawnawan Mantasi: Saray kombension so kaslakan a mangiter na maabig iran pankanawnawa pian makapantasi itayo. Dakel ya onaatendi ed kombension a mamangan ed saray restawran kayari programa so tetepetan na saray managserbi tan arum nira nipaakar ed tema a nanengneng da ed badge card. Saya so nanresulta ed maabig a pantasi ed katuaan. Arum a tinmepet so naimbitaan ed sesyon na kombension tan inmatendi ira.
7. Akin a nepeg itayon onatendi ed magano lan distriton kombension?
7 Nilibon oras so nauusar ed pangiparaan ed programa, pangiyuksoy ed saray pasilidad, pangorganisa ed saray departamento ed kombension, tan pangiparaan ed saray paliwawa. Amin a maaron sagpot ya indeboto ed pangiparaan ed sayan espiritual a piesta so pakapatnagan na panangiyansakit nen Jehova ed totoo to. Komon ta amin tayo so presente tan maliket ya onasol na kakabatan! Diad panggawa tayo ed satan, “mankanta [itayo] naani a nisengeg ed liket na puso.”—Isa. 65:14.
[Kahon ed pahina 5]
Saray Panonot ed Distriton Kombension
◼ Oras na Programa: Onggapo so programa ed alas 8:20 na kabuasan ed Biernes tan Sabado, tan alas 8:50 na kabuasan no Simba. Sano onggapo lay musika, nepeg ya amin tayo so onyurong la pian nigapo so programa ed mauksoy a paraan. No Biernes tan Sabado, manampot so programa ed alas 3:55 na ngarem, tan alas 4:00 na ngarem no Simba.
◼ Paradaan: Diad amin a pankombensionan a walay mauksoy a paradaan, agmanrereserba. Saray badge card na kombension so onkanan ID parad pamparada.
◼ Pangireserba na Yurongan: Saray yurongan so nayarin ireserba labat ed saramay kaiba yon nambiahe odino diad saramay kaiba yo ed abung.
◼ Panangugto: Ipangasin mangawit kayo lay pangugtoan imbes ya ompaway ni pian manaliw legan na panangugto. Nayarin usaren so melag a pananginan ya iyabay diad salian. Saray angkakabaleg a pananginan, nabetag a kargaan, tan de-alkohol ya iinumen so agnaabuloyan ed pasilidad na kombension.
◼ Saray Donasyon: Nipatnag tayoy apresasyon tayo diad pangiter na boluntaryo iran kontribusyon parad sankamundoan a kimey diad Kingdom Hall odino diad pankombensionan. Dinanman iran tseke ya idonasyon diad kombension so nepeg ya ingaran ed “Watch Tower.”
◼ Saray Aksidente tan Emerhensia: No walaray emerhensia diad pankombensionan, ipangasin asinggeran so attendant, a mangipakabat a tampol ed First Aid ta pian saray kualipikado ed satan a departamento so makapandesidi ed inkagrabe na kipapasen tan mangiter na tulong. No nakaukolan, satan a departamento so ontawag ed asingger ya hospital.
◼ Panagrekord: Antokaman a kagawaan a panagrekord so agnepeg ya ikonekta ed sound system odino elektrisidad na pasilidad, tan usaren labat iratan no agmakadisturbo ed arum.
◼ Panlitrato: No manlitrato kayo legan na saray sesyon, ipangasin agyo uusaran na flash.
◼ Saray cellphone: Nepeg ya ag-iraya makadisturbo legan na saray sesyon na kombension.
◼ Saray Follow-Up Form: Nepeg ya usaren so Please Follow Up form (S-43) a pangisulatan na impormasyon nipaakar ed siopaman a nagmaliw ya interesado lapud impormal ya impantasi tayo legan na kombension. Saray manangipalapag so nepeg a mangawit na sakey odino duaran follow-up form diad kombension. Saray asulatan a form so nayarin isubmite ed Book Room a mangasikaso ed satan odino iter itan ed sekretaryo na kongregasyon yo no onsempet kayo.—Nengnengen so Pebrero 2005 a Ministeryo Tayo ed Panarian, p. 6.
◼ Saray Restawran: Igalang so ngaran nen Jehova diad maabig a kondukta yo diad saray restawran. Diad dakel a pasen, kustombre so pangiter na 10 porsiento a tip, depende ed serbisyo.
◼ Saray Badge Card: Ipangasin ipeket so badge card legan a walad kombension tan sano manbiabiahe a paonla tan pasempet ed pankombensionan. Saray badge card so naala labat ed kongregasyon yo. Agyo ipapaleen so pangala na saray badge card parad sikayo tan ed pamilya yo
◼ Bautismo: Saray kandidato ed bautismo so nepeg ya onyurong ed saray yurongan a nigana parad sikara antis ya onggapo so programa na kombension ed Sabado na kabuasan. Balang sakey so mangawit na matukoy a pampabasa tan tuwalya. Pian naseguron saramay nabautismoan et mansulong na matukoy parad ontan ya okasyon, saya so itongtong ed sikara na saray mamatatken a mangirepaso ed saray tepet ed libron Organisado.