Eskedyul ed Balon Pantitipon na Kongregasyon
1, 2. Antoran pananguman ed saray pantitipon so nagawa kagapoy Enero 2009?
1 Nadngel na amin a kongregasyon ed sankamundoan so makapaliket ya anunsio legan na simba na Abril 21-27, 2008. “Onggapo ed Enero 1, 2009, say Panagaral na Kongregasyon ed Libro so ikasakey la ed Teokratikon Eskuelaan Parad Ministeryo tan Pantitipon Parad Panagserbi. Say tawag a Panagaral na Kongregasyon ed Libro et salatan lay Panagaral na Kongregasyon ed Biblia.”
2 Eskedyul Parad Sayan Sinimban Pantitipon: Say dagup na oras parad sayan pantitipon, laktip lay kanta tan pikakasi, et 1 oras tan 45 a minuto. Igapo so pantitipon panamegley na kanta tan pikakasi (5 min.), tumbokan na Panagaral na Kongregasyon ed Biblia (25 min.). Say Teokratikon Eskuelaan Parad Ministeryo (30 min.) so itumbok a tampol. Insan, sakey a kanta (5 min.) pian iparungtal so Pantitipon Parad Panagserbi (35 min.). Sampotan so pantitipon ed kanta tan pikakasi (5 min.). Pian tulongan kayon manparaan parad sarayan pantitipon, say eskedyul parad Panagaral na Kongregasyon ed Biblia, say Teokratikon Eskuelaan Parad Ministeryo, tan say Pantitipon Parad Panagserbi so ipalapag a binulan ed Ministeryo Tayo ed Panarian.
3. Panon ya ikondukta so Panagaral na Kongregasyon ed Biblia?
3 Panagaral na Kongregasyon ed Biblia: Sayan pantitipon so ipara’d Panagaral na Panag-Bantayan. Agla kaukolan ya igapo ed panrepaso ed imbeneg ya impanaral. Imbes, antikey labat so introduksion na saya, pian walay magenap ya oras a makapankomento na antikey iray amin ya inmatendi. Say mangidadaulon manangasikaso so mangiasain ed saray mamatatken a mansublayan a mangikondukta ed sayan pantitipon, mansasalat kada simba.
4. Panon a pinatikeyan so Pantitipon Parad Panagserbi?
4 Pantitipon Parad Panagserbi: Say Pantitipon Parad Panagserbi so pareho ni balet apatikeyan iray parte. Saray anunsio so kaslakan a 5 minuto. Magenap iya parad nipanpanaon a makana iran pakabat tan arum a sulat manlapud sangan opisina. Saray rotina lan pakabat, a singa saray uksoyan ed lawak na serbisyo, panaglinis, saray report na kuenta, tan saray rotina lan sulat manlapud sangan opisina et agla kaukolan ya ibasa, balet ipaskil iratan ed information board pian nabasa na saray agagi. Saramay apabtangan na saray parte ed programa so manparaan a maong tan tumboken a maapit so niganan oras tan saray niiter ya instruksion.
5. Legay bisita na manangasikaso na sirkito, anto so eskedyul ed pantitipon na kongregasyon?
5 Bisita na Manangasikaso na Sirkito: Say sinimban eskedyul na manangasikaso na sirkito so agnauman. Diad Martes, ikondukta so Teokratikon Eskuelaan Parad Ministeryo tan Pantitipon Parad Panagserbi a tumbokan na sakey a kanta. Insan onggapo so 30 minuto a paliwawa na manangasikaso na sirkito. Singa dati lan gagawaen legan na simba na bisita to, sananey nin labi so nigana parad Panagaral na Kongregasyon ed Biblia a tumbokan na sakey a kanta tan say paliwawa na manangasikaso na sirkito parad serbisyo. Sampotan so pantitipon panamegley na kanta tan pikakasi.
6. Anto so betang na manangasikaso na grupo?
6 Saray Pantitipon Parad Lawak na Serbisyo: Saray manangasikaso na grupo so iyasain na ulop na mamatatken a mangasikaso ed saray grupo parad lawak na serbisyo tan manpastol ed saray indibidual a manugyop ed grupo. Sano say ministeryal a lingkor so kaukolan a pabtangan, say tawag ed sikato et “lingkor ed grupo.”
7. Anto so ilaloan tayo ed balon eskedyul na pantitipon na kongregasyon?
7 Natalosan ed nibinsabinsa, a pankanawnawa tayon panliketan so makaibangat tan makapabiskeg ya impormasyon ya ontulong ed sikatayon nawalaan na malet a relasyon ed si Jehova. Ontulong iya ed sikatayo pian magmaliw ya epektibon managpulong tan managbangat, nipasal parad mas mabungan ministeryo.—Efe. 4:13, 14; 2 Tim. 3:17.
8. Panon a makagunggona ed sikatayo tan ed arum so masakbay a pamparaan?
8 Say pangiparaan ed sarayan pantitipon so ontulong ed sikatayo pian niyapasakey a malinew ed kanonotan tayo iray manunan punto a nidadanet legan na kada pantitipon. Walaan itayo na pankanawnawan mibiang ed pankomento pian makapanpapasesegan. (Roma 1:11, 12; Heb. 10:24) Say gagala tayo et pian ‘nipatnag so ibobona tayo’ diad ‘pangagamil ed matunong a salita.’—1 Tim. 4:15; 2 Tim. 2:15.
9. Anto so determinasyon tayo, tan akin?
9 Panliketan tayo iyan makatantandan pananguman ed saray pantitipon na kongregasyon. Komon ta amin tayo so mantultuloy a mangusar ed panangiwanwan ya itatarya na “matoor tan makabat ya aripen” tan mansiansian maapit ed Baleg a Managpastol tayo legan to itayon ipaparaan ed “baleg ya irap” ya asingsingger la.—Mat. 24:21, 45; Heb. 13:20, 21; Apo. 7:14.