Mantetepet Kayo Kasi No Wala ni Labay Toy Paiyaralan?
No peles a mangikokondukta kayo na panangiyaral na Biblia, akin ya agyo tepetan so iyaaralan no walaray kakaaro, kakanayon, odino kabkabat to a malabay met a makaaral ed ibabangat na Biblia? Mabetbet et walay salambiten ton pigaran kangaranan. Nayarin ipatanir yon bitlaen so ngaran to sano ombisita kayo ed saratan ya indibidual pian opresian na panangiyaral na Biblia. Nayarin ikuan yo, “Si [ngaran na iyaaralan] et panliliketan toy panaaral na Biblia, tan inisip to met a nayarin labay yo met so nagunggonaan ed programa a libren panagaral na Biblia.” Insan antikey ya idemostra no panon ya ikondukta so panagaral, ya usaren so libron Ibabangat na Biblia.
No walay iyaaralan yo ya onaaligwas a maong, nayarin pasesegen yon itongtong toy uksoyan ed panagaral ed saray kakaaro tan kapamilyaan to a nayarin interesado. Nayarian to iran imbitaan ed panagaral. Odino no aliwa itan a kombeniente, nayarian ton iyuksoy a nakabat yo ira pian idemostra so uksoyan na panagaral. Say panggawa ed saya so mamaseseg ed iyaaralan ya onggapon manginabang ed arum na nakakabatan to ed Biblia.
Saramay regular yon papawilen so nayarin mangiter met ed sikayo na saray posiblin niyaralan, anggano sikaran mismo et agni angawat ed regular a panangiyaral ed Biblia. Sano opresian yo ira na sakey a kopya na libron Ibabangat na Biblia, nayarin itepet yo, “Wala tay kabat yon malabay met na sakey a kopya na sayan publikasyon?”
Lapud inkaganatan na panaon, labay tayon usaren so amin a posiblin paraan pian tulongan so totoon makarengel tan mangawat ed maong a balita. Mantetepet kayo kasi no wala ni labay toy paiyaralan?