Ipatnag so Personal ya Interes—Diad Pantepet tan Pandengel
1 Labalabay na maslak a totoo so mangibalikas ed panmoria ra balet agda labay so nasermonan odino naupapet. Kanian, bilang Kristianon ministros, kaukolan tayon aralen so dunong ed pangamta ed panmoria na totoo diad panamegley na pantepet.—Uli. 20:5.
2 Nepeg a makasagyat iray tepet tayo, aliwan makapadismaya. Sanen manpupulong ed kabkaabungan, intepet na sakey ya agin laki, “Diad padesir yo, onsabi ni kasi panaon a saray totoo et tratoen day sakey tan sakey tekep na dignidad tan respeto?” Depende ed ebat, insan to patumbokan, “Anto so padesir yon nakaukolan pian nagawaan iya ey?” odino “Akin ya ontan so panmoria yo ey?” Sano mantatasi ed impormal a paraan tan ed publiko iran pasen, sananey nin agin laki so mantetepet ed saramay walaan na ananak, “Anto met ey so panliliketan yon maong bilang ateng?” Insan to itepet, “Anto met so kapapagaan yon maong ey?” Imanoen a sarayan tepet so mangiyabuloy ed totoo a mangibalikas ed panmoria ra, ya ag-ira nabaingan. Lapud nanduruma iray sirkumstansya, ompan kaukolan tayon umanen so tema tan paraan na panagtepet tayo pian ontukoy ed saray walad teritorya tayo.
3 Amtaen so Panmoria na Totoo: No mabulos iray totoo a manginabang na saray opinyon da, anosan iran dengelen ya ag-onsasalet no agmet nakaukolan. (Sant. 1:19) Mapangasin apresyaen iray komento ra. (Col. 4:6) Nayarin ikuan yo: “Makapainteres itan. Salamat ed komento yo.” Komendaan ira no nagawaan yo itan ed masimoon a paraan. Mangitepet na kaaruman ni pian naamtaan no antoy panmoria ra tan no akin ya ontan so liknaan da. Anapen so pakapanpaknaan yon dua. Sano labay yon ipaimano ed sikara so sakey a teksto, nayari yon ibaga, “Kasin inisip yo la iya bilang posibilidad?” Paliisan so pagmaliw a dogmatiko odino maargumento.—2 Tim. 2:24, 25.
4 Say ebat na arum ed saray tepet tayo so nayarin mandependin tuloy ed no panon so kadedengel tayo. Natebek na saray totoo no kasin impapuso itayon ondedengel. Inkuan na sakey ya ombiabiahen manangasikaso: “Sano ipatnag yoy maanos ya inkamabulos yon ondengel ed totoo, makapasagyat itan a tuloy tan alay abig a panangipatnag na masimoon a personal ya interes.” Say idengel ed arum so mangiter ed sikara na dignidad, tan mamakiwas itan ed sikaran ondengel ed maong a balita a panggugunaetan tayon inabang.—Roma 12:10.