Agamilen so Salita na Dios a Duga
1 Sanen manpupulong ed sakey ya opisyal, “si Felipe bineswa’to so sangi to, et bangnen impalapu to ed saya a sulat, impulong to ed sikato si Jesus.” (Gawa 8:35) ‘Inagamil [nen Felipe] ed matunong so salita a tua.’ (2 Tim. 2:15) Natan, balet, naiimano na saray managbiahen manangasikaso a dakel a manangipalapag so mataltalag a manguusar ed Biblia sano manpupulong. Kasin uusaren moy Biblia ed ministeryom?
2 Say Salita na Dios so lapuan na amin a bengatlan sisiaen tan ibabangat tayo. (2 Tim. 3:16, 17) Satan so mamapaapit ed totoo ed si Jehova tan mangibabangat ed sikara parad bilay. Satan so rason no akin ya importantin usaren tayo so Biblia ed ministeryo tayo imbes ya itongtong labat iray teman makapainteres ed sikatayo. (Heb. 4:12) Lapud dagdaiset so amta na maslak a totoo nipaakar ed Biblia, kaukolan tayon ibasa manlapud satan pian nipanengneng ed sikara so praktikal a giya ya iyoopresi na satan tan say arapen ya ipaparungtal na satan parad katooan.
3 Direktan Ibasa Manlapud Biblia: Nayarin salien moy manpulong ya agmangawit na makargan bag. Nayarin ikargam ed sakey a porpolyo so opresin literatura a labay mon ipalima tan egnaan odino ibulsam so Biblia. Insan, sano mitotongtong ka la ed sakey a too, nayarian mon ipaway so Biblia ya agliknaen na too a kakalaran mo. Iyampar moy inkasika ed ondedengel pian natumbok to ed Bibliam. Nayarin ipabasam a maksil ed sikato so sakey a bersikulo. Mas nipaslep ed sikato sano nanengneng to so ibabaga na Biblia imbes a narengel to labat itan ed sika. Siempre, pian sikatoy natulongan a natalosan so punto na teksto, idanet iray salitan mangipapasabi na punto.
4 Sakey a Tekston Presentasyon: Kayarim ya ikabat so inkasika, nayarin ikuan mo: “Saray totoo so maniilalo ed nanduruman lapuan parad panangiwanwan ed kabibilay da. Anto so isipen yon sankaabigan a lapuan na praktikal a giya? [Abuloyan ya onebat.] Anto so nikuan yo ed sayan balikas? [Basaen so Uliran 2:6, 7, tan abuloyan ya onebat.] Say kakabatan na too so apaneknekan lan makisir a tuloy, a mangipapaarap ed dakel a totoo ed kaandi-ilalo. Balet, say kakabatan na Dios so lawas a napapaneknekan a napanmatalkan tan makagunggona.” Insan ipanengneng so publikasyon ya ipaparungtal mo, tan ipabitar manlapu ditan so sakey ya alimbawa na praktikal a kakabatan na Dios.
5 Inusar nen Jesus so Kasulatan pian tulongan iray matuan-impanpuso. (Luc. 24:32) Pinaneknekan nen Pablo unong ed Kasulatan iray bengatlan imbangat to. (Gawa 17:2, 3) Ompalalo so kompiyansa tan gayaga tayo ed ministeryo diad pagmamaliw tayon lalon marunong ed pangagamil na Salitay Dios a duga.