Say Teokratikon Eskuelaan Parad Ministeryo ed Taon 2002
1 Say abilidad ed panagsalita so ibabaliwala na maslak a totoo. Anggaman ontan, say panagsalita so regalon nanlapud si Jehova. Satan so mangiyaabuloy ed sikatayo pian mitalosan ed arum tan pian ibalikas so kanonotan tan liknaan tayo. Manuna ed amin, diad panamegley na satan et nidayew tayoy Dios tayo.—Sal. 22:22; 1 Cor. 1:4-7.
2 Saray lalaki, bibii, tan ugugaw so nipapasal ed Teokratikon Eskuelaan Parad Ministeryo pian iyabawag so ngaran nen Jehova. (Sal. 148:12, 13) Say programa ed eskuelaan parad taon 2002 so mangokobre ed malaknab iran tema na Biblia a pakagunggonaan tayon personal tan nausar tayo ed ministeryo. Diad pamparaan para ed eskuelaan tan pibiang ed satan et napaaligwas tayoy pikakabat tayo tan saray dunong tayo bilang managbangat na Salitay Dios.—Sal. 45:1.
3 Basaen so Biblia ya Inagew-agew: No akatarya lawas so Biblia, naanamot tayo so antokaman a libren oras tayo pian basaen itan. Maslak ed sikatayo so walaan na pigaran libren minuto legan na sanagew a nayarian tayon usaren ed onian paraan. Agaylan makagunggona so pambasa ed satan anggan sakey labat a pahina kada agew, a magenap la itan ed pakapibansag ed nidatak ya eskedyul na eskuelaan parad programan panagbasa ed Biblia!—Sal. 1:1-3.
4 Say abilidad a maabig a panagbasa ed Biblia so makatulong ed sikatayon nasabi so kapusoan na saray ondedengel ed sikatayo tan napakiwas iran mandayew ed si Jehova. Saray estudyanten akanbetang ed Asainmin Nu. 2 ed eskuelaan so kaukolan a manpasal, manpasal, manpasal ed panagbasa a maksil ed asainmin. Say manangasikaso na eskuelaan so mangiter na komendasyon tan saray suhestion pian napaaligwas so panagbasa.
5 Usaren so Libron Reasoning: Saray Asainmin Nu. 3 tan Nu. 4 so nibase ed libron Reasoning. Maslak ed sikatayo so manggunaet ed pangusar a nagkalalo ed sayan praktikal a katulongan ed lawak na ministeryo. Saray agagin bibii so nepeg a manpili na saray eksena a praktikal parad teritorya. Nepeg a nagkalautlan imanoen na manangasikaso na eskuelaan no panon so panbangat da tan pangusar da ed Kasulatan.
6 Komon ta say Teokratikon Eskuelaan Parad Ministeryo so ontulong ed sikatayon amin a mantultuloy a mangusar ed inter na Dios a regalon panagsalita pian iyabawag so maong a balita tan pian idayew so matalonggaring a Dios tayo, si Jehova!—Sal. 34:1; Efe. 6:19.