“Agmanganggay Liket Ko Lapud Wala Ak ed Nikawanan Mo”

Unong ed Salaysay nen Lois Didur

Aminpigam lan imbagad sarilim ya, ‘Komon ta aliwan saman so pinilik’? Diad loob na 50 taon ya sigpot-panaon a panlilingkor kod si Jehova, anggapoy nanonotan kon makapuy a resulta na pansiansiad nikawanan to. Ibagak ed sikayo no akin.

NIANAK ak nen 1939 tan binmaleg ak ed baryo na Saskatchewan, Canada a kaibay limaran agagik. Malikeliket so bilay ed kaumaan. Sakey ya agew, wala ray Tasi nen Jehova ya linmad abung mi. Legan dan kakatongtongey tatay ko, tinepet kod sikara no kasin walay ngaran na Dios. Impanengneng dad sikami so ngaran a Jehova diad Salmo 83:18. Lapud satan mas lalon pinilalek kon nakabat so Dios tan naamtaay Salita to.

Diad saraman a panaon, saksakey labat a kuarto so paneeskuelaan na saray ugugaw ed baryo anggad first year haiskul. Onlulugan irad kabayo odino manaakar iray pigaran kilometro pian makasabi rad eskuelaan. Iiter na saray pamilya ed lugar mi so materyal a pankaukolan na saray maestro odino maestra. Asabi panaon et betang la na pamilya min asikasoen so balon maestro, si John Didur.

Agko inilaloan a sayan laki et walaan met na masimoon ya interes ed Salita na Dios. Aminsan et panbilbiliban kon maong so komunismo tan sosyalismo a susuportaan nen tatay ko, balet oniay imbaga nen John: “Anggapoy kanepegan na toon uleyan so kapara to. Say Dios labat so makankanepegan ed satan.” Gapoan labat itan na dakel ni ran makapainteres a tongtongan mi.

Lapud ta nianak si John nen 1931, alikna toy irap na guerra. Sanen ginmapoy guerra ed Korea nen 1950, tinetepetan toy nanduruman lider na relihyon nipaakar ed pibibiang da. Inkuan dan amin a nayarin mibiang iray Kristiano ed guerra. Ontan met so intepet tod saray Tasi nen Jehova. Bilang ebat, impanengneng dad sikato so Makasulatan a talindeg na saray Kristiano nensaman nipaakar ed guerra. Abautismoan si John nen 1955 tan diad tinmumbok a taon et abautismoan ak met. Labay min usarey bilay tan biskeg min manlingkor ed si Jehova. (Sal. 37:3, 4) Tan sanen Hulyo 1957, nankasal kami nen John.

Mabetbet ya ombabanad kombension so anibersaryoy kasal mi. Anggaman ontan, maliket kami ta kaiba mi ray nilibon agagi ya manrerespeto ed uksoyan na panangasawa. Say sankaunaan ya naatendian min internasyonal a kombension et sanen 1958. Limara kamin nanlapud Saskatchewan ya akakotsen paonlad New York. Diad agew so panbiabiahe mi tan diad labi et nauugip kamid tent. Ginawa mi iyad loob na sakey simba. Imadyin yo pa labat so impakabigla mi sanen walay agin akabat mid Bethlehem, Pennsylvania ya anangkaili ed sikamin sanlabi ed abung to! Lapud kaabigan to et akasabi kamid New York City a malinis tan maayos. Impurek na satan a kombension ed sikami so nikadkaduman liket a nagamoran diad panlingkor ed si Jehova! Mipara itan ed samay insulat na salmistan, “agmanganggay liket ko lapud wala ak ed nikawanan mo.”​—Sal. 16:11.

IMPANPAYUNIR

Nen 1959, payunir kami la tan manaayam kamid melag a trailer diad niyatagey a pasen na kaumaan diad Saskatchewan. Sankabantag ditan iray ararawin lugar tan arum ed saratan et teritorya mi.

Sakey ya agew, akaawat kami na sulat manlapud sangan opisina. Inawit kon tampol itan ed si John a manaapiger na tractor. Sikami iimbitaan a man-espisyal payunir diad Red Lake, Ontario. Lapud agmi kabisado itan a pasen, angala kamin tampol na mapa pian naamtaan no iner itan.

Baleg so pidumaan na satan ed lugar a nanlapuan mi! Natan et onla kamid maawaawang a katakelan tan wala ray angkelag a baley ya asingger ed minaay balitok. Kasabi mi diman, nadngel na sakey ya ugaw a bii so pitotongtong mid kaabay da no kasin walay bakantin lugar a napanayaman. Imbaga ton tampol itan ed si nanay to, ya angiyopresin ontuloy kamid sikara diad saman a labi. Say naugipan mi et diad bodega ra. Kaimbuasan to, akalmo kami na napanayaman mi. Walaan iya na duaran kuarto, balet ta anggapoy gripo tan kagawaan na satan. Say alenleneg labat a wadtan et sakey ya heater a tutungoay kiew. Akasaliw kami na pigaran segundamanon kagawaan tan nankontentoan mi la iratan.

Say sankaasinggeran a kongregasyon et 209 kilometro ni so kawalaan to. Dakel ed saray minero et nanlapud Europa, tan labay day nawalaan na Biblia ed dilin lenguahe ra. Agnambayag et 30 lay iyaaralan mi, tan diad loob labat na anem bulan et niletneg so melag a kongregasyon.

Say asawa na sakey ed saray iyaaralan mi et tinawagan toy pari ra pian patulongan a mangipaliwawad si misis ton say ibabangat mi et aliwa. Sanen akapantotongtong kami, inkuan na pari a say manuna kunon ibangat mi et say Trinidad. Inala na iyaaralan mi so Katolikon Biblia ra tan kinerew ton paneknekan na pari so ibabaga to. Imbasig na pari so Biblia ed lamisaan tan inkuan ton anggapoy nepeg ton paneknekan. Legan ton onaalis et inkuan tod salitan Ukrainian a papawayen da kami tan agda kami lan balot papapawilen. Ingen ta agto amtan makatalos si John na salitan Ukrainian!

Agnambayag, tinaynan mi so Red Lake ta kaukolan a nipasal si John pian magmaliw ya manangasikaso na sirkito. Ingen kayari na manga sakey taon, si John so angiter na paliwawa parad bautismo ed sakey a kombension. Agaylay liket mi sanen naamtaan min sakey ed saray kandidato imay asawa na datin iyaaralan mi. Samay naimatonan ton ginawa na pari so amakiwas ed sikaton usisaey Biblia.

OKUPADO ED PANAGBIAHEN KIMEY

Diad panagbiahen kimey, makapalikliket so pankanawnawan makapiayam ed saray nanduruman agagi. Inmapit so liknaan mid sikara ta pinarawes da kami tan impasen da kamin kabiangay pamilya ra. Aminsan, say nanpundoan mi et diad second floor na sakey ya abung, tan anggapoy heater na satan. Diad palbangon et nalikas min kalkalnan onloob ed kuarto mi so maedad lan sister pian selselay melag ya stove. Kapawil to et wala lay awit ton palanggana tan lamaw ya usaren mi. Dakel so naaralan kod sayan mauyamon sister.

Tinmulong ed siak so panagbiahen kimey pian mas lalon onapit ed si Jehova. Kabiangan ed sirkito na Alberta so sakey a baley na minaan diad Far North, a ditan et walay saksakey ya agin bii. Panon ya momoriaen na organisasyon nen Jehova iyan agin bii a walad nisulinek a pasen? Kada anem bulan et mani-eroplano kami pian sikatoy nabisita. Manaaral tan manpupulong kamin talo, a singa ed gagawaen mi diad saray kongregasyon a walad syudad. Maabig iyan panonot ed maaron panangasikaso nen Jehova ed balang karnero to.

Misusulatan kamid saray agagin pipupundoan mi. Nausa-usar ko imay sankaunaan a regalo nen John ed siak​—sakey a balibalin kahon a napnoy papel, tan panamegley na saya et malikeliket kamin mikokomustaan ed saray kakaaro mi. Anggad natan et mausa-usar nin siansia itan ed siak.

Legan kamin ombibisitad sakey a sirkito diad Toronto, akaawat kami na tawag manlapud sakey a brother diad Canada Bethel a mantetepet no kasin labay mi manlingkor ed Bethel. Kapigan to labay a naamtaan so ebat mi? “No nayari et nabuas la!” Inawat mi itan ya imbitasyon.

IMPANLINGKOR ED BETHEL

Diad kada balon asainmin et nalilikna mi nanduruman aspekto na liket a manlalapud si Jehova. Nantultuloy itan sanen linma kamid Bethel nen 1977. Diad impakapiulop mid saray arum ya alanaan, anengneng mi ray nanduruman personalidad da ontan met ed masimoon a respeto rad Salita na Dios.

Agustoan mi balon rotina mid Bethel. Singa bilang, saray kawes mi a datin walad maleta et aka-kabinet la natan, tan wala lay permanentin kongregasyon mi. Likud ed niasain ya trabahok, panliliketan koy pangi-tour ed saray agagi. Ipapaliwawak iray trabahod Bethel, eebatan ko ray tepet da, tan naliliketan ak ed saray komento ra.

Maples a linmabas iray taon, tan nen 1997, naimbitaan si John a manaral ed School for Branch Committee Members diad Patterson, New York. Kayari na satan et tinepetan da kami no labay mi manlingkor ed Ukraine. Pinaseseg da kamin ipikasi tan nonoten itan a maong. Diad saman lanlamang a labi, segurado kamin say ebat mi et on.

BALON ASAINMIN​—UKRAINE

Inmatendi kamid internasyonal a kombension diad St. Petersburg, Russia nen 1992, tan diad Kiev, Ukraine nen 1993. Saratan a kombension so amaapit na liknaan mid saray agagi tayod Eastern Europe. Say panayaman mid Lviv, Ukraine et diad second floor na daan ya abung. Sankabantag ed bintana so sakey a sular ya walaan na melag a hardin, baleg ya ambalangan lalong, tan dakel a nganak. Kanian singa ak walad Saskatchewan. Labindua kamin manaayam ed satan ya abung, tan inagew-agew min nadadalanay syudad paonlad Bethel.

Antoy epektod sikami na inyakar mid Ukraine? Apaseseg kamid impiulop ed saray agagin nansiansian matoor anggaman apasegsegang, asebelan, tan apriso ira. No kokomendaan mi ra, say ibabaga ra et “Ginawa mi iman parad si Jehova.” Agdan balot aliknan sikaray pinaulyan To. Anggad natan, no pisalamatan moy kaabigan a ginawa ra, say iyebat da et “Say pisalamatan mo et si Jehova,” lapud amta ran sikatoy Lapuan na amin a maabig a bengatla.

Diad Ukraine, dakel iray agagin manaakar paonlad miting, kanian walay panaon dan mantotongtong tan manpapasesegan. Manga sakey oras odino onsulok ni so panaakar da. Masulok a 50 so kongregasyon diad Lviv, tan 21 ed saratan so manguusar ed baleg ya Kingdom Hall complex. Kada Simba, balibalin nengnengen so mauksoy ya panaakar na saray agagin miaral.

Tampol a linmemew so liknaan mid sarayan mauyamo tan maasikason agagi. No naiirapan ak ya talosay lenguahe ra, ya diad tua et angga nid natan, maan-anos da ak ya tutulongan. Ipapatnag na saray mata ran labalabay da ak ya ibangat.

Nanengneng met so peteg a panagmatalek na saray agagi ed balang sakey. Say alimbawa na satan et samay agawad internasyonal a kombension diad Kiev nen 2003. Kakkaepas mi ni labat ed saman diad tren. Kabebekta, walay ugaw a biin inmasingger ed sikami tan imbaga ton, “Nababalang ak. Agko amtay kawalaan nen baik.” Anengneng to ray badge card mi tan amta ton Tasi kami. Makmakpel iyan ugaw tan ag-inmakis. Sikatoy inyakar na asaway manangasikaso na sirkito ed Lost and Found Department diad istadyum. Ag-abayag et nannengnengan lanlamang iran sanbai. Pandinayewan koy talek na sayan ugaw a bii.

Nen May 2001, dakel ya agagin nanlapud nanduruman bansa so linmad Ukraine pian onatendid dedikasyon na balon pasilidad na sangan opisina. Diad Simba na kabuasan kayari na espisyal a paliwawad istadyum, nanakar so agaylay karakel ya agagi paonlad Bethel pian man-tour. Agnalinglingwanan iman ya agawa! Makapalikliket a nanengneng iray agagin marendeen tan mauk-uksoy. Lalon naapresyak so liket a resultay panaglingkor ed si Jehova.

BALEG A PANANGUMAN

Makapaermen ta nen 2004 et a-diagnose a walay kanser nen John. Linma kamid Canada pian manpa-doktor. Ngalngali agnasarag na laman toy unonan sesyon na chemotherapy, tan pigay simban inasikasod intensive care unit. Maong labat ta pinmawil so liknaan to. Anggaman naiirapan ya mansalita, sankapatnagan ed saray mata toy pisasalamat ed saramay binmisita.

Balet agla inmabig si John tan sikatoy inatey nen Nobyembre 27, 2004. Singa walay balbaleg a kabiangay bilay kon naandi. Nanliketan mi nen John so impanlingkor mid si Jehova. Anto lay gawaen ko ey? Nandesisyon ak ya ompawil ed Ukraine. Talagan misalsalamat ak ed panangaro na pamilyan Bethel tan na saray kakongregasyon ko.

Agmin balot nagbabawian iray ginawa min desisyon. Nibagak ya talagan maliket so bilay mi tan sankaabigan iray akaulop mi. Amtak ya dakel ni naaralan ko nipaakar ed kaabigan nen Jehova, tan pirawat koy manserbid sikato ed andi-anggaan lapud nalmok so tuan ‘liket ta wala ak ed nikawanan nen Jehova.’

[Blurb ed pahina 6]

“Agmin balot nagbabawian iray ginawa min desisyon”

[Litrato ed pahina 3]

Sanen kasal mi

[Litrato ed pahina 4]

Nen espisyal payunir ak ed Red Lake, Ontario

[Litrato ed pahina 5]

Kaibak si John diad Ukraine nen 2002