Panulong ed Arum a Makaaral ed Saray Kakaukolanen na Dios
“Say kapilitan so amasoot ed siak. Et abagey ak la no agko ipulong so ebanghelyo.”—1 CORINTO 9:16.
1, 2. (a) Diad anton nankaduan kimey so kakaukolanen nen Jehova a pibiangan tayo? (b) Anto so nepeg a naaralan na matuan-impanpuson totoo ta pian magmaliw a sakop na Panarian na Dios?
WALAAN si Jehova na maong a balita parad katooan. Sikatoy walaan na Panarian, tan labay ton narengelan itan na totoo ed amin a pasen! Diad bektan naaral tayo so maong a balita, kakaukolanen na Dios ya inabang tayo itan ed arum. Saya so nankaduan kimey. Unona, nepeg tayon iproklama so maong a balita na Panarian na Dios. Diad propesiya to nipaakar ed “anggaan na sistema na bengabengatla,” inkuan nen Jesus: “Saya ya ebanghelyo na panarian nipulong naani ed sankamundoan ya onkanan pamintuaan ed saray amin a nasyones; et saman la onsabi angaan.”—Mateo 24:3, 14.
2 Say komaduan aspeto ed sayan kimey et sasaglawien toy panbangat ed saraman so onkiwas a paborabli ed panangiproklama na Panarian. Kayari na inkioli to, inkuan nen Jesus ed baleg a grupo na babangatan to: “Onla kayo sirin, tan manggawa kayo na saray babangatan ed amin a nasyones, a binyagan yo ra ed ngaran na Ama, tan say Anak, tan say espiritu santo. Ya ibangat yo ran mangunor na amin a bengabengatla ya inganggan ko ed sikayo. Tan, nia! walaak a naynay ed sikayo, ya angga ed kasampotan na mundo.” (Mateo 28:19, 20) ‘Saray bengatlan inganggan nen Kristo’ so agnanlapu ed sikato; imbangat to so arum a mangunor ed saray ganggan na Dios, odino kakaukolanen. (Juan 14:23, 24; 15:10) Sirin say panbangat ed arum a ‘mangunor na saray bengatlan inganggan nen Kristo’ et sasaglawien toy panulong ed sikara ya aralen iray kakaukolanen na Dios. Nepeg a nakapet na matuan-impanpuson totoo iray kakaukolanen na Dios ta pian magmaliw iran sakop na Panarian to.
3. Anto so Panarian na Dios, tan anto so nagawaan na satan a pagmaliwen ton maong a balita so mensahe na Panarian?
3 Anto so Panarian na Dios? Tan antoy nagawaan na satan a pagmaliwen ton maong a balita so mensahe na Panarian? Say Panarian na Dios so sakey a mangatatawen a gobierno. Satan so pinablin tuloy nen Jehova, lapud satan so paraan a nitandoro so ngaran to, nalinisan ed amin a pakabalawan. Say Panarian so instruminto ya usaren nen Jehova pian sumpalen so linawa to ed dalin a singa met ed tawen. Satan so rason no akin ya imbangat itayo nen Jesus a mangipikasi ed Panarian na Dios ya onsabi tan pinaseseg to itayon mangiyuna ed satan ed bilay tayo. (Mateo 6:9, 10, 33) Kasin natalosan yo no akin ya importantin tuloy itan ed si Jehova a kaukolan tayon ipaamta ed arum so Panarian to?
Makapaangat a Kimey Balet Aliwan Pabelat
4. Panon a niyilustra a say obligasyon tayo a mangipulong ed maong a balita et aliwan pabelat?
4 Kasin pabelat so pangipulong ed sayan maong a balita? Andin balot! Diad pangiyilustra: Obligasyon na sakey ya ama a legpeten so pamilya to. Say agpanggawa ed satan et kasimbangan toy panangipulisay ed Kristianon pananisia. Onia so insulat nen apostol Pablo: “Balet no wala so agmanagano ed anak to, tan lalo la ed saray kaamong to a dili, pinaandi to la so pananisia, et sikato so lalon mauges nen say agmanisia.” (1 Timoteo 5:8) Balet pabelat ta itan ya obligasyon parad Kristianon laki? Andi no inaro toy pamilya to, lapud diad ontan a kipapasen et kaliktan ton legpeten ira.
5. Anggaman obligasyon so panagpulong tan panaggaway babangatan a kimey, akin a panliketan tayo so panginabang ed satan?
5 Mipadpara, say panagpulong tan panaggaway babangatan a kimey et sakey ya obligasyon, sakey a kakaukolanen, a say mismon bilay tayo so mandidipindi ed satan. Onia so impangikuan nen Pablo: “Say kapilitan so amasoot ed siak. Et abagey ak la no agko ipulong so ebanghelyo!” (1 Corinto 9:16; ikompara so Ezequiel 33:7-9.) Anggaman ontan, say motibo tayo ed panagpulong et say aro, aliwan basta obligasyon. Manuna et lapud inaro tayo so Dios, ingen inaro tayo met so kakaabay tayo, tan kabat tayo no panon kaimportanti parad sikara so pakarengel ed maong a balita. (Mateo 22:37-39) Mangiiter itan ed sikara na ilalo ed arapen. Say Panarian na Dios so magano lan mametek ed saray ag-inkahustisya, mangekal ed amin a panaglames, tan mangipawil ed kareenan tan pankakasakey—amin so parad magnayon a bendisyon na saraman so manpasakop ed matunong ya uley to. Agtayo ta masayaksak, on naliliketan, a manginabang ed ontan a maong a balita ed arum?—Salmo 110:3.
6. Akin a mangiprepresenta na peteg ya angat so panagpulong tan panaggaway babangatan a kimey?
6 Ontan met, sayan panagpulong tan panaggaway babangatan so mangiprepresenta na peteg ya angat. Mandurumaan so totoo. Amin so andian na pariparihon interes odino abilidad. Arum so akapanaral a maong, bangta arum so agtanton akaaral. Say panagbasa—a datin paboriton liwliwa—so mabetbet la natan a momoriaen bilang sakey a trabaho. Say aliteracy (kaandian na interes ed panbasa), ya uukeran bilang “say kualidad odino kipapasen a makabasa balet ag-interesado a manggawa ed satan,” so ombabaleg a problema, anggan diad saray bansa a mangipapasirayew ed atagey grado ed pakabasa tan pakasulat. Panon tayo sirin a natulongan so totoo a walaan na ontanlan midumaan ya abenegan tan interes pian aralen iray kakaukolanen na Dios?—Ikompara so 1 Corinto 9:20-23.
Suston Akinlongan Pian Ontulong ed Arum
7. Panon a “say matoor tan makabat ya aripen” so mangikinlong ed sikatayo pian tulongan so arum a makaaral ed saray kakaukolanen na Dios?
7 Say makapaangat a kimey so mas mainomay a gawaen no walaan kayo na suston uusaren odino kagawaan. Say sakey ya uusaren a matukoy ed partikular a trabaho natan so nayarin nauman odino nasalatan ni ingen ed panakar na panaon lapud manguuman a pankaukolan. Mipadpara itan ed komision tayo a pangiproklama ed mensahe na Panarian na Dios. Diad dakel lan taon et tatarokan itayo na “matoor tan makabat ya aripen” na saray eksakton uusaren, palapagan a nagkalalo lan denisinyo parad pangikondukta na panangiyaral na Biblia ed ayaman. (Mateo 24:45) Diad ontan et nakikinlongan itayo ya ontulong ed totoo na ‘amin a nasyon tan tribu tan . . . pansasalita’ pian naaralan daray kakaukolanen na Dios. (Apocalipsis 7:9) Panapanaon, nitatarya iray kaaruman ya instruminto pian makapibansag itayo ed manguuman iran pankaukolan na mundo. Konsideraen tayo pa so pigaran alimbawa.
8. (a) Antoy betang na libron “Let God Be True” ed impangilaknab na edukasyon ed Biblia? (b) Anton instruminto parad kimey a panagaral na Biblia so nitarya nen 1968, tan panon a nagkalalo lan denisinyo itan? (c) Panon a say libron Katuaan so tinmulong ed panaggaway babangatan a kimey?
8 Manlapud 1946 ya anggad 1968, say libron “Let God Be True” so inusar bilang mabiskeg ya instruminto parad edukasyon ed Biblia, tan ngalngali 19,250,000 a kopya so nipalapag ed 54 a lenguahe. Nipaway nen 1968, say libron Say Katuaan a Mangitonton ed Bilay ya Andi Anggaan so epektibon inusar ed loob na dakel a taon diad panangiyaral na Biblia ed saray interesado. Dati et kaslakan parad arum so paiyaralan ed Tastasi nen Jehova ed loob na dakel a taon ya agmanpapabautismo. Balet sayan instruminto so denisinyo pian ipilanor so estudyante, a papasesegen a mangiyaplika ed nanaaralan to. Say resulta? Onia so ibabaga na libron Jehovah’s Witnesses—Proclaimers of God’s Kingdom: “Diad loob na taloran serbisyon taon a ginmapo ed Setyembre 1, 1968, tan anampot ed Agosto 31, 1971, sakey a dagup na 434,906 a totoo so abautismoan—masulok nin dobli ed bilang na abautismoan legan na apalabas a taloran serbisyon taon!” Nanlapulad inkipaway to, say libron Katuaan so akadampot na makapakelaw a sirkulasyon—masulok a 107,000,000 diad 117 a lenguahe.
9. Anton espisyal a betang so niwala ed libron Manbilay na Ando lan Ando, tan anto so epekto to ed saray rangko na manangiproklama na Panarian?
9 Nen 1982 say libron Makapambilay Kayo na Ando lan Ando ed Paraiso diad Dalin so nagmaliw a manunan libron inusar ed pangikondukta na saray panagaral na Biblia. Sayan uusaren so walaan na masulok a 150 nanengneng ya ilustrasyon, kada sakey so walaan na makabaliksan a kapsion a diad segek et mangipapabitar ed manangibangat a punto na saray litrato. Onia so ibabaga na Oktubre 1982 a paway na Ministeryo Tayo ed Panarian: “Diad ngalngali 20 a taon a say ‘Let God Be True’ so manunan aaralen a libro (manlapud 1946 ya anggad kapegleyan na saray taon 1960) masulok a 1,000,000 a balon manangiproklama na Panarian so niarum ed organisasyon tayo. Insan sananey nin 1,000,000 a manangipalapag so niarum sanen nagmaliw a manunan aaralen a libro tayo so Say Katuaan a Mangitonton ed Bilay ya Andi Anggaan kayari inkipaway to nen 1968. Diad panguusar ed balon aaralen a libro tayo a, Makapambilay Kayo na Ando lan Ando ed Paraiso diad Dalin, kasin nanengneng tayo so mipadparan ilalaknab ed saray rangko na manangipalapag na Panarian? Maseguro, no saya so linawa nen Jehova!” Mapatnag a linawa nen Jehova, lapud manlapu nen 1982 ya anggad 1995, masulok a 2,700,000 so niarum ed saray rangko na manangiproklama na Panarian!
10. Anton balon uusaren so nitarya nen 1995, tan akin a satan so mamaaligwas ed espiritualidad na saray estudyante na Biblia ed makatunongan a peles?
10 Inkuan nen Jesus, “dakel a tua so aanien, daiset ira balet so manani.” (Mateo 9:37) On, say aanien so baleg. Dakel nin siansia so gawaen. Diad arum a daldalin et kaukolan a manpalista ed listaan na manaalagar iray totoo parad panagaral na Biblia. Kanian diad gagalan mas masiglat so pakapangilaknab ed pikakabat na Dios, nen 1995 “say matoor tan makabat ya aripen” so angitarya na balon uusaren, say 192-pahinan libro ya atituloan na Pikakabat a Mangitonton ed Andi-Anggaan a Bilay. Sayan makanakanan instruminto so agnisentro ed saray palson doktrina. Ipaparungtal toray katuaan na Biblia diad positibon paraan. Iilaloan a satan so mamaaligwas ed espiritualidad na saray estudyante na Biblia ed makatunongan a peles. Say libron Pikakabat so walaan la na epekto ed lawak a mundo tekep na 45,500,000 a kopya a niimprinta ed 125 a lenguahe tan peles a nipapatalos ed kaaruman a 21 a lenguahe.
11. Anton epektibon uusaren so nitarya pian ontulong ed panbangat ed saraman so agmakabasa tan agmakasulat odino saraman so makapoy a manbasa, tan panon ya akatulong a maong ed sankagloboan a programa tayo ed panagbangat?
11 Tunggal paminsan, ‘say matoor ya aripen’ so mangitatarya na saray uusaren a denisinyo parad espisipiko, odino limitado, a publiko. Alimbawa, komusta so totoo a nayarin mankaukolan na nikaduman tulong lapud kaugalian odino relihyoson abenegan da? Panon tayoran natulongan a makaaral ed saray kakaukolanen na Dios? Nen 1982 et akaawat itayo na nakaukolan tayo—say 32-pahinan brosyur ya Enjoy Life on Earth Forever! Sayan ilustradon maong a palapagan so epektibon uusaren ed pangibabangat ed saraman so agmakabasa tan agmakasulat odino ed saraman so makapoy a manbasa. Karga to so simsimpli tan mainomay-a-talosan a presentasyon na manuna iran Makasulatan a bangat. Nanlapulad inkipaway to, say Life on Earth a brosyur so akatulong a maong ed sankagloboan a programa tayo ed panagbangat. Masulok lan 105,100,000 a kopya so niimprinta ed 239 a lenguahe, a manggawa ed satan a sankalaknaban a patalos a palapagan ya inimprinta na Watch Tower Society ed kapiganman!
12, 13. (a) Nanlapulad 1990, ‘say matoor ya aripen’ so angitarya na anton kaaruman a paraan pian nasabi so malaknab a publiko? (b) Panon tayon usaren iray video na Sosyedad ed lawak a ministeryo tayo? (c) Anton balon uusaren so agano nin nitarya pian ontulong ed panaggaway babangatan a kimey?
12 Niarum ed niimprinta iran palapagan, ginmapo nen 1990 ‘say matoor ya aripen’ so angitarya parad sikatayo na instruksion a mangiyoopresi na balon paraan pian nasabi so malaknab a publiko—saray videocassette. Nen Oktubre ed satan a taon, say 55-minuto a video a Jehovah’s Witnesses—The Organization Behind the Name so nipaway—say sankaunaan a video a pinawala na Watch Tower Society. Say marakep, makaibangat a presentasyon, so wala ed 35 a lenguahe, ipapanengneng toy panusumpal na sankamundoan ya organisasyon na debotadon totoo nen Jehova ed ganggan nen Jesus a mangiproklama ed maong a balita ed amin a dalin. Say video so nagkalalo lan denisinyo pian ontulong ed kimey tayon panaggaway babangatan. Tampol ya inusar na saray manangipalapag na Panarian iyan balon uusaren ed lawak a ministeryo. Arum so mangikakarga ed satan ed saray bag da, a lawas akaparaan a mangipanengneng odino mangipabayes ed interesadon totoo. Ag-abayag kayari inkipaway to et onia so insulat na sakey a managbiahin manangasikaso: “Saray video so magmamaliw a koma-21 siglon paraan pian nasabi so kanonotan tan kapusoan na minilyon a totoo, kanian iilaloan min sayan video so unona labat ed dakel a video ya usaren na Sosyedad ed pangilaknab ed sankamundoan a kimey na Panarian.” On, dakel a video so nitarya la, pati say nankatlon-parti a serye na The Bible—A Book of Fact and Prophecy tan Jehovah’s Witnesses Stand Firm Against Nazi Assault. No saray video na Sosyedad so wala ed lenguahe yo, kasin nauusar yo la iratan ed lawak a ministeryo yo?a
13 Agano ni et sakey a balon uusaren, say brosyur ya Anto so Kakaukolanen na Dios ed Sikatayo?, so nitarya pian ontulong ed kimey tayon panaggaway babangatan. Akin a satan so nipalapag? Panon itan ya usaren?
Pangusisa ed Balon Uusaren
14, 15. Parad siopa a denisinyo so brosyur a Kakaukolanen, tan anto so lugan na satan?
14 Say balon palapagan ya Anto so Kakaukolanen na Dios ed Sikatayo? so denisinyo parad totoo a manisia la ed Dios tan manrerespeto ed Biblia. Saray managbiahin manangasikaso ontan met ed saray nipasal ed Gilead a misionero a walaan la na dakel ya eksperiensia ed onaaligwas a daldalin so tinmulong ed panangiparaan ed sayan brosyur. Mankarga iya na malaknab a kurso na panagaral, a mangokobri ed manuna iran bangat na Biblia. Saray inkisalita to so maabig, simpli, tan direkta. Ontan met, say lugan to so agpinasimplin maong. Ipaparungtal to so aliwa labat a “gatas” noagta ontan met ed “taganon anawet” manlapud Salita na Dios diad paraan a natalosan na karaklan.—Hebreos 5:12-14.
15 Nen inbeneg iran taon saray manangipalapag na Panarian ed nanduruman daldalin so kinmerew na eksakton ontan a palapagan. Alimbawa, onia so insulat na sanga na Watch Tower Society diad Papua New Guinea: “Nawewetwet iray totoo ed mankonkontraan a relihyoson bangabangat. Nakaukolan da so pinatikey iran salita na katuaan, a susuportaan na dakel a teksto ed Biblia a nayari ran tsiken ed dilin Biblia ra. Nakaukolan da so malinew tan espisipikon panangiparungtal ed no antoray kakaukolanen na Dios ed tuan Kristianos tan dinan iran kustombre tan agagamil so agto aabobonan.” Say brosyur a Kakaukolanen so say eksakton nakakaukolan tayo ed panulong ed ontan iran totoo a makaaral ed saray kakaukolanen na Dios.
16. (a) Siopa so nagkalautlan nagunggunaan manlapud simplin eksplinasyon na balon brosyur? (b) Panon a nayarin nagunggunaan iraman so walad teritorya yo manlapud brosyur a Kakaukolanen?
16 Panon yon usaren iyan balon instruminto? Unona, satan so nayarin usaren diad pangiyaral ed totoo a naiirapan a manbasa odino agmabasa.b Saray ontan ya indibidual so nagunggunaan manlapud simplin eksplinasyon na brosyur. Kayari panrerepaso ed asakbay ya impawit a kopya na sayan palapagan, onia so insulat na saray sanga na Watch Tower: “Say brosyur so mausar a maong ed dakel a parti na bansa a saray totoo so aliwan mabasa.” (Brazil) “Walaray dakel a dayo ya agmakabasa ed tubon lenguahe ra tan siansian nairapan a manbasa na Pranses. Sayan brosyur so nausar bilang sakey a katulongan ed panangiyaral ed saray ontan.” (Pransya) Wala tay naisip yo ed teritorya yo a nayarin nagunggunaan manlapud brosyur a Kakaukolanen?
17. Diad anton dalan a say balon brosyur so magmaliw a mausar ed dakel a daldalin, tan akin?
17 Komadua, diad dakel a daldalin et mausar so brosyur ed pangigapo na saray panangiyaral na Biblia ed matakot ed Dios a totoo antokaman so aral da. Siempre, nakaukolan so sagpot ed pangigapo na panangiyaral ed libron Pikakabat a Mangitonton ed Andi-Anggaan a Bilay. Balet diad arum a kaso et mas mainomay so pangigapoy panangiyaral ed sakey a brosyur. Insan diad matukoy a panaon et say panagaral so niyalis ed libron Pikakabat, say manuna tan lablabayen tayon katulongan ed panagaral. Nipaakar ed panangusar ed sayan brosyur a Kakaukolanen, onia so insulat na saray sanga na Watch Tower: “Mairap so pangigapo na saray panangiyaral na Biblia, tan saray pankanawnawa ed pakapangigapoy panangiyaral so ompatnag a magmaong sano igapo na saray manangipalapag ed sakey a brosyur.” (Alemanya) “Say onian klase na brosyur so magmaliw a sankaepektiboan ed pangigapo na saray panangiyaral na Biblia, a ditan et nituloy ed libron Pikakabat.” (Italya) “Anggaman saray Hapones so edukadon tuloy, kaslakan et limitadon tuloy so pikakabat da ed Biblia tan ed saray manunan bangat to. Say brosyur so magmaliw a maabig a balitang ed libron Pikakabat.”—Hapon.
18. Anto so kaukolan tayon nonoten nipaakar ed panangapet ed saray kakaukolanen na Dios?
18 Saray sanga na Sosyedad ed sankamundoan so angerew nipaakar ed sayan brosyur, tan inabobonan a nipatalos itan ed 221 a lenguahe. Komon ta sayan balon palapagan so napruebaan a makana diad panulong ed sikatayo pian naasistian so arum a makaaral ed no antoy kakaukolanen nen Jehova a Dios ed sikara. Diad biang tayo, tandaan tayo a say panangapet ed saray kakaukolanen na Dios, pati ed ganggan a manpulong tan manggaway babangatan, so mangiiter ed sikatayo na mablin pankanawnawa a nipanengneng ed si Jehova no kaunongan so panangaro tayo ed sikato. On, say kakaukolanen na Dios ed sikayo so aliwan pabelat. Satan so sankaabigan a paraan a panbilay!—Salmo 19:7-11.
[Saray paimano ed leksab]
a Onia so ibabaga na libron Jehovah’s Witnesses—Proclaimers of God’s Kingdom: “Saray videocassette so agbalot kasandi na niimprintan pahina odino personal a panagtasi. Saray palapagan na Sosyedad so mantutultuloy a walaan na importantin betang ed panangilaknab na maong a balita. Say kabkaabungan a kimey na Tastasi nen Jehova so mansiasiansian mabiskeg a nibase ed Kasulatan a kabiangan na ministeryo ra. Balet, saray videocassette natan so iyaarum ed saraya bilang makanan uusaren ed pamayubo na pananisia ed makapasagyat iran sipan nen Jehova tan mamaligsa na apresasyon ed ipapagawa to ed dalin ed agew tayo.”
b Parad salaysay ed no panon so pangikondukta na panangiyaral ed brosyur a Kakaukolanen, nengnengen so artikulon “Balon Uusaren ya Ontulong ed Totoo a Makaaral ed Saray Kakaukolanen na Dios,” ed pahina 16-17.
Kasin Nipaliwawa Yo?
◻ Diad anton nankaduan kimey a kakaukolanen nen Jehova a pibiangan na ariripen to?
◻ Akin a say obligasyon tayon manpulong tan manggaway babangatan et aliwan pabelat ed sikatayo?
◻ Say “matoor tan makabat ya aripen” so angitarya na antoran uusaren ed panagpulong tan panaggaway babangatan a kimey?
◻ Parad siopa a denisinyo so brosyur a Kakaukolanen, tan panon tayon usaren itan ed ministeryo tayo?
[Litrato ed pahina 24]
Aliwan pabelat so panagpulong tan panaggaway babangatan a kimey tayo
[Saray litrato ed pahina 26]
“Let God Be True” (1946, revised 1952): 19,250,000 ed 54 a lenguahe
“Say Katuaan a Mangitonton ed Bilay ya Andi Anggaan” (1968): 107,000,000 ed 117 a lenguahe (Akaparungtal ed Pranses)
“Makapambilay Kayo na Ando lan Ando ed Paraiso diad Dalin” (1982): 80,900,000 ed 130 a lenguahe (Akaparungtal ed Ruso)
“Pikakabat a Mangitonton ed Andi-Anggaan a Bilay” (1995): 45,500,000 ed 125 a lenguahe (Akaparungtal ed Aleman)