“Itutumba, Balet Ag-abagbag”

UNONG ED SALAYSAY NEN ULF HELGESSON

Nen Hulyo 1983, saray doktor ya akausdong ed siak so kinmelyaw: “Abangon la!” Sakey a tumor a walay dukey a 12 sentimetro so inekal ed spinal cord ko diad komplikadon 15-oras ya operasyon. Nagmaliw ak a sigpot a paralisado.

PIGARAN agew ed saginonor, inyalis ak ed sakey ya ospital ya 60 kilometro manlapud baley ko a Hälsingborg, diad abalaten na Sweden. Diman ak ya akimembro ed sakey a rehabilitation program. Inkuan na physiotherapist a saya so mankaukolan na dakel a panaon, ingen alay gunaet kon makagapo la. Talagan labay ko so makaakar lamet. Lapud magunaet a pantutultuloy ko ed programan limay-oras-kada-agew a panag-ehersisyo, pinmeles so iyaabig ko.

Kayari na sakey bulan sanen dinmalaw ed kongregasyon mi so manangasikaso na sirkito, sikato tan arum nin Kristianon mamatatken so nambiahe na arawi pian gawaen ed kuartok ed ospital so miting na mamatatken na kongregasyon. Alay liket ko ed sayan ebidensya na maaron impanaagi! Kayari miting et pinamerienda na saray nars ed ward so interon grupo na tsa tan sandwiches.

Diad gapo et nikelawan iray doktor ed iyaabig ko. Kayari taloy bulan et makayurong ak la ed wheelchair ko tan makaalagey ak ni ingen ed pigaran bekta. Siak so maliket tan determinadon tuloy a makaakar lamet. Say pamilyak tan kapara iran Kristiano so amaseseg ed siak a tuloy ed saray ibibisita ra. Makasempet ak ni ingen ed antikey a panaon.

Sakey ya Ambelat a Babeng

Balet kayari na saman, anggapo lay nalikas kon iyabig ko. Ag-abayag et inkuan ed siak na physiotherapist so ansakit a balita: “Anggad ditan labat so iyabig mo!” Say kalat natan et say pamabiskeg ed siak ya onkiwas a bukor ko ed wheelchair. Isipen ko no anto kasi nagawa ed siak. Panon lay asawak? Anggan sikato et komplikadon naoperaan tan mankakaukolan met na tulong ko. Kaukolan kasin asikasoen ak na ospital a manbayag?

Ontanlay inkadepresyon ko. Kalkalnan naandipat so biskeg, biskeg-na-linawa, tan puersak. Linmabas iray agew, tan siak so nansiansian agmakagalaw. Agak lambengat paralisado ed pisikal noagta agmakalikna met ed emosyon tan espiritual. Siak so ‘intumba.’ Naynay kon ipapasen nen saman so inkasiak a mabiskeg ed espiritual. Malet so inkilamot na pananisiak ed Panarian na Dios. (Daniel 2:44; Mateo 6:10) Kombinsido ak ed sipan na Biblia ya amin a sakit tan liliknaen so natambal ed matunong a balon mundo na Dios tan amin a katooan so nipawil ed ayadyarin bilay diman. (Isaias 25:8; 33:24; 2 Pedro 3:13) Natan et say pakaliknak et aliwa lambengat a paralisado ed pisikal noagta ed espiritual met. Aliknak a siak so “abagbag.”​—2 Corinto 4:9.

Sakbay kon ituloy, abuloyan yo ak pan mangistorya na pigaran bengatla nipaakar ed siak.

Sakey a Maliket a Pamilya

Siak so niyanak nen 1934, tan lawas marakep so bunigas ko. Diad kagapo na saray taon 1950, akabkabat ko si Ingrid, tan sikami nankasal nen 1958 tan nanayam ed baley na Östersund, diad sentral Sweden. Sinmabi baleg a pananguman ed bilay mi nen 1963 sanen ginapoan mi panagaral na Biblia ed Tastasi nen Jehova. Diad saman et walaan kami na taloran ankekelag ya anak​—di Ewa, Björn, tan Lena. Ag-abayag et say interon pamilya mi so manaaral tan onaaligwas a maong diad pikakabat ed saray katuaan na Biblia.

Ag-abayag kayari inggapo min manaral, inmalis kami ed Hälsingborg. Diman min indedikan sanasawa so inkasikami pian manlingkor ed si Jehova tan abautismoan nen 1964. Lalon linmiket kami sanen abautismoan so panguloan ya anak min bii, si Ewa, nen 1968. Pitoran taon ed saginonor, nen 1975, di Björn tan Lena so abautismoan met, tan diad tinmumbok a taon et aturo ak bilang matatken ed Kristianon kongregasyon.

Say sekular a trabahok so amakayari ed siak a natarokan a maong iray materyal a pankaukolan na pamilyak. Tan lalo ni liket mi sanen linmoob si Björn tan Lena ed sigpot-panaon a ministeryo. Naimbitaan a tampol si Björn a manlingkor ed sangan opisina na Tastasi nen Jehova diad baley na Arboga. Say bilay, a singa panangibaga et paborable ed sikami. Insan, diad kagapo na 1980, aliknak iray pisikal ya epekto na tumor a diad kaunoran et inekal ed saman a komplikadon operasyon nen 1983.

Itatalona ed Inkaparalisado ed Espiritual

Sanen nibaga ed siak ya agak la makaakar lamet, singano naandi lan amin so ilalok. Panon kon apapawil so espiritual a biskeg? Mas mainomay nen say abaloan ko. Inalak lambengat so Bibliak tan ginapoan kon basaen. Diad lalon panbabasak, nagkalalo met ya espiritual a biskeg so naawat ko. Nagkalalo ed amin nandinayewan ko so Sermon ed Palandey nen Jesus. Inulit-ulit kon binasa tan dinalepdep.

Pinmawil so maliket a panmoriak ed bilay. Diad panamegley na panagbasa tan panagdalepdep et anengneng koray pankanawnawa imbes ed saray samben. Apapawil koy pilalek kon ipanabang ed arum iray katuaan na Biblia, tan apenek ko iyan pilalek diad impantasi ed staff na ospital tan ed arum nin akabkabat ko. Sigpot a sinuportaan ak na pamilyak tan sikaray nipasal pian naamtaan no panon ak a naasikaso. Kaunoran et sarag ko lan taynan lamet so ospital.

Diad kaunoran et akasempet ak la. Alay liket iman ya agew parad amin mi! Angiyarunsa so pamilyak na eskedyul a mangilaktip ed pangasikaso’d siak. Deniside na ilalak kon si Björn, a taynan so kimey ed sangan opisina na Tastasi nen Jehova, tan sinmempet pian ontulong ed panangasikaso ed siak. Talagan makaligliwa so pagmaliw a pangipaarapan na ontanlan panangaro tan panangasikaso manlapud pamilyak.

Iyaarap ed Sakey Nin Babeng

Anggaman ontan, diad inlabas na panaon, kinmapuy so bunigas ko, tan ngalngali agak la makagalaw. Kaunoran, anggaman ed matoor iran sagpot na pamilyak, agda la sarag ya asikasoen ak ed ayaman mi. Kanian inisip kon sankaabigan parad say siak so iloob ed nursing home. Lamet, mankabaliksan itan na saray pananguman tan sakey a balon rutina. Balet agko inabuloyan itan a magmaliw a babeng ed espiritualidad ko.

Agkon balot intunda so panagbasa tan panagsukimat ed Biblia. Naynay kon iisipen so nagawaan ko, aliwan say agko nagawaan. Dinalepdep koray espiritual a bendisyon na amin ed Tastasi nen Jehova. Nansiansia ak a maapit ed si Jehova diad pikakasi tan inanamot kon amin so pankanawnawa pian pulongan so arum.

Natan et inusar koray labik tan kabiangan na saray agew ko ed nursing home. Saray ngarem tan labi so inusar ko met ed ayaman mi odino ed saray Kristianon miting. Inyuksoy na social service so regular a transportasyon a pawil-patubo ed saray miting tan pawil-patubo ed ayaman mi. Say matoor a pamilyak, saray agagi ed kongregasyon, tan saray totoo na nursing home so nanasikaso ed siak ed makapakelkelaw a paraan.

Panggawa na Anggaay Nayarian Ko

Agko ipapasen so inkasiak a baldado, tan agak tratratoen na ontan na say pamilyak, nisay Kristianon agagik. Siak so simamaaron inasikaso, ya amakayarin nituloy ko so epektibon panlingkor ko bilang sakey a matatken. Ikokonduktak so Panagaral na Libro ed Kongregasyon a kada simba, ontan met ed sinimban panagaral na kongregasyon ed Say Panag-Bantayan ed Kingdom Hall. Naiirapan ak a mangibukay ed saray pahina na Biblia, kanian walay pinabtangan ya ontulong ed siak a manggawa ed satan ed saray miting. Idadaulok iray miting tan manpapaliwawa ya akayurong ed wheelchair ko.

Kanian dakel ni nagagawaan kon bengatla a panliliketan kon gagawaen ed apalabas, pati say panagpastol ya idadalaw. (1 Pedro 5:2) Nagagawaan ko iya sano onasingger iray agagi ed siak pian onkerew na tulong odino simbawa. Uusaren ko met so telepono, a siak lay ununa diad pantelepono ed arum. Say resulta et panpapasesegan ed balang sakey. (Roma 1:11, 12) Diad agano ni et inkuan na sakey a kaaro: “Dugaruga, sano siak so nadidismaya, ontatawag kayo pian pasesegen ak.” Balet siak met so apaseseg, diad pakaamta a bebendisyonan nen Jehova iray sagpot ko.

Sakbay tan kayari na saray miting, walaan ak na maabig a pililimog ed ugugaw diad kongregasyon. Lapud siak so akayurong ed wheelchair ko, sikami makapantotongtong ed parehon palatas na mata. Pisalamatan ko so inkasimoon tan inkaprangka ra. Aminsan et inkuan ed siak na sakey ya ugaw a laki: “Sikayo so nikadkaduman guapon baldado!”

Diad pangiimano ed bengatlan nagawaan ko imbes ed agko nagawaan, napanggagayagaan koy panlilingkor ed si Jehova. Dakel so naaralan ko ed agawa ed siak. Amoriak a sikatayoy nipapasal tan napapabiskeg na saray subok a nasagmak tayo.​—1 Pedro 5:10.

Dakel a mabunigas a too, a naimanok, so ag-akatalos a nepeg tayon seryosoen so panagdayew ed mangatatawen ya Ama tayo. Tano andi, say eskedyul tayo ed panagaral, saray miting, tan ed lawak a ministeryo so magmaliw a rutina lambengat. Ipapasen ko irayan probisyon a makana ed kiliktar ed anggaan na sayan mundo ya ompugta’d insipan na Dios a mangaraldalin a Paraiso.​—Salmo 37:9-11, 29; 1 Juan 2:17.

Nepeg tayon pansiansiaen ed kapusoan tayo so ilalo a bilay diad onsabin balon mundo na Dios. (1 Tesalonica 5:8) Naaralan ko met so ag-isuko ed pibabakal sumpad antokaman a tendensyan pakadismaya. Naaralan ko met a moriaen si Jehova a pinagka-Amak tan say organisasyon to a pinagka-Inak. Amoriak a no sikatayo so mansagpot, nausar nen Jehova so siopaman ed sikatayo pian magmaliw ya epektibon aripen to.

Anggan no maminsan et aliknak a, singa panangibaga et ‘atumba,’ siak so “ag-abagbag.” Siak so agbalot pinaulyanan nen Jehova tan say organisasyon to, nisay pamilyak tan Kristianon agagik. Lapud impamenben ed Biblia tan impamasa ed satan, apapawil ko so espiritual a biskeg to. Misalsalamatak ed si Jehova a Dios, a mangiiter na “pakayari ed labas na normal” sano sikatayo so manmatalek ed sikato.​—2 Corinto 4:7.

Tekep na sigpot a kompiyansa tan nagnap a panagmatalek ed si Jehova, mapilalek tan mailalo ak ed arapen. Matalek ak ya asinggsingger lan tooren nen Jehova a Dios so sipan to nipaakar ed nipawil a paraiso dia ed dalin pati amin a makapakelaw a bendisyon ya itarok na satan.​—Apocalipsis 21:3, 4.