Panamaliket ed Bilay na Pamilya Yo
Katuloyan na Kapitulo 8
Say Kalareker ed Abung
28, 29. Anton nengneng na kalareker ed abung so kalkaliktan, tan akin?
28 Say betang na namparan ateng et say pangitarya na maaron ayaman. No saya so nalikna na ananak, saray panduaruwaan odino lingo-lingo ra so ag-onbunton ed dalem da nisengeg ed takot dan mangibaga ed saray atateng da. Kabat da a sarag day mitalosan tan sikaray natalosan, tan saray pamaakaran so nauksoy tekep na maaron imano. (Ipareng so 1 Juan 4:17-19; Hebreos 4:15, 16.) Say ayaman so aliwa labat lan sakey a siruman noagta sakey met a daongan. Say panangaroy ateng so mamabaleg tan mamabulaslas ed saray espiritu na ugugaw.
29 Agyo nayariay mangidepel na espongha ed tuka tan ilaloan yon napano na danum. Sepsepen to labat lay walad liberliber to. Sepsepen labat na espongha so danum no ditan ilereg. Saray ugugaw, met, sepsepen daray walad kaliberliber da. Natalosan daray kiwakiwas tan naimatonan daray bengatlan nagagawa’d kaliberliber da, tan mansepsep irayan singa saray espongha. Natebek na ananak iray liknaan yo, no kasin saraya so nerbyos ya ingongot odino maligan kareenan. Anggan saray ugugaw so mansepsep ed saray kualidad ed kalereker na abung, kanian say sakey a walaan na pananisia, aro, espiritualidad tan panagmatalek ed si Jehova a Dios so mabmablin tuloy.
30. Antoran tepet so nayarin itepet na atateng ed inkasikaran dili pian nadetermina no kasin itatarya ray maabig a panangiwanwan ed ananak da?
30 Tepetan moy inkasika: Antoran estandarte so ilaloan mon sumpalen na anak mo? Kasin sikayon duan atateng so makasusumpal ed saratan? Antoy tatalindegan na pamilyam? Antoran nengneng na ehemplo so walad sika a parad anak mo? Kasin sikay mareklamo, managtetel, managbalaw ed arum, manayam ed negatibon kanonotan? Ontan kasin klase na anak so kaliktan mo? Odino, kasin sikay walaan na atagey iran estandarte a parad pamilyam, manbibilay tukoy ed saratan, tan ilaloan moray anak mon manggawa met na ontan? Kasin natatalosan dan say pikasakey ed sayan pamilya et kakaukolan toy panumpal ed arum iran kakaukolan, arum a kondukta so naawat, tan arum iran aksion tan awawey so andi? Kaliktan na ugugaw a liknaen so kaligenan, kanian ipalikna yo’d sikara so abobon tan panangawat yo sano nasumpal daray estandarte na pamilya. Saray totoo so walaay paraan na pambilay unong ed no antoy iilaloan ed sikara. Ikuentam so anak mon mauges tan anganko sikay paneknekan ton duga. Ilaloan moy maabig ed sikato, tan sikatoy pasesegen mon manbilay tukoy ed satan.
31. Antoy nepeg a naynay a tumbokan na panangidirehi atateng?
31 Naukom iray totoo diad kiwakiwas da a mas lalo nen saray salita ra. Saray ananak, met, so nayarin agmangiter na dakel a tuloy ya imano ed salsalita noagta diad kiwakiwas tan sikaray lanang a sikakabat a maniim ed anggan anton pansimpisimpitan. Saray dakel a tuloy a salita so nayarin mangewkew ed saray ugugaw. Seguroen yon saray salita yo so tutumbokan na pangaagamil yo’d saratan.—1 Juan 3:18.
32. Siopan simbawa so nepeg a tumboken a naynay?
32 Balang lan sikay sakey ya ama odino sakey ya ina, say betang mo so sakey a subok. Balet say subok so nayarin naabet tekep na maliket iran pansumpalan diad panumbok ed simbaway Manangiter na bilay. Isumpal moy nipabtang a betang mo a siseseet, a singa diad Sikato. (Colosas 3:17) Paliisan iray inkaalablabas, pansiansiaen moy inkasimbang tan “nakabatan komon na amin so inkamakatunongan mo,” a pati saray anak mo.—Filipos 4:5.