Tastasi nen Jehova ed Interon Mundo​—Brazil

SAY Brazil so sakey a higanten dalin ed dakel a pamaakaran. Namparan diad kabaleg tan populasyon, saya so komaliman sankabalgan a bansa ed mundo. Kokobrian to so ngalngali kapalduay dalin na Abalaten ya Amerika tan ayaman na mas dakel nin totoo nen say amin niran bansa ed satan a kontinenti no pandaragupen. Wala met ed Brazil so sankabalgan a katakelan ed mundo. Diad panamegley na satan a katakelan et onaagos so sankabiskegan ya ilog ed dalin​—say Amazon.

Say Brazil so higante ni ed sakey a pantalos. Say bilang na saray manangipalapag to na maong a balita na Panariay Dios so ngalngali lan 400,000, tan nen katantaon et masulok a 1,000,000 so inmatendi ed Memoryal na impatey nen Kristo. Sayan dalin sirin so nagkalautlan sankaimano no nipaakar ed kimey a panangipulong-na-Panarian. Saray eksperiensia ed agano ni so mangiyilustra ed sayan punto.

Panaglingkor No Iner a Babaleg so Pankaukolan

Si Antonio tan say asawa to so nanggawa na mairap a desisyon ya itilak iray kanayon tan sakey a maligen, baleg a sueldon trabaho ed São Paulo pian manlingkor no iner a babaleg so pankaukolan ed saray manangiyabawag na Panarian ed estado na Minas Gerais. Sakop na teritorya ra so sakey a kolonya na saray komikimey diad sakey a repineriya (refinery) na asukal. Diad inmunan agew na impantasi ra diman, sikaray akapangigapo na siameran panangiyaral na Biblia. Diad loob na 18 bulan, sikaray akapangikondukta na masulok a 40 panangiyaral!

Diad gapo, saray miting et ginawan mismo ed repineriya. Anggaman ontan, labay na saray balon manangipalapag so makanengneng na talagan Kingdom Hall. Kanian, sakey ya inopaan a bus so angawit ed 75 a totoo ed sankaasinggeran a kongregasyon. Tinmumbok et awalaan na sakey a kumbension; 45 ed balon estudyante so inmatendi tan inenterbio. Labinlima ed saraya so binautismoan ed satan ya okasyon. Siempre, dakel so akalua lapud gayaga!

Saman met lanlamang a kompanya na bus so inusar ed pareho iran panagbiahe, tan saray opisyal so angiter na diskuento ed pasahe. Bilang apresasyon, si Antonio so angiyopresi na sakey a katulongan ed panagaral na Biblia ed akankayariay kompanya. Diad saman a mismon labi et sikatoy inmabobon ya onggapon manaral na Biblia tan abautismoan kayari na pigaran bulan na maseet a panagaral. Diad gapo et say asawa to so sumpa ed panagaral, balet asabi panaon, anguman so awawey to. Natan et sikato met lay sakey a bautismadon Tasi nen Jehova.

Nen Pebrero 1992 et sakey a kongregasyon a walaay 22 ya aktibon manangipalapag so aporma. Kasabi 1994, sayan bilang so dinmaak anggad 42, a walay 4 regular pioneer, odino sigpot-panaon iran manangiyabawag na maong a balita. Bilang resulta, inkuan nen Antonio: “Atasian min sanasawa a no ‘suboken [tayo] si Jehova,’ a singa ed ibabaga na Malaquias 3:10, NW, sikatoy ‘mangikalbo’d sikatayo na bendisyon anggad angggapolay kaukolan.’”

Panangiyopresi na Literaturay Biblia

Anganko say sakey nin rason no akin a baleg so inyaligwas na kimey a panagpulong ed Brazil et say bengatlan iyoopresi na Tastasi so literaturay Biblia ed kada pankanawnawa. Alimbawa, sakey a kongregasyon so nansulat ed sangan opisina na Watch Tower Society ya onkekerew na 250 a kopya na Questions Young People Ask​—Answers That Work. Akin ya ontanlan karakel a pedido?

Say sulat so angisalaysay: ‘Sakey ed saray eskuelaan dia so nandesiden usaren iyan libro bilang materyal ed panbangat ed sakey ed saray klase. Say desisyon na saray autoridad ed eskuelaan et lapud impormal a panagtasin ginawa na atateng na saray estudyanten Tastasi nen Jehova tan ed sakey ed superbaysor na eskuelaan. Komon ta mantultuloy a bendisyonan nen Jehova so ariripen to legay pangitatarok da na maabig ya instruksion diad panamegley na sayan libro.’ On, tan komon ta mantultuloy a bendisyonan nen Jehova so maabig ya aligwas na kimey a panangipulong-na-Panarian ed higanten dalin na Brazil.

[Kahon ed pahina 8]

KIPAPASEN NA BANSA

1994 Serbisyon Taon

PANTOK A BILANG NA MANTATASI: 385,099

RATIO: 1 Tasi kada 404

INMATENDI ED MEMORYAL: 1,018,210

PROMEDYON MANANGIPALAPAG A PAYUNIR: 38,348

PROMEDYON PANANGIYARAL NA BIBLIA: 461,343

BILANG NA ABAUTISMOAN: 24,634

BILANG NA SARAY KONGREGASYON: 5,928

SANGAN OPISINA: CESÁRIO LANGE

[Litrato ed pahina 9]

Sakey a sound car ya inusar ed São Paulo ed ngalngali 1940

[Litrato ed pahina 9]

Panagtasi ed Harden a Botaniko ed Rio de Janeiro

[Litrato ed pahina 9]

Sangan opisina ed Cesário Lange