Leksion ed No Panon ya Arapen Iray Problema

PIGPIGARAN totoo so kaukolan a mipuligesgesan ed saray probleman singa asagmak nen Job. Diad antikey a panaon lambengat et sikatoy agonigon ed inkaandi kayamanan tan anapan to, say makatalagnaw ya impatey na amin ya ilalak to, tan diad kaunoran et say makapaot-ot a sakit. Lapud impulisay na kakaaro tan kakanayon to, sikatoy pinaseseg na asawa ton ‘ikaindan so Dios tan ompatey!’​—Job 2:9; 19:13, 14.

Anggaman ontan, si Job so sakey a nikadkaduman lapuan na panamaseseg ed siopaman a makakasagmak na mipadpara iran subok. Say positibon resulta na inkasubok to so mangipapanengneng a say panagsungdo anggaman ed agaylan kairapan so mamaliket ed puso nen Jehova, sano sikatayo so pakikiwasen na tuan maridios a debosyon imbes ed personal a pankaabiganan.​—Job, kapitulo 1, 2; 42:10-17; Uliran 27:11.

Sayan salaysay ed Biblia so mankarga met na makana iran leksion ed no panon ya arapen iray problema. Mangitatarok itan na mabitar iran alimbawa no panon a say sakey a nipapaarap ed subsubok so nepeg​—odino agnepeg—​a simbawaen. Sakey ni, say mismon eksperiensia nen Job so makatulong ed sikatayon onkiwas diad asimbang a paraan sano naromog tayoy inkasikatayon papaspasen na mairap iran kipapasen.

Leksion ed Negatibon Pananimbawa

Say balikas a “managligliwa nen Job, NW” so nagmaliw a mipadpara’d toon manggawa’d mairap a situasyon a lalon mauges, imbes a miambegya ed panaon na kaermenan. Balet anggaman ed agamoran a reputasyon na taloran kakaaro nen Job parad inkasikara, agtayo nepeg ya isipen a mauges iray motibo ra. Diad arum a pamaakaran et labay dan tulongay Job, a mitunosan ed lingon panmoria ra. Akin a sikaray sinmaew? Panon a sikaray nagmaliw ya instrumento nen Satanas, a determinadon mamuyak ed katooran nen Job?

Bueno, ngalngali imbase ran amin so simbawa ra ed abaloan dan susto: a say kairapan et onsasabi lambengat ed saray nankasalanan. Diad inmunan impansalita to, inkuan nen Elifaz: “Siopa ta so natawtaw, anta sikato so maalas? Odino iner so akapegpegan na matunong? Unong ed anengneng ko, saray nanbaka na karelmengan, tan mantanem na gonigon, anien da so satan lanlamang.” (Job 4:7, 8) Sililingon sinisia nen Elifaz a say agnankasalanan et agdadapoan na kalamidad. Inkatunongan to met a lapud nasasagmak nen Job so ontanlan problema tan kairapan, talagan sikatoy nankasalanan sumpad Dios.a Impilit met nen Bildad tan si Zophar a kaukolan a magbabawi si Job lapud saray kasalanan to.​—Job 8:5, 6; 11:13-15.

Lalon kinmapuy so liknaan nen Job diad impangibalikas na taloran kaaro to ed personal iran ideya ra imbes a maridios a kakabatan. Imbaga ni ingen nen Elifaz ya ‘agmanmatalek so Dios ed ariripen to’ tan ag-importanti ed si Jehova no si Job et matunong odino andi. (Job 4:18; 22:2, 3) Mairap ya isipen so lalon makadismaya​—odino lalon agmatua—​a salita nen say satan! Agpankelawan, a diad kaunoran et kinorehi nen Jehova si Elifaz tan saray kaiba to lapud sayan panagpauges. “Ag yo sinalita nipaakar ed siak so bengatla a sikato so maptek.” (Job 42:7) Balet say makaderal a tuloy a panangipilit so diad arapen ni.

Diad kaunoran et sinmabi Elifaz ed punton direktan panangakusa. Lapud agto napaamin si Job a sikatoy nankasalanan, amabrika na saray kasalanan ya isipen ton ginawa nen Job. “Aliwa ta a baleg so inkarelmeng mo? Angapo ta so bengatla ya angaan ed saray karelmengan mo?” intepet nen Elifaz. “Ta angala ka na sansanla ed agim nipaakar ed angapo, tan nilakseban mo so saray lakseb ed saray kawes da. Agka angiter na danum ed naksawan pian oninom, tan inbalam so tinapay ed narasan.” (Job 22:5-7) Sigpot ya anggapoy letnegan na sarayan akusasyon. Si Jehova a mismo so aneskribe ed si Job a toon “naskey tan maptek.”​—Job 1:8.

Panon so inkiwas nen Job ed sarayan panangataki nipaakar ed dilin katooran to? Natalosan, ya anggan panon et sikaray nanggawa’d sikaton masulit tan walaay depresyon balet lalon determinado ed kapiganman a napaneknekan ton palso iray akusasyon da. Diad katuaan, lalon nagmaliw ya okupado ed panangiyalangon ed sarili, diad sakey a paraan et ginapoan ton tetelen si Jehova ed saray kipapasen to. (Job 6:4; 9:16-18; 16:11, 12) Nibaliwala iray tuan isyun nasasaglawi, tan say tongtongan so nagmaliw a maapan debati nipaakar ed no kasin si Job so matunong, odino agmatunong. Antoran leksion so naaralan na saray Kristiano manlapud sayan makaderal a sesyon na pananimbawa?

1. Diad gapo et ag-ipasen na sakey a maaron Kristiano a saray problema na sakey ya agi et bunga na saray kasalanan to. Say alabas a panangimano ed apalabas iran lingo​—balanglan peteg odino nodnonot labat—​so sigpot a manismaya ed sakey a mipupuligesgesan. Kaukolan a ‘ligliwaen’ so toon walaay depresyon imbes a panpasnokan. (1 Tesalonica 5:14) Labay nen Jehova a saray manangasikaso et magmaliw a “sakey ya amotan na dagem,” aliwan ‘masegsegang a managligliwa’ a singa di Elifaz, Bildad, tan Zophar.​—Isaias 32:2; Job 16:2.

2. Agtayo nepeg a mangakusa ya anggapoy malinew ya ebidensya. Saray nadngelan odino saray abaloan​—a singa samay ed si Elifaz, so agmaabig a basiyan parad pananimbawa. Alimbawa, no akagaway sakey a matatken na lingon akusasyon, maseguron nabalang toy kredibilidad to tan pansengegan na gonigon. Anto so alikna nen Job sanen nadngel to so onman a lingon simbawa? Sikatoy angibalikas na inkasinagem to tekep na agpangikabkabilangan: “Agay la so intulong mo ed saman so andian na pakayari!” (Job 26:2) Say mapagan manangasikaso so ‘mangitagey ed saray lima a naksawan,’ agmamauges ed problema.​—Hebreos 12:12.

3. Say simbawa so nepeg a based Salita na Dios, aliwan based personal iran ideya. Saray argumento na saray kaulop nen Job so parehon aliwa tan makaderal. Imbes ya iyapit si Job ed si Jehova, sikatoy intonton dan manisip a walay babeng a mangisisian ed sikato manlapud mangatatawen ya Ama to. (Job 19:2, 6, 8) Say onsianon panangusar ed Biblia, diad biek a dapag, so mametek ed saray bengatla, mamabiskeg ed arum, tan peteg a manligliwa.​—Lucas 24:32; Roma 15:4; 2 Timoteo 3:16; 4:2.

Bangta tutulongan na libroy Job iray Kristiano a mamidbir ed pigaran patit, itatarok to met so mausar a leksion ed no panon so pangiter na epektibon simbawa.

No Panon so Panimbawa

Say simbawa nen Elihu so sigpot a midumaan ed insimbawa na taloran kaaro nen Job, nampara ed lugan tan diad paraan na impideneng nen Elihu ed si Job. Inusar to so ngaran nen Job tan akitongtong ed sikato bilang sakey a kaaro, aliwan sakey ya ukom nen Job. “Angan ontan, Job, pikasik ed sika, denglen mo so bitlak, tan denglen mo so saray amin a salitak. Nia, onarap ak ed Dios a singa met sika; siak met agawa ak ed dalin.” (Job 33:1, 6) Si Elihu met so maples ya angomenda ed si Job lapud maptek a kurang to. “Nangayagaan ko so inkatunong mo,” impaseguro to ed si Job. (Job 33:32, NW) Nilikud ed onian mapangasin paraan na pananimbawa to, si Elihu so matalona met ed arum niran rason.

Lapud siaanos a nanalagar anggad asumpal so arum a mansalita, lalon atebek nen Elihu iray problema sakbay ya animbawa. Ipasen lan si Job so sakey a matunong a too, kasin sikatoy dusaen nen Jehova? “Arawi ed Dios, a sikato mangawa na karelmengan, tan ed Makapanyarinamin, a mangawa na inkauges!” so inkelyaw nen Elihu. “Sikato agto isian so saray mata to manlapu ed matunong.”​—Job 34:10; 36:7.

Kasin talagan say inkatunong nen Job so manunan isyu? Tinangguyor nen Elihu so imano nen Job ed sakey ya ag-asimbang a punto-de-bista. “Kuan mo, Say inkatunong ko sikato so lalo nen say inkatunong na Dios,” insalaysay to. “Imatonan mo so saray tawen, tan nengnengen mo; tan [nengneng moray lurem, a sikaray talagan mas atagey nen say sika].” (Job 35:2, 5) No panon ya atagtagey iray lurem nen say sikatayo, ontan met ya atagtagey iray dalan nen Jehova nen saray dalan tayo. Anggapo tayo’d kipapasen ya ukomen so paraan na impanggawa to’d saray bengatla. “Saray totoo sirin ontakot ira ed sikato. Agto inmatleken so angan siopa a makabat ed puso,” sinampotan nen Elihu.​—Job 37:24; Isaias 55:9.

Say mabunigas a simbawa nen Elihu so angiparaan na dalan parad si Job pian awaten so kaaruman a bilin nen Jehova a mismo. Diad tua, wala so sakey a mapatnag a panparaan ed baetan na impanrepaso nen Elihu ed “makapakelaw a gawa na Dios,” diad Job kapitulo 37, tan ed dili iran salita nen Jehova ed si Job, a nikurit ed Job kapitulo 38 ya anggad 41. Malinew, a minoria nen Elihu iray bengatla manlapud panmoria nen Jehova. (Job 37:14) Panon a naalig na saray Kristiano so maabig ya alimbawa nen Elihu?

Singa si Elihu, saray manangasikaso nagkalautla so malabay a magmaliw a maabagey tan mapangasi, a tandaan dan sikara met so ag-ayadyari. Marakep no sikaray ontalineng a maalwar ta pian naamtaan iray importantin katuaan tan natalosan iray isyu sakbay a manimbawa. (Uliran 18:13) Niarum ni, diad pangusar na Biblia tan Makasulatan iran publikasyon, naseguro ra a manunaan so punto-de-bista nen Jehova ed sikara.​—Roma 3:4.

Nilikud ed pangitarok na saray praktikal a leksion parad mamatatken, ibabangat na libroy Job ed sikatayo no panon ya arapen iray problema ed asimbang a paraan.

Agmarakep a Kakikiwas ed Mairap Iran Kipapasen

Kinmapuy nisesengeg ed kairapan tan adismaya lapud palso iran managligliwa, sinmakit so linawa nen Job tan awalaay depresyon. “Natawtaw komon so agew a nianakan ko . . . Say kamarerwak sikato so mapaga ed bilay ko,” so nangis to. (Job 3:3; 10:1) Lapud agto kabat a si Satanas so sengegan, inisip ton say Dios so sengegan na saray kalamidad to. Ompatnag ya ontanlan agmakatunongan a sikato​—sakey a matunong a too​—so nepeg a nadusa. (Job 23:10, 11; 27:2; 30:20, 21) Sayan awawey so amulag ed si Job diad arum nin nepeg a kunsideraen tan angipaarap ed sikaton balawen iray pidedeneng na Dios ed katooan. Intepet nen Jehova: “Paandien mo ta ni kakanaan na panangokom ko? Dusaen mo ta, pian napatunong ka?”​—Job 40:8.

Anganko say tampol a reaksion sano nipaarap ed kairapan et say pakaliknan sakey a biktima, a singa ompatnag ya agawa ed si Job. Say kaslakan a kiwas et say pangitepet na, ‘Akin a siak ni? Akin ya aliwan say arum​—a mas mauges nen say siak et pangagayagaan day bilay a relatibon bulos ed saray problema?’ Saraya so negatibon kanonotan a nepeg a sumpaen diad pandalepdep ed Salita na Dios.

Aliwan singa si Job, wala tayo’d kipapasen a mas natalosan iray ankabaleg ya isyun nasasaglawi. Kabat tayon si Satanas so ‘wala ed kaliberliber ya singa omoang a leon a mananap na buagen to.’ (1 Pedro 5:8) Singa imparungtal na libroy Job, panliketan na Diablo so pamuyak ed katooran tayo diad panamegley na pamawala to ed sikatayo na saray problema. Sikato so determinadon mamaneknek ed ibabaga ton sikatayoy Tastasi nen Jehova no marakep labat lay panaon. Kasin nawalaan tayo na pakpel a mangitandoro ed inkasoberano nen Jehova tan diad ontan et paneknekan a matilay Diablo?

Ipapanengneng na alimbawa nen Jesus, tan agnabilang niran matoor ya ariripen nen Jehova, ya arum a pormay kairapan so ngalngali agnapaliisan ed sayan sistema na bengabengatla. Inkuan nen Jesus a saray babangatan to so nepeg a mabulos a ‘manakbat ed panamairapan a palitek da’ no kaliktan dan sikatoy tumboken. (Lucas 9:23, NW) Say personal a “panamairapan a palitek” tayo so nayarin sakey odino dakel ni ed saray kairapan a sinungdoan nen Job​—sakit, ipatey na saray inad-aro, depresyon, irap ed ekonomya, odino isusumpa manlapud saray agmananisia. Antokaman so klase na problema a nayarin kidudungetan tayo, wala so positibon nengneng na situasyon. Nayarian tayon moriaen so kipapasen tayo bilang pankanawnawan pangidemostra na sungdo tan agnagiing a katooran ed si Jehova.​—Santiago 1:2, 3.

Ontan so paraan no panon a kinmiwas iray apostol nen Jesus. Kayarin tuloy na Pentecostes, sikaray nilewet lapud impanpulong nipaakar ed si Jesus. Imbes a nadismaya, sikaray nantultuloy a “malikeliket.” Sikaray magayaga, aliwan lapud mismon kairapan, noagta “lapu’d kinmana ra a nantepel na baing ed ngaran [nen Kristo].”​—Gawa 5:40, 41.

Siempre, aliwan amin a kairapan tayo so onsasabi’d sikatayo bilang resulta na panlilingkor ed si Jehova. Nayarin saratan et resulta na saray problema tayon mismo​—anggan panon. Odino nayarin, agtayo met kasalanan, say problema tayo so akaapekto ed pagmaliw tayon asimbang ed espiritual. Antokaman so kipapasen, say mapaabeban awawey a singa ed si Job so manggawa ed sikatayon natebek no iner so akagawaan tayo na saray lingo. Inaksobi nen Job ed si Jehova: “Binitlak so agko atalosan.” (Job 42:3) Samay makabidbir ed saray lingo to ed onian paraan so mas makaiwas ed mipadpara iran problema ed arapen. Singa ibabaga na proberbio, “say masimpit a too nanengneng to so mauges, tan yamot to so inkasikato.”​—Uliran 22:3.

Sankaimportantian, ipapanonot ed sikatayo na libroy Job a temporaryo lambengat iray problema tayo. Kuan na Biblia: “Ibilang tayo a mapalar so saray managtepel. Nadngelan yo so inpantepel nen Job, tan anengneng yo so angaan ya initer na Katawan [Jehova, NW], no panon a say Katawan [Jehova, NW] maabagey a toloy, tan mapangasi.” (Santiago 5:11) Makapanseguro tayo a si Jehova so manumang met ed katooran na ariripen to natan.

Panpilpilalekan tayo met so panaon sano amin a nengneng na saray problema​—“saray ona a bengatla”—​so linmabas la. (Apocalipsis 21:4) Anggad ipelnak na satan ya agew, onkakanan sakey ya importantin tuloy a giya so libroy Job a makatulong ed sikatayo pian arapen iray problema tekep na kakabatan tan biskeg.

[Paimano ed leksab]

[Litrato ed pahina 24]

“Nengneng moray lurem, a sikaray talagan mas atagey nen say sika.” Diad ontan et tinulongan nen Elihu a natalosan nen Job iray dalan na Dios ya atagtagey nen saray dalan na too