Say Libro na Palsa tan say Biblia

“Say talba so mangutgut ed siak! Agko namorekdek a say ontan a ‘relo’ so onwala ya anggapo so sakey a Managgawa-na-relo.”

​—Voltaire, koma-18 siglon taga Pransyan pilosopo.

SAY eksakton relo so mangisagyat na pangirayew ed inkaonsiano tan talento na managgawa to. Balet anto so nipaakar ed talba a walad kaliberliber tayo? Kasin satan so mangipatnag, anggan diad sakey a sukat, ed personalidad na Manamalsa to?

Ngalngalin 2,000 taon a linmabas, si apostol Pablo, sakey ed saray managsulat na Biblia, so angiter na ebat ed sayan tepet: “Ta saray agnanengneng a kalidad [na Dios] so mabitabitar ya anengneng a nanlapud inkapalsa na mundo, lapud sikara so minurekdek ed saray bengatlan agawa, anggan say inkamaandon pakayari to tan inka-Dios to.” (Roma 1:20) Sirin, anto so naaralan tayo diad pangimaton ed sayan libro na palsa?

No Anto So Ibangat na Relo ed Sikatayo Nipaakar ed Managgawa-na-relo

Say agaylan abig a napepelag-a-danum, say dayat legan na bagyo, say maliwawan labin tawen a napno ed saray nilibulibon bibitewen​—saraya so arum ed saray bengatlan manggawa ed sikatayon mannonot ed sakey a mabiskeg a Manamalsa. Say inkasusto na panagliber na saray planeta so mangipanonot met ed sikatayo, a singa pinanonotan to si Voltaire, a say Amalsa so nepeg a sakey ya Engranden Manangorganisa, sakey a Sankamaongan a Managgawa-na-relo.​—Salmo 104:1.

Saray panduruma ed produkto na dalin​—saray bunga tan saray pisipising ya aawaten tayo ed inkadaakan​—so mantasi met ed inkabunlok na Dios. Saya so pinatua met nen Pablo sanen inyabawag to a say Dios “so ag-anaynan ed inkasikato ya andian na tasi a sikato so nanggawa na maong, a mangiiter ed sikayo na uran a manlapud tawen tan mabungan panaon, a pinano toray kapusoan yo ed inkagnap diad tagano tan gayaga.”​—Gawa 14:17.

No Anto So Ag-ibaga na Relo ed Sikatayo

Say malaknab a panangusisa ed libro na palsa so mangibangat ed sikatayo na nipaakar ed siansia nin arum a kalidad na Dios. Balet no sikatayo so nagnap ya onsaral ed naaralan tayo a manlapud palsa, say pikakabat tayo ed Dios so naynay a limitado. Say managsulat a Pranses a si Robert Lenoble so angipaliwawa ed saya diad libro ton Esquisse d’une histoire de l’idée de Nature, (An Outline History of the Idea of Nature): “Naynay a say too so mangiyarap na imano to ed palsa ta pian natanek to so misteryo to tan nadiskobre to so sekreto to, sakey a sekreton agbalot ompaway ed sakey a laboratoryo.” Masulok a kapaldua ed saray Pranses ya inusisa na Katolikon peryodiko a La Croix​—balanglan sikara so mananisia odino ateista​—so mipakna ed saya tan mangako a say “siensia so agbalot makayarin mangiter na magenap a salaysay ed talba, lapud dakel iran bengatla so wala ed lawak na pilosopya odino relihyon.”

Ngalngalin 3,500 taon a linmabas, say matoor a Job so sinmabi ed parehon konklusyon. Pinatalindeg to so tepet: “Balet say kakabatan​—iner so pakaromogan, tan iner, natan, so pasen na pakatalos?” Kasin sayan kakabatan so naromog ed libro na palsa? “Saray kalinsurong a mismo so angikuan, ‘Aliwan wala ed siak!’ Say dayat met so angikuan, ‘Aliwan wala ed siak!’ Sikato so niyamot ya anggan manlapud saray mata na mabilay tan manlapud saray mantekkiab a palsa na katawenan ed niyamot.”​—Job 28:12, 14, 21.

Iner, sirin, so nepeg tayon laen a pananapan ed sayan kakabatan? Onebat itan lamlamang a libro: “Say Dios so Sakey ya akatalos ed dalan to, tan sikato a mismo so angipaamta ed pasen to.” (Job 28:23) Tan impanabang na Dios so kakabatan to ed katooan diad makapakelkelaw a dalan ed panamegley na Salita to, say Biblia.

Nikadkaduman Pikakabat a Manlapud Biblia

Say Biblia so mangiter ed sikatayo na nikadkaduman pakatebek diad gapowan na katooan. Ibabaga to ed sikatayo ya imparaan na Dios so dalin tan insan inkarga to so inmunan sanasawan too. Saray inmunan atateng tayo so akapambilay komon a maando ed ayadyarin kaliberliber. Balet sikara so nanrebelde, tan diad kasalanan da et nilukasan da so dalan a para ed amin a mauges​—a pati say kasalanan tan patey​—ya amairap ed katooan.​—Genesis, kapitulo 1 ya anggad 3; Roma 5:12-21.

Ibabaga met na Biblia ed sikatayo ed detalye so kurang ya inala na Dios diad pamolaing ed kipapasen. Nilibulibon taon ed kayari nen Adan tan si Eva, say dilin Anak na Dios, si Jesus, so linma ed dalin pian iter to ed katooan so pankanawnawan mipulangan ed Dios. Sirin inyarap nen Kristo ed totoo a mangagamil na pananisia ed sikato tan mamidbir ed kablian na bagat to so ilalo ed maandon bilay diad sakey a dalin a magmaliw a paraiso.​—Lucas 23:43; Juan 3:16.

Sayan ilalo so niyopresi ed balang sakey ed sikatayo. Pian satan so nabidbir et nepeg a sikatayo so onggamor na ‘suston pikakabat ed alenleneg a tuan Dios tan ed saman so imbaki to, si Jesu-Kristo.’ Sikatayo met so nepeg a manbilay a tukoy ed satan ya ilalo. Sayan suston pikakabat so naromog ed Biblia.​—Juan 17:3; Santiago 2:24-26.

Kasin labay yo so nawalaan na detalyadon ebat ed saray tepet a singa say, Iner so nanlapuan na too? Anto so nagawa kayari na ipatey? Antoray sengegan na problema na katooan? Kasin wala so anggan anton ilalo a sikara so naresolbe ed arum ya agew? Kapigan tan panon so pangitarok na Dios ed saray ayadyarin kipapasen a para ed katooan? No ontan, pasesegen mi kayon onnengneng ed Biblia, saya so alenleneg a libron mangiter ed sikayo na saray ebat a manlapud Dios na talba tan say alenleneg a libron nankarga “ed letnegan na sakey ya ilalo na andi-anggaan a bilay.” Say gagala na saray palapagan na Sosyedad na Watchtower et say itulong ed sikayon makagamor ed sarayan ebat diad Biblia yo.​—Tito 1:1, 2.

[Litrato ed pahina 5]

Ipaparungtal na talba iray nengneng na personalidad na Dios

[Litrato ed pahina 6]

Say Biblia lambengat so makapangibaga ed sikatayo nipaakar ed saray gagala na Dios ed too tan say dalin