Sinmabi la so ‘Oras na Panangukom’

IMPASAKBAY ed sikatayo na unor a libro na Biblia ya Apocalipsis a say anghel ed kapegleyan na tawen so walaan na “andi-angga a maabig a balita pian sikato so ipulong to.” Inkuanto ed maksil a boses: “Takotan yo so Dios, tan iter yo ed sikato so gloria: ta say oras na pangukom to sinmabi la.” (Apocalipsis 14:​6, 7) Kalaktip ed satan ya ‘oras na panangukom’ so panangiyabawag tan panangipaakseb ed panangukom na Dios. Say “oras” so antikey labat a panat na panaon. Onsabi so pangipakseb ed panangukom bilang kapantokan na ‘unor iran agew,’ a pambibilayan tayo la natan.​—2 Timoteo 3:1.

Say ‘oras na panangukom’ so maabig a balita parad saray mangaaro na inkatunong. Satan so panaon sano itarok na Dios so pakainawaan ed saray lingkor to, a maniirap lapud panangontrol na sayan marawal, andian na aro a sistema na bengabengatla.

Diad kaplesan, sakbay a manampot so ‘oras na panangukom’ diad pakaderal na peles a marelmeng a sistema na bengabengatla, papasesegen itayon: ‘Takotan so Dios tan iter ed sikato so gloria.’ Kasin gagawaen yo itan? Aliwa labat iyan pangibagay, “Manisia ak ed Dios.” (Mateo 7:21-23; Santiago 2:​19, 20) Say manepeg a takot ed Dios so mamakiwas ed sikatayon mangigalang ed sikato. Mamakiwas itan ed sikatayon onarawi ed mauges. (Uliran 8:13) Ontulong itan ed sikatayon mangaro ed maong tan manggula ed mauges. (Amos 5:​14, 15) No pagalangan tayoy Dios, ontalineng itayo ed sikato tekep na baleg a respeto. Paliisan tayoy magmaliw ya okupadon maong ed arum a bengatla a napaulyanan tayo lay regular a panagbasa ed Salita to, say Biblia. Manmatalek itayo ed sikato ed amin a panaon tan tekep na interon puso tayo. (Salmo 62:8; Uliran 3:​5, 6) Bidbiren na saramay peteg a mangigagalang ed sikato, a bilang Manamalsa na tawen tan dalin et sikatoy Sankatalbaan a Soberano, tan sikaray simamaaron manpapasakop ed sikato bilang Soberano ed bilay da. No namoria tayo a nepeg tayon imanoen a nagkalalo irayan pamaakaran, agtayo la ipapaleen a gawaen itan.

Say panaon a kipaakseb na panangukom a sinalita na anghel so kabkabat met bilang “say agew nen Jehova.” Satan ya “agew” so asagmak na kadaanan a Jerusalem nen 607 K.K.P. lapud saray manaayam ditan so agtinmalineng ed saray pasakbay nen Jehova panamegley na saray propeta to. Lapud impaleen da so agew nen Jehova ed nonot da, lalo ran inyan ed kapeligroan so bilay da. Pinasakbayan ira nen Jehova: “Sikato so asingger tan masiglat a maomaong.” (Sofonias 1:14) Sananey nin “agew nen Jehova” so asagmak na kadaanan a Babilonia nen 539 K.K.P. (Isaias 13:​1, 6) Lapud matalek ira ed saray trinsira tan ed saray dirios da, imbaliwala na saray taga-Babilonia iray impasakbay na saray propeta nen Jehova. Balet diad loob na sakey a labi et tinalo na saray Medo tan Persiano so makapanyarin Babilonia.

Anto so aarapen tayo natan? Say sananey tan mas malaknab ya “agew nen Jehova.” (2 Pedro 3:11-14) Niyaabawag la so panangukom na Dios sumpad ‘Babilonia a Baleg.’ Unong ed Apocalipsis 14:​8, onia so iyaabawag na anghel ed tawen: “Naplag, naplag so Babilonia saman so baleg.” Agawa la itan. Agla naamper na satan iray mandadayew ed si Jehova. Malaknab lan niwawalwal so inkabulok to tan pibibiang to ed bakal. Asingsingger la so kapantokan lan kaderal to. Lapud satan, papasesegen na Biblia iray totoo ed amin a pasen: “Ompaway kayo ed sikato [Babilonia a Baleg] . . . pian agkayo nalanor ed saray kasalanan to, tan agkayo manlikna ed saray bakbak to: Ta saray kasalanan to sinmabi ra angga ed tawen, tan say Dios anonotan to so kaugsan to.”​—Apocalipsis 18:​4, 5.

Anto so Babilonia a Baleg? Satan so sankagloboan a sistema na relihyon a walaan na saray piulibayan ed kadaanan a Babilonia. (Apocalipsis, kapitulo 17, 18) Konsideraen so pigaran panulibayan:

• Saray saserdote ed kadaanan a Babilonia so pirmin akibabali ed saray mapolitikan pakurang na nasyon. Tua met itan ed maslak a relihyon natan.

• Saray saserdote na Babilonia so mabetbet ya angiyalibansa ed pibabakal na nasyon da. Saray relihyon natan so mabetbet a mangidadaulo ed panamendisyon ed saray sundalo sano manbabakal iray nasyon.

• Saray bangat tan ag-agamil na kadaanan a Babilonia so nansumpal ed graben imoralidad na nasyon. Lapud ibabaliwala na saray relihyoson lider natan so estandarte na Biblia ed moral, kasmak la so imoralidad ed limog na saray klero tan saray lego. Mabitabitar met a makasengeg ed pirerelasyonan na Babilonia a Baleg ed mundo tan saray mapolitikan sistema na satan, sikatoy ililitrato na Apocalipsis bilang balangkantis.

• Ibabaga met na Biblia a say Babilonia a Baleg so manbibilay ed “likeliket.” Diad kadaanan a Babilonia, kinayarian na muyongan na templo so maaawang a dalin, tan saray saserdote so nagmaliw a prominente ed panagnegosyo. Natan, likud ed saray pasen ed panagdayew, say Babilonia a Baleg so walaan na dakel a negosyo tan kaykayarian. Saray bangat tan saray holiday to so mamapayaman a maong ed sikato tan ed arum diad lawak na negosyo.

• Say panangusar ed saray imahen, mahiko, tan panagsalamangka so kaslakan ed kadaanan a Babilonia, a singa met ed dakel a paspasen natan. Say ipapatey so minoria bilang paraan pian makaonla ed sananey a klase na bilay. Say Babilonia so napno na saray templo tan kapilya bilang panamagalang ed dirios na satan, balet sinmumpa iray taga-Babilonia ed saray mandadayew ed si Jehova. Ontan met iran sisiaen tan ag-agamil so pakabidbiran ed Babilonia a Baleg.

Nen inmuunan panaon, inmaneobra nen Jehova so mabiskeg a mapolitika tan militar iran nasyon pian dusaen iraman so angipatnag na mapekder a panangibaliwala ed sikato tan ed linawa to. Kanian say Samaria so dineral na saray Asiryano nen 740 K.K.P. Say Jerusalem so impankibalatar na saray taga-Babilonia nen 607 K.K.P. tan saray Romano nen 70 K.P. Ontan met, say Babilonia so kinubkob na saray Medo tan Persiano nen 539 K.K.P. Diad panaon tayo, impasakbay na Biblia a saray mapolitikan gobierno, a singa say maatap ya ayep, so ombuelta ed “balangkantis” tan lakseban da, ya iwalwal da so peteg a pakabidbiran ed sikato. Sikatoy sigpot dan deralen.​—Apocalipsis 17:16.

Kasin talagan gawaen itan na saray gobierno ed mundo? Ibabaga na Biblia ya ‘iyan na Dios [itan] ed saray kapusoan da.’ (Apocalipsis 17:17) Satan so bigbigla, ag-iilaloan, makapakigtot, agnataltalaranan.

Panon so nepeg mon ikiwas? Tepetan moy inkasika: ‘Kasin mibibiang ak ni ed relihyoson organisasyon ya alaokan na saray bangat tan ag-agamil a pakabidbiran bilang kabiangan na Babilonia a Baleg?’ Anggano aliwa kan kabiangan, nayarin tepetan moy inkasika: ‘Kasin aabuloyan koy espiritu na satan a mangimpluensya ed siak?’ Anton klase na espiritu? Sakey ya espiritun miaabobon ed mabanday iran moralidad, panangaro ed materyal a kaykayarian tan likeliket imbes a panangaro ed Dios, odino ginagalan panangibaliwala (anggan ed singa angkelag a bengatla) ed Salita nen Jehova. Isipen pan maong so ebat mo.

Pian nagamoran tayo so abobon nen Jehova, importante a paneknekan tayo panamegley na kiwas tan pilpilalek na puso tayo ya ag-itayo kabiangan na Babilonia a Baleg. Agla itan ipapaleen. Diad pamapasakbay ed sikatayo ed biglan isabi na anggaan, onia so ibabaga na Biblia: “Unong na onia a siglat so kabagbag na Babilonia, say baleg a syudad, et kapiganman agla naromog a balot.”​—Apocalipsis 18:21.

Balet wala niray kaaruman a nagawa. Diad sananey ya aspekto na satan ya ‘oras na panangukom,’ ukomen nen Jehova a Dios so sankagloboan a mapolitikan sistema, saray manuley na satan, tan amin a mangibaliwala ed makanepegan a pananguley to diad panamegley na mangatatawen a Panarian to a nimatalek ed si Jesu-Kristo. (Apocalipsis 13:​1, 2; 19:19-​21) Ililitrato na mapropetikon pasingawey a nikurit ed Daniel 2:​20-​45 so mapolitikan pananguley manlapud panaon na kadaanan a Babilonia anggad kaplesan bilang sakey a baleg ya imahen a ginawa ed balitok, pilak, gansa, balatyang, tan langa. Nipaakar ed panaon tayo, onia so impasakbay na propesiya: “Say Dios na tawen mamaalagey naani na sakey a panarian ya anggan kapigan agnaani naderal.” Tan nipaakar ed gawaen ni na Panarian legan na ‘oras na panangukom’ nen Jehova, iyaabawag na Biblia: “Buybuyaken to naani tan upoten to naani so saraya ya amin a [ginawa na too a] panarian et sikato so mansiansia lawas.”​—Daniel 2:44.

Papasakbayan na Biblia iray tuan managdayew sumpad pangaro ed “saray bengatla ed mundo,” salanti, say klase na panagbilay ya iyaalibansa na sayan mundo a sian ed tuan Dios. (1 Juan 2:​15-​17) Kasin saray desisyon tan kiwas mo so pakapatnagan a sigpot kan ondadapag ed Panarian na Dios? Peteg kasin iyuunam itan ed bilay mo?​—Mateo 6:33; Juan 17:​16, 17.

[Kahon ed pahina 14]

Kapigan Onsabi so Anggaan?

“Ta dia ed oras ya agyo is-isipen [et] onsabi so Anak na too.”​—Mateo 24:44.

“Mantultuloy kayon manbantay . . . lapud agyo amta so agew nisay oras.”​—Mateo 25:​13, NW.

“Agmanbayag.”​—Habacuc 2:3.

[Kahon ed pahina 14]

Kasin Manguman so Kabibilay Yo no Amta Yo so Isabi na Anggaan?

No amta yon agni onsabi ed loob na pigaran taon so manasingger lan panangukom na Dios, kasin manguman so kabibilay yo? No say anggaan na sayan daan a sistema et agni sinmabi ed inilaloan yo, kasin abuloyan yo itan a mamatayer ed panaglingkor yo ed si Jehova?​—Hebreos 10:36-38.

Lapud agtayo amta so eksakton oras, mangiter itan ed sikatayo na pankanawnawa pian ipatnag a walaan itayo na malinis iran motibo diad panlilingkor tayo ed Dios. Namoria na saraman so mikabat ed si Jehova a say kalimbuatan a panangipatnag na seseg et agmakapaliket ed Dios, a mikabat ed no anto so walad puso tayo.​—Jeremias 17:10; Hebreos 4:13.

Parad saraman so talagan mangaaro ed si Jehova, sikatoy lawas manunaan ed bilay da. Singa ed arum a totoo, saray tuan Kristiano so nayarin walaan na sekular a trabaho. Balet, say kalat da et aliwan pian manpayaman, noagta pian nawalaan na magenap a materyal parad tagano tan kawesen tan nawalaan na daiset ya inabang ed arum. (Efeso 4:28; 1 Timoteo 6:7-12) Panliliketan da met so maabig a panligliwaan tan temporaryon inkauman na rotina ra, balet say pilalek da et pian narepreskoan, aliwan pian aligen so gagawaen na arum. (Marcos 6:31; Roma 12:2) Singa si Jesu-Kristo, panliliketan da so panggawa ed linawa na Dios.​—Salmo 37:4; 40:8.

Kaliktan na saray tuan Kristiano so manbilay tan manlingkor ed si Jehova ed ando lan ando. Mablin tuloy itan ya ilalo lapud nepeg dan talaranan iray bendisyon ya agla manbayag nen say abaloan na arum.

[Kahon/Litrato ed pahina 15]

Say Isyu Nipaakar ed Inkasoberano

Pian natalosan no akin ya aabuloyan na Dios so pirmin kairapan, kaukolan tayon talosan so isyu nipaakar ed inkasoberano. Anto so inkasoberano? Satan so inkasupremo ed autoridad.

Lapud si Jehova so Manamalsa, sikatoy walaan na kanepegan a manuley ed interon dalin tan ed amin a manaayam ditan. Balet, ipapaliwawa na Biblia a diad kasakbayan na awaran na too et sinuppiat so inkasoberano nen Jehova. Ibabaga nen Satanas a Diablo a si Jehova et mapegpeget, a tinilaan To so inmunan atateng tayo nipaakar ed nagawa no ibaliwala ra so ganggan na Dios tan no gawaen da iray bengatla ed dilin paraan da, tan talagan magmaliw a mas maabig no uleyan day inkasikara a biig ed Dios.​—Genesis, kapitulo 2, 3.

No dineral a tampol na Dios iray rebelde, mangipatnag itan na pakapanyari to, balet agnaresolbi iray isyu a pinalesa. Imbes a deralen a tampol nen Jehova iray rebelde, inabuloyan to so amin ya intelihentin pinalsa to a makanengneng ed pansumpalan na panagrebelde. Anggaman saya so angilanor ed kairapan, angitarya met itan na pankanawnawa parad sikatayo pian nianak.

Sakey ni, diad baleg ya impangisakripisyo to, simamaaron intarya nen Jehova so probisyon pian saray katooan ya ontulok ed sikato tan mangagamil na pananisia ed dondon bagat na Anak to so nibulos ed kasalanan tan ed saray epekto na satan tan manbilay ira ed Paraiso. No nakaukolan, diad panamegley na kioli ed bilay.

Say pangiyabuloy ed panaon pian nasolbar irayan isyu so angiter met na pankanawnawa ed saray lingkor na Dios pian nipanengneng da a nayarian day onkiwas ed aro na Dios tan napaneknekan day katooran da ed si Jehova antokaman so sirkumstansya. Importante so panolbar ed isyu nipaakar ed madibinon inkasoberano, pati ed misiglaotan ya isyu nipaakar ed katooran na too, pian nipaseguro so manepeg a respeto ed saray totontonen ed uniberso. No anggapo itan, agbalot niwala so tuan kareenan.a

[Paimano ed leksab]

[Litrato]

Manampot so sankagloboan a sistema na mapolitikan pananguley