Nirarayew so Makapadinayew a Managbangat Lapud Saray Pasilidad Tayo

Labalabay nen Jehova ya ibangat iray totoo to. Kanian nanggawa so organisasyon tayo na saray eskuelaan pian ipasal iray estudyante ed saray asainmin dad panaglingkor ed si Jehova. Sakey lay School for Kingdom Evangelizers (SKE). Diad apalabas iran taon, aliwan saray curriculum labat na eskuelaan so in-improve na organisasyon tayo, noagta anggan saray pasilidad ya panaralan. Say manunan goal et pian mas mainomay so panaral na saray estudyante tan pambangat na saray instruktor. Panon ya makakatulong iray donasyon yo pian nagawaan itan ya goal?

Mas Dakel ya Estudyante tan Mas Marakep Iran Pasilidad

Diad dakel a taon, saray teokratikon eskuelaan et nagagawa diad saray Kingdom Hall tan Assembly Hall. Akin balet ya angipaalagey tan nan-renovate tayo na dakel ya pasilidad ya usaren a para labat ed saray teokratikon eskuelaan? Walay taloran rason.

Ombabaleg so pankaukolan. “In-report na saray branch office ya kaukolan so dakel ya agagin ontulong,” so imbaga nen Christopher Mavor, katulongan na Service Committee na Mananguley ya Ulop. “Singa bilang, nen 2019, manga 7,600 ya SKE graduate so kailangan na Brazil branch ya ontulong pian naasikaso iray pankaukolan diad branch territory da.” In-report met na United States branch ya kailangan day dakel ya kualipikadon payunir ya mangi-train ed arum parad special metropolitan public witnessing, panagpulong ed pier tan prisoan. Kakkaukolan met iray brother ya manlingkor diad Local Design/Construction Department tan diad Hospital Liaison Committee. Makatulong iray nan-graduate ed SKE ed saratan ya pankaukolan.

Ondarakel iray mana-apply. Diad dakel ya branch, amayamay ya agagi so nan-apply pian makapanaral ed saray teokratikon eskuelaan—mas dakel so bilang da nen say bilang na saray nayarin makapanaral. Singa bilang, diad Brazil branch, manga 2,500 so nan-apply ed SKE diad loob labat na sakey taon. Balet lapud limitado so nakarga na saray pasilidad, 950 labat ya estudyante so inaprobaan na branch ya makapanaral.

Tuloyan na saray manaral. Nen diad Kingdom Hall o Assembly Hall ni so panaaralan na saray estudyante, maslak et miaayam irad abung na agagi ya asingger ditan. Balibali itan ya uksoyan diad saray bansa ya pigara labat a klase so inyeskedyul ya manaral kada taon. Balet diad saray lugar ya piga-pigara so inyeskedyul ya klase, ompan nairapan iray agagi ya patuloyen ed abung da iray estudyante diad loob na dakel ya bulan. Kanian wala ray pasilidad ya intarya ya asingger ed panaralan na saray estudyante pian ditan so tuloyan da.

Say nagastos parad sakey ya pasilidad ya walay sakey ya classroom, tan kuarto parad saray instruktor tan na manga 30 ya estudyante, kaiba lay arum nin kailangan da, et onabot ed milyon-milyon ya dolyar (U.S.), depende ed lokasyon tan situasyon.

No Anto ray Walad Pasilidad ya Panaralan

Mabetbet ya ipapaalagey iray eskuelaan diad mareen ya lugar, anggapo iratan ed angkabaleg ya syudad balet asingger ed terminal na luluganan. Mas pipilien na organisasyon so mangipaalagey na pasilidad diad saray lugar ya dakel so agagi ya nayarin ontulong tan manmintina na saray bilding tan kagawaan ditan.

Diad saray pasilidad et wala ray librarya, study area, computer, printer, tan arum nin nausar ed panag-aral. Maslak et walay dining room ya ditan saniiban mangan iray estudyante tan saray instruktor da. Wala met so magenap a pasen parad pan-exercise tan panrelaks da.

Implanon maong so impandesinyo na saray classroom. “Nampatulong kami ed Theocratic Schools Department pian naseguradon komportable ya manaral iray estudyante diad set up na classroom da,” so imbaga nen Troy, ya manlilingkor ed Worldwide Design/Construction Department diad Warwick, New York. “Angiter ira na instruksion tungkol ed kabaleg tan set-up na saray classroom, say lighting, tan saray uusaren ed audio-video.” Oniay imbaga nen Zoltán, instruktor ed SKE diad Hungary tungkol ed saray audio equipment: “Nen unaan, anggapoy uusaren min microphone, kanian babagaan mi ray estudyante ya kasilan day boses da. Pero natan, wala lay microphone ed kada lamisaan kanian agmi la itan problema!”

“Espisyal Kamin Bisita nen Jehova”

Antoy epekto na saray pinarakep ya pasilidad tayo ed saray instruktor tan estudyante? “Balibali tan mareen dia,” so imbaga nen Angela, ya nanaral ed SKE diad Palm Coast, Florida, U.S.A. “Talagan pinannonotan so set-up na classroom tan saray kuarto mi pian makapanpokus kami ed panaaral mi.” Nai-enjoy nen Csaba, instruktor diad Hungary, ya nakaiban mangan iray estudyante. Imbaga to ya lapud saratan a pagkakataon, “makakapanistorya iray estudyante tungkol ed sarili ra tan saray eksperiensya ra. Kanian mas nakakabat mi ra. Lapud satan, mas epektibo min nibangat so curriculum.”

Parad saray estudyante tan instruktor, sayan balon uksoyan pian na-improve iray pasilidad na eskuelaan et bendisyon na “Makapadinayew a Managbangat” tayo, si Jehova. (Isaias 30:20, 21) Oniay imbaga na sakey ya sister ed Pilipinas ya nanaral ed SKE diad sakey ya pasilidad ya pinagmaliw ya eskuelaan: “Lapud inkarakep tan set-up na eskuelaan, alikna min aliwa kami labat ya estudyante noagta espisyal kamin bisita nen Jehova. Labay to ya maliket tan komportable kami legan min aaralen so Salita to.”

Wala ray pasilidad na eskuelaan ya ipapaalagey, ire-renovate, tan namimintina lapud saray donasyon yo, ya maslak et ipapawit yo panamegley na donate.jw.org. Baleg ya salamat ed inkamaiter yo.