Kasin Naiwasan Iray Graben Epekto na Climate Change no Mankakasakey so Amin ya Bansa?—Antoy Ibabaga na Biblia?

Asumpal so COP27 United Nations Climate Change Conference nen Simba, Nobyembre 20, 2022. Apankakasakeyan na saray inmatendin lider ya mangiter iray kuarta diad saray mairap ya bansan makakaeksperiensyay kalamidad, balet iisipen na dakel ya totoo ya aliwan satan so solusyon ed sayan problema.

• “Maliket ak ta apandesisyonan tayoy mangiter na kuarta pian natulongan iray apektado,” so imbaga nen António Guterres, secretary-general na United Nations, nen Nobyembre 19, 2022. “Balet amta tayon aliwan magenap itan . . . Mansasakit nin siansiay planeta tayo tan talagan kakkaukolan to lay tulong.”

• “Siansia nin walad peligro so planeta tayo lapud climate change.”—Mary Robinson, datin presidente na Ireland tan datin UN High Commissioner for Human Rights, Nobyembre 20, 2022.

Saray kabataan so talagan mas aburido ed no antoy nagawa ed planeta tayo diad arapen. Balet, sarag kasi na saray bansa so mantutulongan tan natoor da kasi iray im-promise da pian nasolusyonan so climate change? Antoy ibabaga na Biblia?

Makapankakasakey kasi iray bansa tan nasolusyonan da kasi so problema?

Ibabaga na Biblia ya anggano antoy panlabay tan pansagpot na sarayan bansa, limitado nin siansia so nagawaan da pian nasolusyonan so climate change. Imanoen so duaran rason:

• “Samay pikewet et agnipetek.”—Eclesiastes 1:15.

  Say labay ya ibaga: Agkanepegan na too ya uleyan so sarili to, kanian limitado labat so nagawaan na saray gobierno. (Jeremias 10:23) Anggano mankakasakey ni so amin ya bansa, agdan talaga nasolusyonan iray problema na mundo, anggan antoy pansagpot da.

• “Ta saray totoo et magmaliw a maaro ed sarili ra, maaro ed kuarta, . . . agda labay so mipaknaan.”—2 Timoteo 3:2, 3.

  Say labay ya ibaga: Dugaruga so impangibaga na Biblia ya dakdakel so makasarilin totoo natan ed panaon tayo tan agda labay so mikasakey pian ondakep so kipapasen na mundo.

Wala ni pag-asa

Ag-akadepende ed saray im-promise na gobiernoy too so iyabig na planeta tayo. Imbes, amili so Dios na makanepegan ya manuley ed mundo, si Jesu-Kristo. Oniay ibabaga na Biblia tungkol ed sikato:

• “Tan niiter naani ed sikato so gobierno. Sikatoy tawagen a Makapakelaw a Mananimbawa, Makapanyarin Dios, Andi-anggaan ya Ama, Prinsipe na Kareenan.”—Isaias 9:6, paimanod leksab.

Si Jesus so Ari ed Panarian na Dios, odino gobierno ed tawen. (Mateo 6:10) Walay pakayari tan karunongan to, tan labay to ya asikasoen so planeta tayo tan amin ya manaayam dia. (Salmo 72:12, 16) Panamegley na sayan gobierno ed tawen, idaulo to so pangekal ed amin ya “manederal ed dalin,” tan paabigen toy mundo pian ondakep lamet so kipapasen na satan.—Apocalipsis 11:18; Isaias 35:1, 7.

Pian naaruman ni antam nipaakar ed no anton talagay solusyon ed graben epekto na climate change, basaen so artikulon “Say Climate Change tan Say Bilay Tayod Arapen—No Antoy Ibabaga na Biblia.”