TEPET NA SARAY KABATAAN

Kasin Nepeg ya Manpabautismo Ak?—Part 1: Say Labay ya Ibaga na Bautismo

Kada taon, dakel so manpapabautismo ya kabataan ya binmaleg ed pamilya na saray Tasi nen Jehova. Kasin iisipen mo met lay manpabautismo? No on, kaukolan mo sirin ya natalosan no antoy labay ya ibaga na dedikasyon tan bautismo.

Anto so bautismo?

Say bautismo ya tutukoyen na Biblia et kompleton pangipalseb odino pangilubog ed danum—aliwa labat ya panwalsik na danum—tan importantin maong so isisimbolo na satan.

No ilubog ka ed danum legan na bautismom, ipapanengneng mo ed publiko ya aliwa lan say labay mo so gawaen mo.
No kaimwas mo ed danum, ipapanengneng mo ya manlapud satan et manbilay ka la diad paraan ya labay na Dios.

No manpabautismo ka, ipapanengneng mo ed amin ya bibidbiren mon si Jehova so walaay autoridad ya mangibaga no antoy duga tan aliwa, tan ipapaamtam la so sipan mo ya lanang mon gawaen no antoy labay to.

Isipen pa: Akin et labay mon naamtaan na amin ya labay mon unoren si Jehova ed interon bilay mo? Nengnengen so 1 Juan 4:19 tan Apocalipsis 4:11.

Anto so dedikasyon?

Antis kan manpabautismo, nepeg mo nin idedika so sarilim ed si Jehova. Panon?

Diad personal ya pikakasim, ibagam ed si Jehova ya isisipan mo ya manlingkor ka ed sikato ya anggapoy anggaan tan gawaen moy labay to anggan antoy nagawa tan anggan dumay gawaen na arum.

No manpabautismo ka, ipapanengneng mo ed arum ya indedikam lay sarilim. Ipapanengneng met na satan ya iiter mo lay bilay mo ed si Jehova kanian sikato lay akanggawad sika.—Mateo 16:24.

Isipen pa: Akin ya mas maong so bilay mo no si Jehova lay akanggawad sika? Nengnengen so Isaias 48:17, 18 tan Hebreo 11:6.

Akin ya importante so bautismo?

Imbaga nen Jesus ya kaukolan so bautismo ed pagmaliw ya disipulo to. (Mateo 28:19, 20) Kanian kaukolan ni itan anggad natan parad saray Kristiano. Diad tua, ibabaga na Biblia ya kaukolan itan pian niliktar itayo.—1 Pedro 3:21.

Balet, dapat say motibom ed pampabautismom et lapud inarom si Jehova tan importante ed sika so relasyon mod sikato. Nepeg ya say rason mo et singa samay imbaga na salmista: “Antoy ibales kod si Jehova ed amin a maabig a ginawa to parad siak? . . . Ontawag ak ed ngaran nen Jehova. Tooren ko ray sinambaan kod si Jehova.”—Salmo 116:12-14.

Isipen pa: Anto lay maabig ya ginawa nen Jehova parad sika, tan antoy ibales mod sikato? Nengnengen so Deuteronomio 10:12, 13 tan Roma 12:1.

Saray lingon iisipen na arum tan no antoy tua

SAY LINGON IISIPEN NA ARUM — Saray adulto labat so walaan na kakaukolanen ya inkatatken pian makapampabautismo.

NO ANTOY TUA — Aliwan say edad labat so basiyan na inkatatken na sakey, noagta nasukat met itan ed no kasin inaro toy Jehova tan mabulos ton unoren. Anggano ugaw ni Jose, Samuel, tan Josias et impanengneng dan susto lay inkatatken da. Ontan met so gagawaen na dakel ya kabataan natan.

Oniay ibabaga na Biblia: “Say sakey ya ugaw et nakabat diad saray kiwas to, no kasin malinis tan duga so kagagawa to.”—Proverbio 20:11.

SAY LINGON IISIPEN NA ARUM — No manpabautismo la ray kakaarom, dapat manpabautismo ka met la.

NO ANTOY TUA — Sarilim ya desisyon so pangidedikam na bilay mo tan pampabautismom tan nepeg ya gawaen mo labat itan lapud talagan labalabay mo la. Aliwa itan ya kustombre ya kaukolan mon gawaen no asabim lay edad ya halos amin et manpapabautismo la odino iisipen mon iilaloan na arum ya manpabautismo ka la.

Oniay ibabaga na Biblia: ‘Saray totoo na Dios et mabulbulos dan iyapay so inkasikara.’—Salmo 110:3.

SAY LINGON IISIPEN NA ARUM — No agka ni abautismoan, anggapoy eebatan mo ed saray gagawaen mo.

NO ANTOY TUA — Aliwan no abautismoan ka la insan ka labat la nawalaan na eebatan ed si Jehova, noagta no antam no antoy duga tan aliwa ed pakanengneng nen Jehova, wala lay eebatan mo ed sikato.

Oniay ibabaga na Biblia: “No say sakey et amta ton gawaen no antoy duga ingen ta agto gagawaen, sikatoy mankakasalanan.”—Santiago 4:17.

TIP: No say pakaliknam et singa agmo nasarag iray responsabilidad na sakey ya dedikado tan bautismadon Kristiano, mas maabig no manggawa kay paraan pian natalosan moy sarilim tan nalabanan mo itan ya naliliknam. Makatulong so pambasam ed Kapitulo 37 na libron Ang mga Tanong ng mga Kabataan—Mga Sagot na Lumulutas, Tomo 2.