TEPET NA SARAY KABATAAN
Akin et Kaukolan Koy Man-sorry?
Antoy gawaen mo ed sarayan situasyon?
Nampasnokan ka nen teacher mo ta aliway gagawaen mo legan na klase yo.
Kasin man-sorry kad teacher mo anggano parad sika et asobraan to labat so reaksion to?
Naamtaan na kaarom ya walay imbagam ya makapainsulto nipaakar ed sikato.
Kasin man-sorry kad kaarom anggano iisipen mon tua met may imbagam?
Sinmyodot kad si Papam kanian inebat-ebatan mo.
Kasin man-sorry kad si Papam anggano iisipen mon kasalanan to kanian sinmyodot ka?
On so ebat ed saratan ya taloran tepet. Balet akin et kaukolan moy man-sorry anggano iisipen mon duga met so ginawam?
Akin et man-sorry ka?
No man-sorry ka, matured ka. No awaten mo ya walay aliwan imbagam odino ginawam, ipapanengneng mon ipapasal mo la iray ugalin makatulong no adulto ka la.
“No mapaabeba tan maanos ka, mainomay moy man-sorry tan dengeley ibaga na arum.”—Rachel.
No man-sorry ka, nayarin nipawil so maong ya ulopan. Saramay manso-sorry et mas importante ed sikara so maong ya ulopan nen say napaneknekan da ya aliwan sikaray akankasalanan.
“Anggano iisipen mon anggapo met so kasalanan mo, sika lay unonan man-sorry pian ompawil so maong ya ulopan. Anggapoy nabalang ed sika no man-sorry ka, nipawil ni ingen na satan so pankakaaro yo.”—Miriam.
No man-sorry ka, balibali liknaan mo. Ambelat so liknaan mo no antam ya asakitan so arum lapud imbagam odino ginawam. Balet no nan-sorry ka la, onlemew so liknaan mo.a
“No maminsan napansalitaan ko na ansakit si Mommy tan si Daddy. Amtak ya aliwa man. Pero mair-irap koy man-sorry. Balet no akapan-sorry ak la, mas balibali liknaan ko ta amtak ya nipawil koy maong ya ulopan min pamilya.”—Nia.
No antam ya walay asakitan mo, singa walay ambelbelat ya sasakbaten mo, pero no nan-sorry ka la, nalemewan lay liknaan mo
Mainomay kasi man-sorry? Andi. Oniay inamin nen Dena, sakey ya biin kabataan ya aminpiga lan nan-sorry lapud aliwan marespeto ed si Mama to: “Mair-irap so mangibagay ‘Sorry.’ Singa walay ombabara ed beklew ko kanian agko itan nibaga.”
No panon so pan-sorry
Mas maabig no personal kan man-sorry. No personal kan man-sorry ed toon asakitan mo, nanengneng to ya manlalapud pusom itan. Pero no diad text mo labat ibaga, ompan agmanisia ed sika. Anggano walay iba ton emoji na maermen ya lupa, ompan isipen to ya aliwa kan sincere ed ibabagam.
Tip: No agka makapan-sorry ed personal, ompan sarag moy ontawag odino manggaway card. Antokaman so paraan ya gawaen mo, isip mon maong so ibagam.
Prinsipyo ed Biblia: “Say puso na matunong et mandadalepdep antis ya onebat.”—Proverbio 15:28.
Man-sorry kan tampol. No ipaleen moy pan-sorry ed toon asakitan mo, ompan onggrabe so problema tan agkayo komportable ed sakey tan sakey.
Tip: Mangi-set kay goal—singa bilang, ‘Man-sorry ak natan.’ I-set moy panaon no kapigan ka man-sorry, tan gawam itan.
Prinsipyo ed Biblia: “Miaregloan kan tampol.”—Mateo 5:25.
Man-sorry ka ya manlapud puso. No ibagam ya, “Sorry ta ontay naliliknam,” aliwan nanlapud puso itan. “Mas respetoen ka na toon asakitan mo no aminen mo ya asakitan mo lapud ginawam,” so imbaga na sakey a biin kabataan ya si Janelle.
Tip: Man-sorry ya anggapoy kondisyon. Agmo ibabagan “Man-sorry ak ed sika basta man-sorry ka met ed siak.”
Prinsipyo ed Biblia: “Seetan tayon gawaen iray bengatlan mamapawala na kareenan.”—Roma 14:19.
a No abalang odino aderal moy gamit na arum, mas maabig no agka labat manso-sorry noagta bayaran odino salatan mo itan.