Antoy Ibabaga na Biblia Nipaakar ed Pikakaaro?
Say ebat na Biblia
Makatulong so pikakaaro pian magmaliw tayon maliket tan maong so pansumpalan tayo. Say maong ya sankaaro et maong so impluensya da ed sakey tan sakey, tan tutulongan day balang sakey ya magmaliw ya mas maong ya too.—Proverbio 27:17.
Balet idadanet na Biblia ya importantin pilien tayon maong so pikaaroan tayo. Papasakbayan itayo na Biblia ed saray aliwliwan resulta no mauges iray pikaaroan tayo. (Proverbio 13:20; 1 Corinto 15:33) Say ontan iran kaaro et impluensyaan da tayon manggaway makapuy iran desisyon odino deralen da ni ingen iray maong ya ugali tayo.
Diad sayan artikulo
Anto so maong ya kaaro?
Ibabangat na Biblia ya say maong ya kaaro et aglabat akadepende ed no parehas kayoy labalabay ya gawaen. Singa bilang, ibabaga na Salmo 119:63: “Kaaro ak na amin ya ontatakot ed sikaa tan saramay manguunor ed saray totontonen ya inter mo.” Imanoen ya say pipilien na nansulat ed sayan teksto na Biblia et saramay antakot dan napaermen so Dios tan mansasagpot iran manbilay unong ed saray estandarte to.
Ipapaimano met na Biblia iray kualidad ya nepeg ya walad sakey ya maong a kaaro. Singa bilang:
“Say tuan kaaro et mangaaro ed amin a panaon tan sakey ya agi a nailaloan diad panaon na gonigon.”—Proverbio 17:17.
“Wala ray sankakaiba ya akaparaan a maneral ed sakey tan sakey, balet walay kaaro a mas mansiansia ed abay mo nen say sakey ya agi.”—Proverbio 18:24.
Ibabangat na sarayan teksto ya say maong ya kaaro et matoor, maaro, maomaong, tan maiter. Say tuan kaaro et nailaloan mon suportaan to ka, maong man o mairap so situasyon. Say tuan kaaro et makpel met ya mansimbawa no bilang ta aliwa lay aarapen mo odino gawaen mon desisyon.—Proverbio 27:6, 9.
Anto ray alimbawa ed Biblia na maong ya sankaaro?
Nabasa tayod Biblia iray maong ya alimbawa na sankaaro ya mandumaan na edad, nanlapuan, kultura, tan posisyon. Nengnengen so taloran alimbawa.
Ruth tan Noemi. Manugang nen Noemi si Ruth, tan nayarin baleg so deperensya na edad da. Sakey ni, dumay kultura nen Ruth ed si Noemi. Anggaman wala irayan pandumaan da, nagmaliw iran malet ya sankaaro.—Ruth 1:16.
David tan Jonatan. Mapatnag ya mas matatken na 30 taon si Jonatan nen si David, ibabaga na Biblia ya si David tan Jonatan et “nagmaliw a maapit a sankaaro.”—1 Samuel 18:1.
Jesus tan saray apostol to. Mas atagey so posisyon nen Jesus ed saray apostol to ta sikatoy managbangat tan katawan da. (Juan 13:13) Balet agto inisip ya ag-ira makanepegan ya makapikaaro ed sikato. Imbes, maapit si Jesus ed saramay ontutumbok ed saray bangat to. Oniay imbaga to: “Tinawag ta kayon kakaarok, lapud impaamtak lad sikayo so amin a nadngel kod Amak.”—Juan 15:14, 15.
Sarag kasin nakaaro na too so Dios?
On, sarag tayoy mikaaro ed Dios. Ibabaga na Biblia: “Sikatoy maapit a kaaro na maptek a too.” (Proverbio 3:32) Labay ya ibaga, kaaro na Dios iramay mansasagpot ya magmaliw ya desente, matua, tan marespeto, tan saramay gagawaen day anggaay nayarian dan manbilay unong ed saray estandarte to na maong tan mauges. Singa bilang, say matoor ya lakin si Abraham et tinawag na Biblia bilang kaaro na Dios.—2 Awaran 20:7; Isaias 41:8; Santiago 2:23.
a Nanengneng ed konteksto na sayan salmo ya say tutukoyen na “sika” et say Dios.