Siopa si Juan Bautista?

Say ebat na Biblia

Si Juan Bautista et sakey a propeta na Dios. (Lucas 1:76) Inyanak si Juan nen 2 B.C.E. tan inatey nen 32 C.E. Sikato so tinuro na Dios ya mangiparaan na dalan parad Mesias, odino Kristo. Pian nagawaan to itan, impulong nen Juan so mensahe na Dios ed saray kapara ton Judio pian papawilen so kapusoan da ed si Jehova.—Marcos 1:1-4; Lucas 1:13, 16, 17.

Akatulong so mensahe nen Juan ed saray masimoon ya ondedengel pian nabidbir da si Jesus ya tagad Nazaret bilang say insipan a Mesias. (Mateo 11:10) Pinaseseg nen Juan iray ondedengel ed sikato ya magbabawi ed saray kasalanan da insan ira manpabautismo pian nipanengneng so pagbabawi ra. (Lucas 3:3-6) Dakdakel so binautismoan to kanian tinawag dan Juan Bautista odino Juan a Managbautismo. Say sankaimportantian ya impanbautismo nen Juan et amay diad si Jesus.a—Marcos 1:9.

Diad sayan artikulo

• Akin et nikaduma si Juan Bautista?

• Siopa ray atateng nen Juan Bautista?

• Siopay nampapatey ed si Juan Bautista?

• Kasin mankakompetensia si Juan Bautista tan si Jesus?

• Pigaray abitlad Biblia ya manngaran na Juan?

Akin et nikaduma si Juan Bautista?

Nipropesiya so gawaen to: Diad impanpulong nen Juan, sinumpal toy propesiya nipaakar ed mensahero nen Jehova. (Malaquias 3:1; Mateo 3:1-3) Pinaneknekan to ya sikato imay ‘angitarya parad si Jehova na akaparaan a totoo’—labay ya ibaga, tinulongan to ray kapara ton Judio ya awaten so mensahe na manunan mangirerepresenta ed si Jehova a Dios, si Jesu-Kristo.—Lucas 1:17.

Saray agawaan to: Imbaga nen Jesus ya “anggapo lay nagmaliw a babaleg nen say si Juan Bautista, balet samay sankamelagan ed Panarian na tawen et babaleg nen say sikato.” (Mateo 11:11) Aliwa labat ya propeta si Juan noagta sikato met so impasakbay ya “mensahero” kanian anggapoy lingkor na Dios ya nambilay antis to so nibagan babaleg nen say sikato. Ipapanengneng met na imbaga nen Jesus ya agmagmaliw ya ari si Juan diad Panarian na Dios.b Inatey la iyan matoor ya propeta antis nin inlukas na Kristo so posibilidad ya makaonlad tawen iray totoo. (Hebreo 10:19, 20) Balet magmaliw ya sakop na Panarian na Dios si Juan dia ed dalin, tan walay ilalo ton manbilay ya anggapoy anggaan diad Paraiso.—Salmo 37:29; Lucas 23:43.

Siopa ray atateng nen Juan Bautista?

Say sanasawan Zacarias tan Elizabet so atateng nen Juan. Sakey ya Judion saserdote si Zacarias. Milagro so inkiyanak nen Juan ta baog so nanay to, odino agmakaanak. Sakey ni, si Zacarias tan Elizabet et ‘parehon maedad la.’—Lucas 1:5-7, 13.

Siopay nampapatey ed si Juan Bautista?

Impaputot nen Arin Herodes Antipas so ulo nen Juan. Ginawa to itan ta sinugsogan na asawa ton si Herodias. Kabkabusol nen Herodias si Juan ta imbaga tod si Herodes, ya mangipapasen ed sarili to bilang Judio, ya diad ganggan na saray Judio et ilegal so impiasawa to ed si Herodias.—Mateo 14:1-12; Marcos 6:16-19.

Kasin mankakompetensia si Juan Bautista tan si Jesus?

Anggapon balot so ibabaga na Biblia ya mankakompetensia iran dua. (Juan 3:25-30) Diad tua, binidbir ya mismo nen Juan ya responsabilidad ton iparaan so dalan parad Mesias, aliwan pian mikompetensia ed sikato. Oniay imbaga nen Juan: “Say rason no akin a manbabautismo ak ed danum et pian sikatoy niparungtal ed Israel.” Insan to ni imbaga: “Sikato so Anak na Dios.” (Juan 1:26-34) Kanian malikeliket si Juan nen naamtaan ton maaligwas so ministeryo nen Jesus.