Manpatulong Ka ed Saray Elder

1. Anto ray patunay ya inar-aro nen Jehova iray karnero to?

INAR-ARO nen Jehova iray karnero to. Sinaliw to ra panamegley na dala nen Jesus, tan anuro na saray elder ed kongregasyon ya mangasikaso ed sikara. (Gawa 20:28) Labay nen Jehova ya maaro so pantrato na saray elder ed saray karnero to. Kanian diad panangidaulo nen Jesus, gagawaen na saray elder so anggaay nayarian da pian naasikaso tan naprotektaan so interon pulok.—Isa. 32:​1, 2.

2. Siopa ray iikdan nen Jehova na espisyal ya atension? (Ezequiel 34:​15, 16)

² Tua, inar-aro nen Jehova so amin ya karnero to. Pero iikdan to na espisyal ya atension iramay onkakapuy so espiritualidad da. Uusaren to iray elder pian natulongan ira. (Basaen so Ezequiel 34:​15, 16.) Pero siempre, no kaukolan tayoy tulong, labay nen Jehova ya onkerew tayoy tulong. Singa bilang, labay to ya masimsimoon tayon ipikasi ed sikato ya tulongan to tayo. Pero aliwan satan labat. Labay to met ya manpatulong tayo ed saray “pastol tan managbangat” ed kongregasyon.—Efe. 4:​11, 12.

3. Akin et makatulong ed sikatayon amin iyan artikulo?

³ Pantongtongan tayo ed sayan artikulo no panon ya uusaren nen Jehova iray elder pian natulongan iramay onkakapuy so espiritualidad da. Amtaen tayoy ebat ed sarayan tepet: Kapigan tayo onasingger ed saray elder? Akin et importantin manpatulong tayo ed sikara? Tan panon da tayon natulongan? No bilang ta singa agmo met kaukolan natan so tulong na saray elder, makatulong nin siansia iyan artikulo pian mas naapresyam so panguusar nen Jehova ed saray elder. Tan no antam so ebat ed saramay abitlan tepet, antam lay gawaen mo no onsabi panaon ya sika la so mankaukolan na tulong.

KAPIGAN TAYO ONASINGGER ED SARAY ELDER?

4. Akin et nibaga tayon ontutukoy ed espiritual ya sakit imay nabasad Santiago 5:​14-16, 19, 20? (Nengnengen met so litrato.)

⁴ Impaliwawa na disipulon si Santiago no panon ya uusaren nen Jehova iray elder no kaukolan tayoy tulong. Oniay insulat to: “Wala ta ed sikayo so mansasakit? Patawag to komon iray mamatatken ed kongregasyon.” (Basaen so Santiago 5:​14-16, 19, 20.) Say tutukoyen dia nen Santiago et sakit ed espiritual. Akin et ontay nibaga tayo? On ta say imbaga ton tawagen na samay mansasakit et saray mamatatken o elder, aliwan doktor. Sakey ni, say binitla ton palatandaan ya inmabig la may mansasakit et no aperdona la iray kasalanan to. Kanian espiritual sirin ya sakit so tutukoyen to. Say iyabig ed espiritual ya sakit et walay piparaan to ed iyabig ed literal ya sakit. Di ba no walay liliknaen tayo tan labay tayoy onabig, manpa-check up tayo ed doktor? Ibaga tayod sikato iray sintomas tayo tan gawaen tayo no anto may inreseta to. Mipadpara, no mansasakit tayod espiritual tan labay tayoy onabig, kaukolan tayoy onasingger ed sakey ya elder, ibaga tayod sikato so situasyon tayo, tan iyaplika tayoy imbaga ton simbawa ya base ed Biblia.

5. Anto ray sinyales ya onggagapo tayo lan onkapuy ed espiritual?

⁵ Papasesegen itayo na Santiago kapitulo 5 ya no mansasakit tayo ed espiritual, agtayo nababaingan ya manpatulong ed saray elder. Pero antis ni komon ya naderal so relasyon tayod si Jehova, manpatulong tayo lad sikara. Bibilinen itayo na Biblia ya kaukolan tayon usisaen so sarili tayo, ta ompan say amta tayo et mabiskeg tayod espiritual, pero andi manaya. (Sant. 1:22) Ontan so agawa ed arum ya Kristiano ed Sardis nen inmunan siglo. Agda aliklikas ya makapkapuy la ra manaya ed espiritual kanian binagaan ira nen Jesus. (Apo. 3:​1, 2) Panon tayon naamtaan no kasin onggagapo tayo lan onkapuy ed espiritual? Say sakey ya paraan et no isipen tayo imay seseg tayo tan panangaro tayod si Jehova nen balo tayo nid katuaan tan ikompara tayo itan natan. (Apo. 2:​4, 5) Tepetan moy sarilim: ‘Kasin agko la nai-enjoy so manbasay Biblia tan mandalepdep? Kasin agak manpaparaan parad aral tan ayos labat ed siak anggano agak makapiaral no maminsan? Kasin natatabangan ak lan manpulong? Kasin puros la materyal tan panliliket so kargay nonot ko?’ No on so ebat mo ed anggan sakey ed saratan ya tepet, sinyales itan ya onkakapuy lay espiritualidad mo, tan nayarin onloor itan no agmo aksionan. Kanian pansagpotan mon pabiskegen lamet so espiritualidad mo. Pero no nalikas mon agmo kaya diad sarilim labat ya sagpot, o akagawa ka lay kontra ed panlabayan nen Jehova, kaukolan mo lay manpatulong ed saray elder.

6. No say sakey et akagawa na seryoson kasalanan, antoy kaukolan ton gawaen?

⁶ No say sakey et akagawa na seryoson kasalanan ya nayarin pakaekalan to ed kongregasyon, kakkaukolan toy onasingger ed saray elder. (1 Cor. 5:​11-13) Lapud seryoson kasalanan so agawaan to, agto sarag ya apigeren so relasyon tod si Jehova no diad sarili to labat. Tandaan, perdonaen to tayo labat nen Jehova no ‘ipanengneng tayod gawa so panagbabawi tayo.’ (Gawa 26:20) Say sakey ya paraan pian nipanengneng tayod gawa ya talagan magbabawi tayo et no ipatua tayo ed saray elder so agawaan tayon seryoson kasalanan.

7. Siopa ni ray kaukolan ya manpatulong ed saray elder?

⁷ Labalabay met ya tulongan na saray elder iramay walay lalabanan dan kakapuyan. (Gawa 20:35) Singa bilang, ompan say sakey ya agi et nanairapan ya labanan so mauges ya pilalek to, lalo la no datin manda-drugs, manbabantay na pornograpiya, tan imoral so kabibilay to antis ton naamtaan so katuaan. No ontan so situasyon mo, tandaan mo ya akaparaan iray elder ya ontulong ed sika. Kanian maabig no ibagam itan ya problemam ed sakey ya elder ya pantitiwalaan mo. Seguradon dengelen to ka, ikdan to ka na praktikal iran suhestion no anto ran pananguman so kaukolan mon gawaen, tan ipaseguro tod sika ya naliliketan si Jehova kada no lalabanan moy mauges ya pilalek mo. (Ecl. 4:12) No nadidismaya tan naeermenan ka ta pawil-pawil labat iray mauges ya pilalek mo, ipanonot ed sika na samay elder ya atan ya naliliknam et patunay ya importante ed sika so relasyon mod si Jehova. Diad tua, amay inyasingger mod sikato et paneknek ya agka manmamatalek ed sarilim tan sankanonot moy liknaan nen Jehova.—1 Cor. 10:12.

8. Anto ray lingo o problema ya agtayo la kaukolan ya ipasabi ed saray elder?

⁸ Agtayo la balet kaukolan ya ibaga ed saray elder so amin ya lingo ya nagagawaan tayo. Singa bilang, panon to no asakitan so liknaan na sakey ya agi lapud imbagam? Odino ompan nantamian mo ni ingen ta agmo akontrol so sarilim. Imbes ya ipaamtam ed elder imay agawa, iyaplikam may bilin nen Jesus ya walad Mateo 5:​23, 24. Kerew kay pasensia ed samay agi tan mikareenan kad sikato. Pian agla itan naulit lamet, maabig no i-personal study’m so nipaakar ed inkaulimek, inkaanos, tan kontrol ed sarili. Tan manisip kay paraan no panon mon mas nipanengneng iratan ya ugali. Pero no agyo nin siansia naayos so problema, sarag mo lay manpatulong ed sakey ya elder. Diad samay sulat nen apostol Pablo ed saray agagi ed Filipos, kinerew to ed sakey ya brother ya tulongan toy Euodias tan si Sintique pian naayos day agda pantatalosan. Nayarin ontan met ya tulong so iter to may elder ya angibagaan mo.—Fil. 4:​2, 3.

AKIN ET IMPORTANTE YA MANPATULONG TAYO ED SARAY ELDER?

9. No akagawa tayoy seryoson kasalanan, akin et importante ya manpatulong tayod saray elder anggano nababaingan tayo? (Proverbio 28:13)

⁹ No akagawa tayoy seryoson kasalanan odino nanairapan tayon labanan iray kakapuyan tayo, diad tua et kaukolan so pananisia tan pakpel pian nibaga tayo itan ed saray elder. Anggano nababaingan tayo, manpatulong tayo ed sikara. Akin ey? On ta aman so imbaga nen Jehova ya gawaen tayo. No manpatulong tayo ed saray elder, ipapanengneng tayo ya walay talek tayo ed si Jehova tan uunoren tayoy instruksion to. Ipapanengneng tayo met ya kakkaukolan tayoy suporta to tan labay tayon gawaen so duga. (Sal. 94:18) No ipatua tayoy kasalanan tayo ed saray elder tan gawaen tayoy anggaay nayarian tayo pian agla itan naulit, makaseguro tayo ya kasian to tayo nen Jehova.—Basaen so Proverbio 28:13.

10. Antoy nagawa no salien tayon iyamot so kasalanan tayo tan agtayo ipatua ed saray elder?

¹⁰ Anto balet so nagawa no salien tayon iyamot so kasalanan tayo tan agtayo mitongtong ed saray elder? Lalon onloor so situasyon. Nen sinali nen Arin David ya iyamot iray kasalanan to, aderal so relasyon tod si Jehova, a-depress, tan kinmapkapuy ni ingen so laman to. (Sal. 32:​3-5) Say sakit ed espiritual et singa met lanlamang literal ya sakit. No ipaleen tayoy manpatulong ed saray elder, lalo tayon onkapuy ed espiritual. Aglabay nen Jehova ya ontan so nagawa ed sika. Say labay to et onabig kan tampol ed espiritual ya sakit mo. Kanian papasesegen to ka ya mitongtong ed saray elder pian nipetek mo la iray “kaukolan ya ipetek.”—Isa. 1:​5, 6, 18.

11. Panon ya nadamay so arum no iyamot tayod saray elder so seryoson kasalanan?

¹¹ No agtayo ibaga ed saray elder so kasalanan tayo, nadamay met so arum. Aga ondaloy ed kongregasyon so masanton espiritu na Dios. Ompan napagaan met iray agagi tan aliwan maligen so liknaan da. (Efe. 4:30) Panon to balet no naamtaan tayo ya akagawa na seryoson kasalanan so sakey ya agi? Pasesegen tayo ya mitongtong ed saray elder. Pero no agto nin siansia itan imbaga ed saray elder kayari na magenap ya panaon, sikatayo lan mismo so mangibaga. Ta no agtayo itan gawaen, singa tayo kokonsintien, kanian mankakasalanan tayo met la ed si Jehova. (Lev. 5:1) Inaro tayoy Jehova tan matoor tayod sikato, kanian agtayo natatakot ya ibagay tua ed saray elder. Baleg so nitulong to ’tan pian mansiansian malinis so kongregasyon tan napapawil na samay agi so relasyon to ed si Jehova.

PANON ITAYON TUTULONGAN NA SARAY ELDER?

12. Panon ya tutulongan na saray elder iramay onkakapuy ed espiritual?

¹² Abilin iray elder ya kaukolan dan tulongan iramay makapuy ed espiritual. (1 Tes. 5:14) No say sakey ya agi et walay ginawa to ya lapud satan et aderal so relasyon tod si Jehova, tepetan na saray elder pian natalosan day situasyon to tan naamtaan da no antoy walad puso to. (Pro. 20:5) Tandaan mo ya mas natulongan ka na saray elder no ibagam ed sikara so amin ya naliliknam. Kanian anggano nababaingan ka lapud samay agawaan mo o sika may too ya ag-apasal ya mangistorya, mansalita ka labat. Agmo iisipen ya ompan walay naibagam ya aliwa. (Job 6:3) Agka husgaan na saray elder. Dengelen da kan maong pian naamtaan dan amin so detalye antis iran mangiter na simbawa ya base ed Biblia. (Pro. 18:13) Amta ra ya kaukolay panaon pian talagan natulongan da ka, kanian ompan aliwa labat ya maminpinsan so pitongtong dad sika.

13. Antoy nitulong ed sikatayo na pikakasi na saray elder tan saray simbawa da ya base ed Biblia? (Nengnengen met so litrato.)

¹³ No katongtongen ka na saray elder, agda la labay ya aruman so belat ya naliliknam lapud pakakakonsiensiam. Imbes, say gawaen da, ipikasi da ka. Seguradon atan ni labat et onlemew lay liknaan mo ta “balbaleg so nagawaan” na pikakasi ra. ‘Puyokan da ka met na larak diad ngaran nen Jehova.’ (Sant. 5:​14-16) Ontutukoy iyan “larak” ed katuaan ya walad Salita na Dios. Ipaimano da ed sika iray makaligliwan teksto ed Biblia, ontan met ed saray teksto ya makatulong pian napapawil mo so maong ya relasyon mod si Jehova. (Isa. 57:18) Saray simbawa da ya nanlapud Biblia so ontulong ed sika pian mas desidido kan gawaen so duga. Panamegley na saray elder, narengel moy boses nen Jehova ya mangibabagan: “Saya so dalan. Dia so panakaran [mo].”—Isa. 30:21.

14. Base ed Galacia 6:​1, panon ya tulongan na saray elder so agi ya ‘aliwa lay aarapen to’? (Nengnengen met so litrato.)

¹⁴ Basaen so Galacia 6:1. No imbagan ‘aliwa lay aarapen’ na sakey ya Kristiano, labay ton ibaga, agto la natutumbok so estandarte nen Jehova. Ompan walay desisyon to ya kontra ed panlabayan na Dios odino akagawa lay seryoson kasalanan. No ontan so nagawa, pansagpotan na saray elder ya “ipetek iyan too diad espiritu na inkaulimek.” Panangaro so mamakiwas ed sikaran gawaen itan. Diad Griegon lenguahe, amay salitan “ipetek” et ontutukoy ed gagawaen na doktor no ipawil o ilira toy pukel ed dugan posisyon to pian onabig so piley na pasyente to. Asisigtaen to itan pian agla naaruman so sakit ya nalilikna to may pasyente. Ontan met so gagawaen na saray elder. Agda la labay ya aruman so sakit ya nalilikna tayo. Say sankanonot da et no panon da tayon natulongan ya onabig ed espiritual. Abilin met ira ya ‘bantayan day sarili da.’ No ipepetek da tayo, sankanonot da ya aliwa met iran perpekto tan makakagawa met ira na lingo. Kanian ag-ira mamaong, agda tayo huhusgaan, tan agda iisipen ya mas matunong ira nen say sikatayo. Imbes, mapaabeba ira tan tatalosan day situasyon tayo.—1 Ped. 3:8.

15. Antoy marakep ya gawaen tayo no walay problema tayo?

¹⁵ Napantiwalaan iray elder ed kongregasyon tayo. No walay imbaga tayod sikara ya kompidensyal, imbangat ira nen Jehova ya agda itan ibabagbaga ed arum. No sisimbawaen da tayo, ibabase dan lanang itan ed Biblia, aliwan diad sarili dan opinyon. Tan nailaloan tayo ya tuloytuloy iran misakbatan no walay ambelat ya problema tayo. (Pro. 11:13; Gal. 6:2) Tua, nandurumay ugali tan eksperiensya na saray elder. Pero sarag tayoy onasingger ed anggan siopa ed sikara no walay problema tayo. Panon to no inmasingger ka ed sakey ya elder pero agmo agustoan so insimbawa to ed sika? Kasin onasingger ka lamet ed sananey ya elder, ta manaanap kay onkampi ed sika tan onabobon ed samay labay mon nagawa? No ontan so gawaen tayo, anggapoy pidumaan tayo ed saramay totoo ya agda labay so paibangat ed si Jehova, tan say dedengelen da labat et samay “labalabay dan narengel.” (2 Tim. 4:3) No imbaga tayod sakey ya elder so problema tayo, ompan tepetan to tayo ni no kasin imbaga tayo la itan ed arum ya elder, tan no antoy insimbawa ra ed sikatayo. Tan lapud bibidbiren to ya wala ray limitasyon to, nayarin mantepet ni ed kapara ton elder no antoy maong ya gawaen.—Pro. 13:10.

“KADA SAKEY ED SIKATAYO ET WALAAN NA EEBATAN ED DIOS”

16. Antoy responsabilidad na kada sakey ed sikatayo?

¹⁶ Tinuro nen Jehova iray elder ya mangasikaso ed pulok, pero agda tayo diktaan no antoy nepeg tayon gawaen. Responsabilidad na kada sakey ed sikatayo ya ipanengneng so panangaro tayod si Jehova. On, amin ya ibabagam tan gagawaen mo, eebatan mo itan ed si Jehova. (Roma 14:12) Sikan mismo so mansagpot pian makapanmatoor kad sikato, tan nagawaan mo itan diad tulong to. Kanian anggano inmasingger ka ed saray elder, tandaan mo ya agda ka idesisyonan. Pero ipaimano dad sika iray prinsipyo ed Biblia ya makatulong ed panggawam na desisyon ya makapaliket ed si Jehova. No iyaplikam iratan ya prinsipyo, ipapasal moy sarilim ya ‘tebeken’ so panlabayan nen Jehova kada no mandedesisyon ka.—Heb. 5:14.

17. Antoy labay nen Jehova ya gawaen tayo?

¹⁷ Misatsalamat tayo ed maaron pangaasikaso nen Jehova ed saray karnero to. Imbaki toy Jesus, say “maong a managpastol,” pian bayaran so dondon tan nawalaan tayoy ilalo ya manbilay na andi-anggaan. (Juan 10:11) Inter met nen Jehova iray elder ya mangasikaso ed kongregasyon. Tinoor to iyan sipan to: “Ikdan ta kayo na saray managpastol ya onkiwas unong ed linawak, tan pakanen da kayo ed panamegley na kakabatan tan aralem a pakatalos.” (Jer. 3:15) On, bidbiren tayo ya nanlapud si Jehova iray elder, tan uusaren to ra pian tulongan itayo. Kanian no onkakapuy tan mansasakit tayod espiritual, agtayo komon nababaingan ya manpatulong ed saray elder.