Mabapbaing Ak, Pero Akapanmisionero Ak

Inyanak ak nen 1951 diad Vienna, Austria. Katoliko kamin pamilya. Siak may toon aga maesel, pero mapikasi ak tan manisia ak ed Dios. Nen siameray taon ko, nampaiyaral na Biblia ed saray Tasi nen Jehova si Tatay, insan nampaiyaral met lay Nanay.

Ag-abayag, mimiaral kami lan pamilya diad Döbling Congregation diad Vienna. Close kamin pamilya, tan lanang kamin saniba. Babasaen tan aaralen mi Biblia, saniba kamin mimiaral, tan manboboluntaryo kami ed saray asemblea. Nen ugaw ak ni, impurek lad siak nen Tatay ko ya ar-aroen koy Aman Jehova. Diad katuaan to, lanang ya ipipikasi nen Tatay ya magmaliw kamin payunir may agik ya bii ya si Elisabeth. Pero diad saman, aliwan aman so goal ko.

NANLINGKOR AK YA FULL-TIME

Abautismoan ak nen 1965, tan 14 so taon kod saman. Nanonotan ko, nababaingan ak ya pulongan iray totoon agko kabat. Abebbeba met so pakanengneng kod sarilik, tan wala may liknaan ko ya labay kon awaten ak tan nalabayan ak na saray kaedaran ko. Kanian anggano abautismoan ak lad saman, akikaaro ak ed saray aliwan Tasi. Diad tua, nai-enjoy koy miulop ed sikara. Atan labat ta nakokonsiensia ak, ta siempre say mabetbet kon nakakaiba et aliwan lingkor nen Jehova. Amtak ya kaukolan ko lay ontundan miulop ed sikara, pero nairapan ak. Amta yo no antoy akatulong ed siak?

Walay kabataan ya sister ed kongregasyon mi, si Dorothée. Desi-sais to ni labat ed saman pero makulikulin manpulong. Siak balet ya mas matatken ed sikato et mataltalag ya manpulong. Kanian say kuan kod sarilik, ‘Tasi iray atateng ko, pero si Dorothée sikato labat so Tasi ed pamilya ra. Sakey ni, aasikasoen toy nanay to ta mansasakit pero makulikuli nin siansia ya ompaway.’ Lapud balibalin alimbawa to, apaseseg ak ya aruman ni nagagawaan ko parad si Jehova. Ag-abayag, nampayunir kamin dua nen Dorothée. Nen unaan, nan-aplay kami ya auxiliary payunir, say datin tawag et vacation payunir. Insan kami nanlingkor bilang regular payunir. Makaalis so seseg nen Dorothée! Tinulongan to ak ingen pian nawalaan ak na Bible study. Kalkalna ya alabanan koy inkamabaing ko, ya anggad mainomay ko lay mitongtong ed saray totoo diad kaabungan, diad saray karsada, tan anggan iner.

Nen unonan taon na impanlingkor ko bilang regular payunir, walay brother ya sinmabi ed kongregasyon mi, si Heinz. Naamtaan toy katuaan diad Canada nen binisita toy kuya to ya Tasi. Niyasain si Heinz ya manlingkor bilang espisyal payunir diad kongregasyon mi diad Vienna. Nen first time ko ni labat ya akabat si Heinz, wala lay panggustok ed sikato. Pero nandumaan kami goal. Labay toy magmaliw ya misionero, siak balet andi. Kanian nen unaan, inyamot koy naliliknak. Pero sinmabi panaon ya nagmaliw kami lanlamang ya saninaro, ya anggad nankasal kami tan intuloy mi nanlingkor bilang payunir diad Austria.

GOAL KO LAY MAGMALIW YA MISIONERO

Labalabay nen Heinz so magmaliw ya misionero, kanian atan so bungay sangi to. Pero agto ak balot pinilit ya i-goal met so manmisionero. Say gagawaen to balet, tetepetan to ak. Singa bilang, kuan to: “Tutal anggapo met so anak ta, seguro sarag ta nin aruman so nagagawaan ta parad si Jehova, anto?” Napapaisip ak laingen ed saray tepet to. Pero natatakot ak ya manmisionero, ta singa nikuan ko la, mabapbaing ak ya too. Tua, payunir ak, pero no panmisionero lay pantongtongan, pakaliknak, agko nasarag. Maong labat ta agto ak sinukoan nen asawak. Maan-anos to ak ya tinulongan pian nalabayan ko lanlamang so manmisionero. Pinaseseg to ak ya agak dapat manpopokus ed sarilik. Imbes, say nonoten ko et no panon kon natulongan iray totoo. Tinmatak ed siak itan ya imbaga to.

Kalkalna ya tinmubod pusok so panlingkor bilang misionero. Tan asabi panaon, nandesisyon kami nen Heinz ya man-aplay ed Gilead School. Pero imbaga na branch servant ya kaukolan ko nin paaligwasen so panag-English ko. Kanian ontan so ginawak. Balet kayari taloy taon, abigla kami nen Heinz ta inyasain da kami ed kongregasyon ya mansasalitay Serbo-Croatian diad Salzburg, Austria. Pitoy taon kamin nanlingkor ditan, kaibay sakey taon ya impanlingkor nen asawak bilang manangasikaso na sirkito. Nairapan kami ed lenguahe da, pero makapaliket ta dakdakel so nagmaliw ya Bible study mi.

Nen 1979, imbaki kami na branch ya onlad Bulgaria. Diad saman ya panaon, sebel so manpulong diad satan ya bansa. Kanian kunwari et linma kami ditan pian manbakasyon. Binilin da kami ya agkami manpupulong, pero angipuslit kami na saray angkekelag ya publikasyon parad limaran sister ya manaayam ed syudad na Sofia, say kabisera na Bulgaria. Natatakot ak ya maong, pero tinulongan ak nen Jehova. Apaseseg ak ed samay limaran sister. Makmakpel tan malikeliket ira anggano amta ra ya walay posibilidad ya napriso ira. Lapud maong ya alimbawa ra, apaseseg ak ya awaten so anggan anton asainmin ya iter ed siak na organisasyon nen Jehova.

Ag-abayag, nan-aplay kami lamet parad Gilead, tan naaprobaan so application mi! Say amta mi, onla kamid United States tan diman kami manaral. Pero nen Nobyembre 1981, ginmapo so Gilead Extension School diad branch ed Germany, tan ditan kami naimbitaan ya manaral. Lenguahen German so usaren mid klase, kanian maliket ak ta mas natalosan ko itan nen say English. Amta yo no iner so asainmin mi?

NANLINGKOR KAMI ED MAGULOGULON BANSA

Say asainmin mi et diad Kenya! Pero, tinepetan kami na branch ditan no labay mi manlingkor diad Uganda, sakey ya bansa ya abay labat na Kenya. Masulok ya samploran taon antis to ’ya, walay agawan coup d’état diad Uganda, ya say angidaulo et si General Idi Amin. Pinabagsak to so gobiernoy Uganda tan sikato lay nanuley. Legan na uley to, nilibon totoo so pinatey, tan nanirap ya maong so milyon-milyon ya totoon sakop to. Insan nen 1979, wala ra met so nampabagsak ed si Idi Amin kanian anampot so uley to. Nen naamtaan ko ya ontan so situasyon ed Uganda, natatakot ak ya onla ditan. Pero maong labat ta imbangat kami na Gilead ya mantiwala ed si Jehova, kanian inawat mi ’tan ya asainmin.

Talagan mair-irap tan magulogulo so bilay diad Uganda. Agsarag ya iter na gobierno so pankaukolan na totoo, singa say danum, kuryente, tan arum ni. Agmet onggagana iray telepono. Mabetbet so paltogan, tan normal labat so mantakew, lalo la no labi. Kanian no mansirunget la, agla ompaway ed abung iray totoo. Say sankanonot tan ipipikasi da, onlabas komon so sanlabi ya ag-ira natakewan tan anggapoy mamatey ed sikara! Pero anggano ontan so situasyon, masetseseg iray agagi tan mabiskeg so pananisia da ed si Jehova.

Nen 1982, akasabi kami nen Heinz diad Kampala, say kabisera na Uganda. Diad unonan limaran bulan mi ditan, akiayam kami ed abung nen Sam tan Christina Waiswa. Manaayam met ditan so limaran ananak da tan apatiran kanayon da. Maslak et maminsan labat iran mangan ed sanagew. Pero say makapadinayew, inanabang dad sikami no antoy walad sikara. Dakel so naaralan mid sikara ya akatulong ed bilay mi bilang misionero. Singa bilang, naaralan mi mantipid. No manaames kami, daiset labat ya danum so uusaren mi, tan isasalor mi may danum ya panaames mi pian walay pankalbo mi ed inidoro. Nen 1983, akalmo kami nen Heinz na panayaman mi diad mas ligtas ya lugar ed Kampala.

Labalabay mi manpulong ed Kampala. Wala tay aminsan ya masulok ya 4,000 ya magasin so nipalima mi diad loob labat na sakey bulan! Pero say talagan makapalikliket et saray totoo. Rerespetoen day Dios tan labalabay dan pantongtongan so Biblia. Dakel so iyaaralan mi nen Heinz, manga atay 10 anggad 15 so Bible study na kada sakey ed sikami. Makakaaral kami met ed saray iyaaralan mi. Singa bilang, napapaseseg kami ed anos da. Kada no miaral ira, aakaren da labat, paonla tan pasempet. Pero agmi ran balot arengel ya nanreklamo. Akaimis iran lanang!

Nen 1985 tan 1986, amidua lamet ya walay agawan guerra ed Uganda. Makapaermen ta anggan saray ugugaw et pinansundalo da. Mabetbet mi ran nanengneng ed saray karsada ya walay awi-awit dan paltog, tan sikara so manbabantay na saray checkpoint. Lanang min ipipikasi ed si Jehova ya tulongan to kamin magmaliw ya malikas tan kalmado diad ministeryo. Inebatan nen Jehova iray pikakasi mi. Tua, natatakot kami met. Pero kada no walay nakatongtong min interesado, nabalang so takot mi.

Labalabay mi met ya pulongan iray dayo. Singa bilang, wala tay inyaralan min sanasawa ya tagad Tatarstan (Central Russia), si Murat tan Dilbar Ibatullin. Doktor si Murat. Abautismoan iran sanasawa, tan anggad natan et masetseseg iran manlilingkor ed si Jehova. Inyaralan ko met so sakey ya biin nanlapud Ukraine, si Tatjana Vileyska. Nen akabat koy Tatjana, walay depression to tan plano to lay manbikkel. Nen abautismoan lay Tatjana, pinmawil ed Ukraine tan diman et nagmaliw ya translator na saray publikasyon tayo.a

DUMA LAMET YA SUBOK SO INARAP MI

Nen 1991, legan na bakasyon mi ed Austria, kinontak kami na branch diman tan imbaga da ya walay balon asainmin mi: diad Bulgaria. Dakel ya taon ya sebel so kimey tayo diad saray bansa ed Eastern Europe. Pero asabi panaon, nakal so pananebel kanian bulos lamet ya makapanpulong iray agagi diad saratan ya bansa, kaiba lay Bulgaria. Singa naistoryak nen niman, angipuslit kami nen Heinz na saray literatura nen sebel ni kimey ditan. Pero natan, onla kami ditan pian manpulong!

Say instruksion ed sikami, agkami la ompapawil ed Uganda. Kanian agmi la naimpake iray gamit mi diad missionary home, tan agkami la akapampatanir ed saray kakaaro mi diman. Manlapud Austria, linma kamin tampol ed Bethel diad Germany, inikdan kami na branch na luluganan, insan kami la nambiahe paonlad Bulgaria. Inyasain da kami ed sakey ya grupo diad syudad na Sofia ya manga 20 labat so publisher.

Duma met iray subok ya inarap mi diad Bulgaria. Agmi amtay lenguahe ra. Tan say alenleneg kalamor ya libro ed lenguahen Bulgarian et amay The Truth That Leads to Eternal Life tan My Book of Bible Stories. Mairap so mangigapoy panangiyaral na Biblia! Pero anggano wala ray onian subok, makulikulin nampulong imay melag ya grupo mi. Naimano na saray membro na Orthodox Church so pampupulong mi, tan nanggawa ray paraan pian napatunda da kami.

Nen 1994, kinansela na gobiernoy Bulgaria so rehistro na organisasyon tayo, tan wala ray brother ya naaresto. Natatakot laingen iray totoo ed saray Tasi. Diad saray dyaryo tan diad TV, dakel so kinmayat ya tila nipaakar ed sikatayo. Ibabaga da ya pipiliten tayo kuno iray kapananisiaan tayo ya manbikkel. Wala met so kinmayat ya balita ya papateyen kuno na saray Tasi nen Jehova iray ananak da ta agda ra pasaksakan na dala. Lapud sarayan balita, nairapan kami nen Heinz ya manpulong. Diad ministeryo, iingal-ingalan kami na totoo, idadalem da kamid pulis, tan tutupaken da kami ni ingen. Insebel met na gobierno iray literatura tayo kanian anggapoy nanaawat mi. Agaylay irap so mananap na lugar ya narentaan parad saray pantitipon tayo. Aminsan ingen, basta labat pinatunda na saray pulis so kombension tayo. Agkami apasal nen Heinz ed ontan ya panagtrato. Diad Uganda, makakkaaro iray totoo. Diad Bulgaria balet, kakkabusol da kami. Pero antoy akatulong pian agkami onkapuy?

Inyapit mi liknaan mi ed saray agagi. Malikeliket ira ta nalmo day katuaan, tan misatsalamat ira ta wadman kami ya ontutulong ed sikara. Inasikaso tan tinulongan mi sakey tan sakey. Naaralan mi ya say sakey ya sekreto pian mansiansia tayon maliket ed anggan anton asainmin et no manpokus tayo ed saray totoo, aliwan diad saray problema.

Kalabas na pigaran taon, anguman so situasyon ed Bulgaria. Nen 1998, nirehistro lamet so organisasyon tayo tan nipatalos ed lenguahen Bulgarian so dakel ya publikasyon tayo. Insan nen 2004, indedika so balon pasilidad na branch office tayo. Natan et 57 lay kongregasyon ed Bulgaria, tan 2,953 la so publisher. Nen imbeneg labat ya serbisyon taon, 6,475 so inmatendi ed Memoryal. Amay datin lit-limaran sister ed syudad na Sofia, natan et nagmaliw lan siameran kongregasyon! Talagan anengneng mi ya ‘amay daiset et nagmaliw ya sanlibo.’—Isa. 60:22.

ARUM NIN SUBOK ED BILAY KO

Diad inlabas na saray taon, wala ray linmelesan sakit ko. Anengneng na saray doktor ya walay pigaran tumor ed laman ko, say sakey et walad utek ko. Nampa-radiation therapy ak, tan linma kamid India ta ditan ak inoperaan. Ginawa na doktor so anggaay nayarian to pian naekal so baleg ya porsiento na tumor ed utek ko. Kanian inmabot ed 12 oras so operasyon. Kayarik ya inoperaan, nansiansia kami nid branch ed India ta ditan ak nampaabig, insan kami pinmawil ed Bulgaria.

Kayari to man, sinmublay ya nansakit si Heinz. Say sakit to et amay tatawagen ya Huntington’s disease. Natawir itan ya sakit tan mataltalag so walay ontan. Irap toy onakar, mansalita, tan agto nakontrol so galaw na laman to. Nen onloloor la may sakit to, akadepende lad siak. No maminsan, nakekesawan ak la ed pangaasikasok ed sikato, tan aburido ak ta ompan onsabi panaon ya agko la naasikaso. Pero maong labat ta walay kabataan ya brother ya lanang ton ipipilay Heinz ya manpulong, say ngaran to et Bobi. Aga ibabaing nen Bobi si Heinz anggano awel lay panagsalita to tan aga natalaranay galaw na lima tan sali to. No agko sarag ya asikasoen si Heinz, lanang ya wadtan si Bobi, talagan nailaloan! Tua, anggapoy anak mi nen asawak, pero singa mi la anak si Bobi. Nibaga mi ya regalo nen Jehova ed sikami si Bobi!—Mar. 10:​29, 30.

Wala met so kanser nen Heinz. Makapaermen ta nen 2015, nampainawa lay inar-arok ya asawa. Naiiliw kon maong! Apasal ak ya no aburido ak, sikato so manpakalma ed siak. Agak makapanisia ya agko la kaiba. Pero diad nonot ko, mabilabilay ni si Heinz! (Luc. 20:38) Malinlinew nid isip ko iramay bilin tan panamaseseg tod siak. Sankanonot ko iratan kada agew. Misatsalamat ak ta dakel ya taon ya akaibak si Heinz ya nanlingkor ed si Jehova.

MISATSALAMAT AK ED TULONG NEN JEHOVA

Anggano dakel so subok ed bilay ko, agak balot pinulyanan nen Jehova. Tinulongan to ak ya nalabanay inkamabaing ko, kanian akapanmisionero ak tan naar-arok iray totoo. (2 Tim. 1:7) Si agik ya si Elisabeth tan say asawa to et manlilingkor natan diad sakey ya sirkito ed Europe, tan ombibisita ira ed saray kongregasyon ya mansasalitay Serbian. Lapud tulong nen Jehova, akapansiansia kami may agik ed full-time. Sakey ’tan ed saray pisatsalamatan ko ed si Jehova! Naebatan may pikakasi nen Tatay mi!

Balbaleg so nitutulong na personal study pian ondeen so nonot ko. No walay problemak, naaralan koy ‘manpikasi ya masimsimoon,’ ya singa ginawa nen Jesus. (Luc. 22:44) Sankaliknak met so panangaro na saray kakongregasyon ko ed Nadezhda, Sofia. Ebat ira nen Jehova ed saray pikakasik! Malikeliket ak kada no itagar da ak ed gathering tan no ibabaga rad siak ya inar-aro da ak.

Lanang ko met ya dadalepdepen so ilalon kioli. Iimadyinen koy interon pamilya mi ya wala kami lad Paraiso. Saray atateng ko et walad arap na abung mi tan uga-ugaw so itsura da, ya singa nen balon kasal ira. Si ading ko balet et manpaparaan na naakan. Insan si Heinz, walad abay na kabayo to. Kada no isipen ko iratan, malikeliket ak, tan agko napokpokay misalamat ed si Jehova.

No pawilen ko ray agawad bilay ko tan no iimadyinen koy nagawad arapen, naliliknak imay imbaga nen David ya nabasad Salmo 27:​13, 14: “Kawalaan ko la kasi no agak anisia a nanengneng koy kamaongan nen Jehova diad dalin na saray mabilay? Manilalo kad si Jehova; manpakpel ka tan pabiskeg moy linawam. On, manilalo kad si Jehova.”