Dakel ni Naaralan Tayo ed Saray Manunan Bangat na Biblia

1. Antoy epekto ed sika nen naamtaan mo ray manunan bangat na Biblia?

NEN naamtaan tayo iray manunan bangat na Biblia, anguma-uman so bilay tayo. Singa bilang, nen naamtaan tayo ya say ngaran na Dios et Jehova, apakiwas tayon onapit ed sikato tan magmaliw ya kaaro to. (Isa. 42:8) Nen naamtaan tayoy tuan kipapasen na saray inaatey, agtayo la natatakot ed sikara ta naaralan tayo ya anggapo lay amta ra. (Ecl. 9:10) Tan nen naamtaan tayo ya gawaen manaya na Dios ya Paraiso so dalin, agtayo la mapaga ed arapen. Malikeliket tayo ta sarag tayo manayay manbilay na andi-anggaan, aliwa labat ya 70 o 80 ya taon.—Sal. 37:29; 90:10.

2. Kasin minabang tayo nin siansia ed saray manunan bangat na Biblia anggano abayag tayo lan Kristiano? Ipaliwawa. (2 Pedro 1:​12, 13)

² Tandaan tayo ya importantin maong iray manunan bangat na Biblia. Imanoen pay agawa ed saray Kristiano ya pinawitan nen apostol Pedro na komaduan sulat to. Diad saman et ‘akaletneg la ran malet ed katuaan.’ (Basaen so 2 Pedro 1:​12, 13.) Pero, sinulatan ira nen Pedro ta napepeligroy espiritualidad da. Wala ray palson managbangat tan mauges ya totoo ya akaloob ed kongregasyon. (2 Ped. 2:​1-3) Labay iran tulongan nen Pedro pian ag-ira naimpluensyaan, kanian wala ray impanonot tod sikara ya manunan bangat na Kasulatan. Anggano kabisado da la iratan, amta nen Pedro ya atan so makatulong ed sikara pian makapanmatoor ira ed si Jehova.

3. Akin et kaukolan ya tuloytuloy tayon dalepdepen iray manunan bangat na Biblia anggano abayag tayo lad katuaan? Mangiter na ilustrasyon.

³ Anggano abayag tayo lad katuaan, walan-walay balo ya naaralan tayo ed saray manunan bangat na Biblia. Imanoen iyan ilustrasyon: Isipen pa so sakey ya toon marundunong ya manluto, tan say sakey ya toon aaralen to ni labat so manluto. No lutoen da so sakey ya putahe, ompan pareho met ya rekado so usaren da. Pero no say sakey et talagan marundunong ya manluto, amta to lay gawa-gawaen to pian mas onnanam so luto to. Lapud dakel lay eksperiensya tod panagluto, ompan makaimbento ni ingen na balon putahe anggano parehon rekado so usaren to. Mipadpara, no abayag tayo lan manlilingkor ed si Jehova, mas amta tayo la no panon ya iyaplika iray manunan bangat na Biblia no ikompara ed saray Bible study ni labat. Akin ey? On ta dakdakel lay agawad bilay tayo manlapu la nen abautismoan tayo, tan nayarin nanduruma met lan pribilehyo so naawat tayo. Kanian anggano abayag tayo lan amta iray manunan bangat na Biblia, walan-walay nanonotan tayon paraan no panon tayon iyaplika itan, depende ed dadalanen tayon situasyon. Pantongtongan tayo sirin so taloran manunan bangat na Biblia, tan no anto ni ray naaralan tayod saratan anggano abayag tayo lad katuaan.

SI JEHOVA SO AMALSA

4. Antoy epekto ed sikatayo nen naamtaan tayo ya si Jehova so Amalsa?

⁴ “Say nanggawa na amin a bengatla et say Dios.” (Heb. 3:4) Amta tayo ya say planetan Dalin tan amin ya mabilay ya wadia et ginawa na marundunong tan makapanyarin Amalsa, si Jehova. Sikato so nanggawa ed sikatayo, kanian kabkabat to tayon maong. Inar-aro to tayo tan sankanonot toy pankaabigan tayo. Manlapu la nen naamtaan tayo ya si Jehova so Amalsa, awalaan na gagala tan direksion so bilay tayo.

5. Antoy naaralan tayo ed katuaan ya si Jehova so Amalsa? (Isaias 45:​9-12)

⁵ No dalepdepen tayo so simplin katuaan ya si Jehova so Amalsa, wala ni sakey ya epekto to ’tan ed sikatayo: napakiwas tayon manpaabeba. Singa bilang, nen wala ray negatibon inisip nen Job nipaakar ed si Jehova tan mas sankanonot to lay reputasyon to, impanonot nen Jehova ya Sikato so makapanyarin-amin ya Amalsa. (Job 38:​1-4) Atan so akatulong ed si Job pian natalosan to ya anggapoy kanepegan ton kuestionen si Jehova, ta lanang ya duga so gagawaen To. Atan met so punto ya labay ya papawayen nen propetan Isaias nen oniay insulat to: “Ibaga kasi na pitek ed samay Managdamili: ‘Antoy gagawaen mo?’”—Basaen so Isaias 45:​9-12.

6. Kapigan ya mas kaukolan tayon dalepdepen so karunongan tan pakapanyari nen Jehova bilang Amalsa? (Nengnengen met so litrato.)

⁶ No say sakey ya Kristiano et abaybayag lan manlilingkor ed si Jehova, ompan onsabid punto ya mantiwala lad sarili ton ideya imbes ya manpaigiya ed si Jehova tan ed saray prinsipyo na Biblia. (Job 37:​23, 24) Pero antoy makatulong pian ag-itan nagawad sikatayo anggano abayag tayo lad katuaan? Dalepdepen tayo ya agtayon balot naparaan so karunongan tan pakapanyari nen Jehova, say Amalsa. (Isa. 40:22; 55:​8, 9) No atan so sankanonot tayo, mansiansia tayon mapaabeba tan agtayo mandepende ed sarili tayon pakatalos.

7. Antoy ginawa nen Rahela nen nanairapan ya awaten so sakey ya pananguman ed organisasyon tayo?

⁷ Imanoen so eksperiensya nen Sister Rahela ya tagad Slovenia. Nen walay pananguman ed organisasyon tayo, akatulong kuno so impandalepdep to ed katuaan ya si Jehova so Amalsa pian mabulos ton awaten itan ya pananguman. Oniay imbaga to: “No maminsan, mairap kon awaten iray desisyon na saray mangidadaulo. Singa bilang, anggano abantayan ko la may 2023 Update na Mananguley ya Ulop #8, abigbigla ak nin siansia nen first time koy makanengneng na manpapaliwawan brother ya de-balbas. Kanian impikasik ed si Jehova ya tulongan to ak pian naawat ko iyan pananguman.” Atalosan lanlamang nen Rahela ya no si Jehova so nanggawa ed tawen tan dalin, sarasarag to met sirin ya igiya ed dugan direksion so organisasyon to. Kanian no nanairapan kan awaten iray pananguman ed pakatalos tayo o saray balon instruksion na organisasyon tayo, marakep no dalepdep mo so makapadinayew ya karunongan tan pakapanyari na Amalsa ed sika.—Roma 11:​33-36.

NO AKIN YA AABULOYAN NA DIOS SO PANIIRAP

8. Antoy epekto ed sika nen naamtaan mo no akin ya aabuloyan na Dios so paniirap?

⁸ Akin et aabuloyan na Dios so paniirap? Ag-amta na dakel ya totoo so ebat ed satan ya tepet kanian tetetelen da laingey Dios ed paniirap da. Tan iisipen ni ingen na arum ya anggapoy Dios! (Pro. 19:3) Pero maong labat ta nanaral kay Biblia. Naamtaan mo ya maniirap tayo lapud atawir tayon kasalanan, aliwan lapud si Jehova. Naamtaan mo met ya maan-anos ya Dios si Jehova, kanian aabuloyan to ni ya onlabas so panaon pian minilyon nin totoo so makapikabat ed sikato tan pian naaralan da ya ekalen to lanlamang so paniirap. (2 Ped. 3:​9, 15) Manlapu la nen naamtaan mo irayan katuaan, awalaan kay ilalo tan lalon inmapit so liknaan mod Dios.

9. Anto ray situasyon ya kaukolan tayo lamet ya isipen iray rason no akin ya aabuloyan nen Jehova so paniirap?

⁹ Legan tayon aalagaren so panaon ya ekalen la nen Jehova so paniirap, kaukolan tayoy mananos. Pero ompan nasubok so inkaanos tayo no sikatayo lan mismo so ondadalan ed mairap iran situasyon—singa bilang, no walay ambelbelat ya problema na pamilya tayo, inateyan tayo, odino biktima tayo na ag-inkahustisya. Diad ontan iran situasyon, ompan kuestionen tayoy Jehova no akin ya anggad natan et agni onkikiwas. (Hab. 1:​2, 3) No ontan so naliliknam, maabig no isipen mo lamet iray rason no akin ya aabuloyan nen Jehova ya manirap iray matunong.a (Sal. 34:19) Dalepdep mo met so sipan to ya agmanbayag et anggapo lan balot so manirap.

10. Panon ya asarag nen Anne so ermen to nen inatey so nanay to?

¹⁰ No lanang tayon isipen iray rason no akin ya aabuloyan nen Jehova so paniirap, makatulong itan pian naanosan tayo ray subok. Imanoen so eksperiensya nen Anne ya manaayam ed sakey ya isla ed Indian Ocean. Kuan to: “Nen inatey si nanay ko, maer-ermen ak ya maong. Anggano pigaran taon lay linmabas, ansakisakit nin siansia. Pero lanang kon papanonotan so sarilik ya aliwan si Jehova so sengegan na paniirap tayo. Diad tua, labalabay to lan ekalen so amin ya klase na paniirap, tan labalabay to met lan paolien iray inatey ya inad-aro tayo. Kada no dadalepdepen ko irayan katuaan, onkakalma so liknaan ko tan ondedeen so nonot ko.”

11. Akin et napakiwas tayon mamasyan manpulong no isipen tayo ray rason no akin ya aabuloyan nen Jehova so paniirap?

¹¹ No sankanonot tayo ray rason akin et aabuloyan nen Jehova so paniirap, napakiwas tayon mamasyan manpulong. Diad samay sulat nen Pedro, imbaga to ya maan-anos si Jehova ta labay To ya magbabawi iray totoo pian niliktar ira. Insan oniay inyarum to: “Nonot yo no anton klase na totoo so nepeg yon pagmaliwan, a nepeg kayon manbilay a masanto tan saray gawa yo et pakapatnagan na debosyon ed Dios.” (2 Ped. 3:11) Say sakey ed “saray gawa [a] pakapatnagan na debosyon ed Dios” et say panagpulong tayo. Singa si Aman Jehova, inar-aro tayo iray totoo, kanian labay tayo ya manbilay met ira diad balon mundo. Labalabay nen Jehova ya naikdan na tsansa ya mandayew ed sikato iray totoo ed lugar yo. Balbaleg ya pribilehyo so makapikimeyan ed Dios, tan pribilehyo tayo met ya pulongan tan iyaralan so dakel ya totoo anggad posible antis ya onsabi so anggaan!—1 Cor. 3:9.

MANBIBILAY TAYO LAD “KAUNORAN IRAN AGEW”

12. Antoy epekto ed sikatayo nen naamtaan tayo ya manbibilay tayo lad “kaunoran iran agew”?

¹² Malinlinew ya impropesiya na Biblia no antoy magmaliw ya ugali na saray totoo diad “kaunoran iran agew.” (2 Tim. 3:​1-5) No obserbaan tayoy ugali na totoo natan, nibaga tayo ya talagan tua so ibabaga na Biblia. Diad ilalabas na panaon, pauges lan pauges so ugali na totoo, kanian lalo tayon nakokombinse ya napantiwalaan so Salita na Dios.—2 Tim. 3:​13-15.

13. Antoy naaralan tayo ed samay ilustrasyon nen Jesus ya nabasad Lucas 12:​15-21, tan anto ray itepet tayod sarili tayo?

¹³ Say katuaan ya manbibilay tayo lad kaunoran iran agew so mamakiwas ed sikatayon samboten so nakekeran panaon antis na anggaan. Walay naaralan tayo nipaakar ed satan diad samay ilustrasyon nen Jesus ya nabasad Lucas 12:​15-21. (Basaen.) Akin kasi et atawag ya “makulangkulang” imay mayaman ya laki? Kasin lapud mayaman? Andi! Atawag ya “makulangkulang” ta aliway iyuuna tod bilay to. Nantipon na “kayamanan parad sarili to balet aliwan mayaman ed pakanengneng na Dios.” Dakel so plano to pian lalon onyaman, pero say agto amta, antiktikey la manayay pambilay to ta ompatey la diad saman ya labi. Antoy naaralan tayod saya ey? Antiktikey met lay nakekeran panaon antis na anggaan. Kanian tepetan moy sarilim: ‘Kasin nanengneng ed saray planok ed bilay ya labay kon usaren iyan nakekeran panaon parad si Jehova? Antoy ipapaseseg kod saray anak ko ya gawaen dad bilay da? Kasin uusaren koy biskeg, panaon, tan kuartak pian makatipon ak na kayamanan ed tawen, odino uusaren ko iratan pian mantipon na kayamanan parad sarilik?’

14. Base ed eksperiensya nen Sister Miki, akin et marakep no dalepdepen tayo ray ebidensya ya manbibilay tayo lad kaunoran iran agew?

¹⁴ No dalepdepen tayon maong iray ebidensya ya talagan manbibilay tayo lad kaunoran iran agew, baleg so epekto to ’tan ed saray desisyon tan plano tayod bilay. Ontan so agawa ed si Sister Miki. Oniay inistorya to: “Ka-graduate kod high school, planok so mangalay kurso ya zoology ta labalabay kon aralen iray ayayep. Pero diad saman, planok met lay man-regular payunir tan ontulong ed lugar ya baleg so pankaukolan. Binilin ak balet na saray maespiritual ya kakaarok ya pannonotan ko nin maong, ta ompan agko lanlamang nasarag ya pambansagen so panaral kod kolehyo tan say pangabet kod saray espiritual ya goal ko. Impanonot dad siak ya asingger lan naderal iyan sistema, pero diad balon mundo, anggapo lay anggaan na bilay kanian sarag kon aralen so amin ya klase na ayayep! Akatulong iraman ya imbaga ra diad impandesisyon ko. Say pinilik lan kurso et amay praktikal tan antikey labat. Lapud satan, akalmo ak na trabaho ya suportaan toy pampapayunir ko, ya anggad inmalis ak diad Ecuador, ta baleg so pankaukolan ditan.” Anggad natan et wala nid Ecuador si Sister Miki, tan manlilingkor ira nen asawa to diad kimey ed sirkito.

15. Akin et agtayo dapat sukoan iray ag-interesado ed maong a balita? Mangiter na alimbawa. (Nengnengen met so litrato.)

¹⁵ Agtayo komon susukoan iray totoon ag-interesado ed maong a balita ya ipupulong tayo. Agtayo amta ompan onsabi lanlamang so panaon ya manguman ira. Ontan so agawa ed si Santiago, ya agi nen Jesus ed ina. Saniba ran binmaleg nen kuya to, anengneng to ray ebidensya ya si Jesus so Mesias, tan arengel to so marundunong tan nikadkaduman panagbangat nen Jesus. Pero agan tampol kinmiwas si Santiago. Nagmaliw labat ya disipulo kayari na inkioli nen Jesus. Diad tua, nagmaliw ya masetseseg ya Kristiano!b (Juan 7:5; Gal. 2:9) Antoy naaralan tayod saya? Agmo susukoan iray kakanayon mo o saray napupulongan mod teritorya yo ya natan et agni interesado. Tandaan mo ya manbibilay tayo lad kaunoran iran agew, kanian sambot moy panaon ya pulongan ira legan ya wala ni nakekeran panaon. Malay mo, amay ibagam ed sikara natan et wala manayay epekto to lanlamang ed sikara diad arapen. Tan ompan atan so mamakiwas ed sikara ya mila ed sikatayo no ginmapo lay baleg a kairapan.c

MISALAMAT ED SARAY PANONOT NEN JEHOVA

16. Panon kan atulongan na saray panonot nen Jehova? (Nengnengen met so kahon ya “Usaren Iratan Pian Natulongan so Arum.”)

¹⁶ Wala ray publikasyon ya intarya na organisasyon tayo parad saray totoo ya daiset so amta rad Biblia. Singa bilang, wala ray artikulo tan video ed jw.org ya ginawa parad saray aliwan Tasi. Para met ed sikara so sinimban publikon paliwawa diad aral, tan saray pampublikon magasin tayo. Pero anggano abayag tayo lan Tasi, minabang tayo nin siansia ed saratan. Makatulong iray panonot ya wadtan pian lalo tayon naaroy Jehova, mas ombiskeg so tiwala tayod Biblia, tan magmaliw tayon mas epektibo ed ministeryo.—Sal. 19:7.

17. Anto ray situasyon ya kaukolan mon dalepdepen iray manunan bangat na Biblia?

¹⁷ No abayag tayo lan Tasi, eksayted tayo kada no walay balon pakatalos ya ipapaamtad sikatayo na organisasyon nen Jehova. Pero agtayo komon lilingwanan iray manunan bangat na Biblia ya tinmulong ed sikatayon onapit ed si Jehova. Singa bilang, no nalikas mo ya mantitiwala ka la ed sarilim ya ideya tan nanairapan kan manpasakop ed organisasyon nen Jehova, napakiwas kan manpaabeba no dalepdepen mo ya say mangigigiya ed sayan organisasyon et say makapanyarin-amin tan marundunong ya Amalsa. No walay dadalanen mo o say kapamilyam ya mair-irap ya situasyon, makapan-anos ka no dalepdepen mo no akin ya aabuloyan nen Jehova so paniirap. Tan no walay kaukolan mon desisyonan tan manplaplano ka parad arapen, tandaan mo ya manbibilay tayo lad kaunoran iran agew kanian antiktikey lay nakekeran panaon. Komon ta itultuloy mon dengelen iray panonot nen Jehova pian magmaliw kan marunong, ombiskeg so pananisiam, tan makapanmatoor ka ed sikato.