No Antoy Gawaen Mo Pian Manbilay Ka ed Balon Mundo

Naamtaan tayo ed saray akaunan artikulo ya panganggaen na Dios iray mauges ya totoo diad sayan mundo, pati saray amin ya problema ya resulta na saray gagawaen da. Akin et segurado tayon nagawa itan? Lapud oniay impromisa na Biblia, say Salita na Dios:

“Say mundo . . . et naandi.”—1 JUAN 2:17.

Segurado tayon wala ray makaligtas lapud oniay katuloyan na satan ya bersikulo:

“Samay manggagawa na linawa na Dios et mansiansia ya anggad angga.”

Kanian no labay tayoy naligtas, kaukolan tayon gawaey linawa na Dios. Pian naamtaan tayo no panon tayon gawaen so linawa na Dios, kaukolan tayon kabaten nin unona so Dios.

PIAN MAKALIGTAS KAD ANGGAAN KAUKOLAN YA “KABATEN” MOY DIOS

Collage: 1. Yinmurong lad flooring na ospital so sakey ya nurse lapud kesaw to. 2. Sikatoy nanmerienda ed canteen tan apansin ton malikeliket ya manbabasa na magasin so katrabaho to. 3. Ibabasa ed sikato na katrabaho to so sakey a teksto ed Biblia tan angiter met na jw.org contact card.

Imbaga nen Jesus: “Saya so mankabaliksay bilay ya andi-anggaan, a kabaten da ka, say saksakey a tuan Dios.” (Juan 17:3) Pian makaligtas tayo tan manbilay tayoy anggapoy anggaan, kaukolan tayon “kabaten” so Dios. Aliwa itan ya basta labat panisia ya walay Dios odino pangamta ed pigaran detalye nipaakar ed Sikato. Kaukolan ya mikaaro tayo ed Sikato. Di ba no labay mon mas nakaaro so sakey a too, ipanaon moy miulop tan miistoryaan ed sikato? Ontan met ed pikakaaro tayo ed Dios. Imanom irayay pigaran importantin katuaan ya naaralan tayod Biblia pian nakaaro tayo so Dios tan napansiansia tayo itan.

Saray Katuaan ya Naaralan Tayo ed Biblia

Naaralan tayo ya labay na Dios a manbilay tayo ed Paraiso.

Pinalsa na Dios so inmunan too, si Adan tan Eva, tan impanayam to ra ed balibalin hardin na Eden. Perpekto ira, tan inter na Dios so amin ya kaukolan da pian manbilay iran maliket. Sarag da met so manbilay ya anggapoy anggaan. Imbaga na Dios ya ag-ira ompatey basta pansiansiaen day pikakaaro da ed sikato. Balet pinili dan ag-unoren so simplin ganggan na Dios ed sikara.

Naaralan tayo no akin ya maniirap tayo.

Lapud ag-inunor nen Adan so Dios, abalang toy pankanawnawan manbilay ya anggapoy anggaan, tan adamay so amin ya totoo. Oniay ibabaga na Biblia: “No panon a diad panamegley na sakey a too et linmoob ed mundo so kasalanan, tan say patey ed panamegley na kasalanan, ontan met a say patey et kinmayat ed amin a totoo.” (Roma 5:12) No panon ya say sakey ya ugaw et natawir toy depekto na atateng to, amin ya ananak nen Adan et niyanak met ya aliwan perpekto ta atawir da itan ed sikato. Bilang resulta, ontatatken tan ompapatey tayo.

Naaralan tayo no antoy ginawa na Dios pian tulongan itayo.

Oniay ibabaga na Biblia: “Ontan lay panangaro na Dios ed mundo ya inter to so bogbogtong ya Anak to, pian kada sakey a mangipapanengneng na pananisia ed sikato et agnaderal noagta nawalaan na bilay ya andi-anggaan.” (Juan 3:16) Imbaki na Dios si Jesus diad dalin pian isakripisyo toy bilay to parad sikatayo. Nipaakar ed satan ya panangaro na Dios, oniay imbaga nen Prabhakar ya 86 so taon to ya taga India: “Talagan inar-aro ak ya maong nen Jehova.a Lapud panangaro to, awalaan ak na pag-asa ya manbilay ya anggapoy anggaan.”

Naaralan tayo no panon tayon ipanengneng ya aapresyaen tayoy ginawa na Dios parad sikatayo.

Ibabaga na Biblia ya nipanengneng tayon aapresyaen tayoy ginawa na Dios parad sikatayo “no uunoren tayo ray ganggan to.” (1 Juan 2:3) Maar-aron impaamta ed sikatayo nen Jehova a Dios no antoy gawaen tayo pian na-enjoy tayoy bilay tayo natan. (Isaias 48:17, 18, paimanod leksab) Aglabay na Dios ya manirap itayo. Impromisa to ya no unoren tayo ray ganggan to, agtayo labat na-enjoy so bilay natan noagta nawalaan tayo met na pankanawnawan manbilay ya anggapoy anggaan.

BASAEN YA INAGEW-AGEW SO SALITA NA DIOS, SAY BIBLIA

Tinmangay so nurse kayari ton nambasa na Biblia legay panangugto. — Makaligtas ka ed anggaan na mundo no ipikasim ya tulongan ka na Dios tan gawaen moy panlabayan to

Regular itayon mamangan pian tuloytuloy tayon manbilay. Balet imbaga nen Jesus: “Aliwan tinapay labat so pambilay na too, noagta say amin a salitan manlalapud sangi nen Jehova.”—Mateo 4:4.

Diad panaon tayo, nabasa tayo so salita nen Jehova diad Biblia. Legan mon aaralen iyan sagradon libro, naamtaan mo iray importantin katuaan nipaakar ed saray ginawa na Dios ed apalabas, saray gagawaen to natan, tan saray gawaen to diad arapen.

KEREWEN SO TULONG NA DIOS DIAD PIKAKASI

Antoy gawaen mo no labay mon unoren so Dios balet ta nanairapan kan mangitunda ed saray kagagawan agto labay? No ontan so situasyon mo, makatulong no kabaten mo nin maong so Dios.

Imanoen so eksperiensya nen Sakura ya imoral so kabibilay to. Nen ginmapon manaral na Biblia, naamtaan to imay ganggan na Dios ya “ibatikan yoy seksual ya imoralidad.” (1 Corinto 6:18) Nampikasi ed Dios si Sakura pian nawalaan na pakpel ya mangitunda ed mauges ya kagagawa to. Balet ngalngali agto nalabanan so pilalek to. “No onsasagi ed isip ko iray imoral a bengatla,” so kuan to, “manpipikasi ak ed si Jehova tan ibabagak ed sikato ya agko ya nasarag no bukor ko. Lapud pampipikasik, lalo ak ya inmapit ed si Jehova.” Singa si Sakura, minilyon so manpupursigi pian kabaten so tuan Dios. Iikdan to ray biskeg pian nauman day kabibilay da tan naunor day ganggan to.—Filipos 4:13.

No diman mas nakakabat moy Dios, mas nakakabat to ka met bilang pinabpabli ton kaaro. (Galacia 4:9; Salmo 25:14) Segurado ka met ya makaligtas ka tan manbilay kad balon mundo na Dios. Balet antoy itsura na balon mundo? Naamtaan itan diad onsublay ya artikulo.

a Jehova so ngaran na Dios ya nabasa ed Biblia.