Anamot Mo Iray Pankanawnawam ya Ipulong so Mensahe na Panarian!

1. Antoy naaralan tayod alimbawa nen David?

¹ Ag-inabuloyan nen Arin David iray kipapasen to ya mamatunda ed sikato. Singa bilang, labay toy mangipaalagey na abung parad si Jehova. Balet nen sikatoy agnaabuloyan, inuman toy plano to tan imparaan to ray bengatlan kaukolan nen Solomon diad pangipaalagey na templo. (1 Ara. 8:17-19; 1 Awa. 29:3-9) Imbes ya say nonoten nen David et say agto nagawaan, sikatoy nampokus ed nagawaan to. Panon tayon naalig so alimbawa nen David diad pananap tayoy paraan pian nipulong so mensahe na Panarian?

2. Antoy nepeg tayon usisaen ed sarili tayo?

² Gawam No Antoy Nagawaan Mo: Dakel so nampasimpli na bilay da pian makapan-auxiliary o regular payunir. (Mat. 6:22) Kasin nagawaan mo met itan? Legan mon uusisaen so kipapasen mo tekep na pikakasi, nayarin nanengneng moy akalukas ya “baleg a puerta a mangitonton ed kimey” parad sika. No ontan, anamot mo itan a pankanawnawa!​—1 Cor. 16:8, 9.

3. Anto ran pankanawnawa so nayari tayon anamoten pian makapanpulong anggano ag-iyabuloy na kipapasen tayo so pampayunir?

³ Balet, panon to no ag-iyabuloy na kipapasen mo so pampayunir? Agmo ibabaliwala iray arum a pankanawnawan parad sika. Singa bilang, no diad pantratrabahoan mo et wala ray nakakatongtong mon agmananisia, anamot moy matukoy a pankanawnawa pian makapantasi ed sikara. Odino no walay sakit mo, anamot mo iray pankanawnawa pian makapantasi ed saray mangaasikaso ed sika. Tandaan ya walay probisyon parad saramay limitado lay nagawaan da lapud itatatken odino graben sakit, ya sarag day makapanreport na anggan 15 minuto. No iter moy binulan a report mo, seguroen mon ipilay oras ya impanpulong mod impormal a paraan pati saray literaturan impalimam, kaiba la ray tract tan imbitasyon parad Memoryal tan kombension. Nayarin pankelawan mo no panon ya saraman ya angkekelag a pankanawnawa et maples ya manaaruman!

4. Antoy determinadom a gawaen?

⁴ Antokaman so kipapasen tayo, komon ta anamoten tayoy amin a pankanawnawa pian nipulong so maong a balita. Seguradon naeksperiensya tayoy inkapnek ta amta tayon gagawaen tayoy amin ya nayarian tayo parad Panarian.​—Mar. 14:8; Luc. 21:2-4.