Mamawala na Saray Pankanawnawan Manpulong
1 Say Kristianon kongregasyon so tugyopen na totoo a walaan na nanduruman sirkumstansya. Balet ta nankakasakey itayo ed determinasyon tayon idayew si Jehova. (Sal. 79:13) No nalilimitaan so pibibiang tayo ed panangiyabawag na maong a balita lapud maletey a bunigas odino arum niran mairap a sirkumstansya, panon itayon makapawala na saray pankanawnawan manpulong?
2 Diad Inagew-agew Iran Aktibidad: Inanamot nen Jesus so inagew-agew a pidedeneng to ed totoo pian mantasi. Sikatoy akitongtong ed si Mateo legan ya ondadalan ed opisina na panagbuis, ed si Zaqueo legan a manbabaroy, tan ed sakey a Samaritana legan a manpapainawa. (Mat. 9:9; Luc. 19:1-5; Juan 4:6-10) Diad inagew-agew ya aktibidad tayo, nayarian tayo met so mantasi ed siopaman a nakatongtong tayo. Say pangawit na Biblia, katekep na saray tract odino brosyur, so managyat ed sikatayon manparaan a mangitongtong nipaakar ed ilalo tayo.—1 Ped. 3:15.
3 Kasin nalilimitaan kayon mibiang ed kabkaabungan a kimey lapud agnayarian na laman yo? Magmaliw ya alerto ed saray pankanawnawan mantasi sano ombisita ed medikal iran personahe tan arum niran nakatongtong yo. (Gawa 28:30, 31) No lapud saray sirkumstansya yo et mabetbet ya agkayo makapaway ed abung, kasin sinali yo lay mantasi panamegley na telepono odino sulat? Sakey ya agin bii so regular a mansusulat ed aliwan Tasi iran kapamilyaan to. Ilalaktip toray makapaseseg a punto manlapud Biblia tan saray eksperiensya to ed panagtasi.
4 Diad Trabaho Odino Diad Eskuelaan: Say pilalek tayon idayew si Jehova so mamakiwas met ed sikatayon mamawala na saray pankanawnawan mangitanem na saray bini na katuaan diad trabaho odino diad eskuelaan. Sakey a waloy-taon a manangipalapag so anginabang diad klase to na abasa to ed Awake! nipaakar ed bulan. Sanen naamtaan na maestra to so angalaan to na impormasyon, sikato lay regular ya angawat na Say Panag-Bantayan tan Awake! Diad panagtrabahoan, say pangiyan tayo na libron Ibabangat na Biblia ed pasen a nanengneng na arum so nayarin managyat ed sikaran mantepet tan mangiter itan ed sikatayo na pankanawnawan mantasi.
5 Wala ta iray nanonotan yon paraan pian makapawala na saray pankanawnawan manpulong diad inagew-agew ya aktibidad yo? Diad panganamot ed saray sirkumstansya tayo, pambanikelan tayo kada agew so ‘pangisaklang ed Dios na bagat a panangidayew.’—Heb. 13:15.