Pangaligan Iran Presentasyon

Pangigapoy Panangiyaral na Biblia ed Unonan Sabado na Setyembre

“Dakel so totoon manisiad saray anghel. Sika ey? [Abuloyan ya onebat.] Saray anghel et espiritun pinalsa ya makapanyari, balet parad sika, kasin natulongan da tayo? Ibabaga na Biblia no panon dan tutulongan iray totoo natan.” Ipanengneng so beneg na Setyembre 1 ya Watchtower, tan pantongtongan so unonan tepet tan anggan sakey a teksto. Iyopresi iray magasin, tan iyeskedyul ya pantongtongan so onsublay ya tepet.

Say Panag-bantayan Setyembre-Oktubre

“Lapud Makapanyarin-amin so Dios, parad sika, nepeg kasin sikatoy tetelen ed amin ya nagagawan mauges ed mundo? [Abuloyan ya onebat. Insan basaen so Santiago 1:13.] Ipaliwawa na sayan magasin no akin ya wala ray nagagawan mauges tan no antoy gawaen na Dios pian panampoten so kaugsan tan paniirap.”

Onliing! Setyembre

“Iisipen na dakel ya alabas iran pantratrabahoen na amo ra tan singa agda la natakasay pananesdes. Ibabaga na saray eksperto ya say sobsobran trabaho et nayarin manresulta ed pakakesaw na laman tan emosyon, tan mapeligro itan. Parad sika, anto kasi ontulong pian napansiansian balanse so bilay? [Abuloyan ya onebat.] Niay sakey a makapainteres a bersikulo ed Biblia. [Basaen so Eclesiastes 4:6.] Ipapaliwawa na sayan magasin iray apatiran praktikal ya paraan pian nai-adjust tayo ray prayuridad tayo tan nasarag tayoy kesaw na laman tan emosyon diad trabaho.”