Paaligwasen Iray Abilidad Tayod Ministeryo​—Pamparaan na Introduksion

No Akin ya Importante: No aliwan makapainteres so introduksion tayo, ompan pultoten la na householder so tongtongan antis ti nin naibaga so mensahe tayo. Kanian parad dakel ya manangipalapag, say introduksion so sankaimportantian a parte na presentasyon da. Anggaman walay pangaligan iran presentasyon ed Ministeryo Tayo ed Panarian tan diad libron Reasoning, aliwan naynay ya walay kompleton introduksion ditan pian niyadaptam iratan ed katongtong mo. Tan anggan kompleto so pangaligan, nayarin umanen itan na saray manangipalapag odino mangiparaan iray sarili dan presentasyon. No iparaan tayon maong iray introduksion tayo, magmaliw tayon mas epektibo, imbes ya ibaga tayo no anto labat lay nanonotan tayo.​—Uli. 15:28.