Saray Balon Paraan na Panagpulong ed Publiko
1. Antoy ginawa na saray Kristiano nen inmunan siglo?
1 Saray Kristiano nen inmunan siglo et aglabat nampulong ed kabkaabungan noag pati diad publiko iran lugar. (Gawa 20:20) Singa bilang, linma rad templo ta amta ran dakel so totoo ditan. (Gawa 5:42) Sanen walad Atenas si apostol Pablo, inagew-agew ton pinulongan iray walad tindaan. (Gawa 17:17) Diad panaon tayo, say manunan paraan pian niyabawag so maong a balita et diad pankabkaabungan. Balet manpupulong tayo met ed saray paradaan, lugar na negosyo, tiangge, tan arum ni ran pasen ya matoo. Lapud papasesegen iray manangipalapag ya mibiang ed panagpulong ed publiko, pankanawnawa tayo natan so mibiang ed duaran balon eksayting ya paraan na panagpulong ed publiko.
2. Anto so inggapon balon paraan na panagpulong ed publiko nen Nobyembre 2011?
2 Espisyal ya Panagpulong ed Matoo Iran Syudad: Singa nanengneng ed pahina 16 tan 17 na 2013 Yearbook, inggapo ed New York City nen Nobyembre 2011 so balon paraan na panagpulong ed publiko. Diad saray matoon syudad et mataktikan impuesto iray lamisaan tan nandalig iran panagdispleyan ya akakarga so makalay imano iran poster tan literatura ed nanduruman lenguahe. Nilibon totoo so inagew-agew ya ondadalan ditan, pati saray manaayam ed apartment ya isesebel so pampulong tan saray agnababanaan ed abung. Tan marakep so resulta. Dia labat ed sakey bulan et 3,797 ya magasin tan 7,986 ya libro so nipalima. Dakel so nan-request na panangiyaral ed Biblia. Lapud say manunan gagala et say pangigapoy panangiyaral, saray address ya inter na interesado et tampol ya impawit ed akan-teritoryan kongregasyon pian nabisita ira.
3. Panon a pinalaknab iyan balon paraan na panagpulong ed publiko?
3 Lapud positibo so resulta, gawaen met la iya ed saray matoon syudad diad interon mundo. Mandesisyon so branch office no dinan iran syudad so kabiangan. Kaslakan lan sarayan syudad so kawalaan na dakel ya terminal na luluganan, opisina, odino ataragey ya apartment kanian matoo. Kayari na satan, mansulat so branch office ed saray apilin kongregasyon tan mangiter na kaaruman iran instruksion. Kaslakan lan saray regular tan espisyal payunir so iyasain, balet diad arum iran lugar et nayarin mibiang iray auxiliary payunir.
4. Panon ya gagawaen so espisyal ya panagpulong ed matoo iran syudad?
4 No Panon Iyan Gagawaen: Saray agagin payunir ya mibiang ed sayan espisyal ya panagpulong et kaslakan lan manalagar ed saray totoo ya onasingger ed lamisaan odino nandalig iran panagdispleyan. Insan da ra pampilien no dinan iran literatura so labay dan basaen. No walay mantepet, ebatan da itan manlapud Biblia. Tan no mangalay literatura, agsalambiten na saray payunir so nipaakar ed donasyon. Balet no tepeten to no panon ya susuportaan so kimey tayo, nayari dan ipaliwawa ya sarag ton lukasan so official website tayo ya jw.org tan basaen so artikulo nipaakar ed panagdonasyon. Nayari da met ya itepet: “Labay mon walay ombisita ed sika diad abung yo?” odino “Aliwa labat ya babasaen so iyoopresi mi, mangiyo-offer kami met na libren panagaral na Biblia.”
5. Akin et aliketan so sakey ya sanasawa diad impibiang dad sayan balon paraan na panagpulong?
5 Talagan makapalikliket so pibiang ed sayan balon paraan na panagpulong. Oniay insulat na sakey a sanasawa: “Legan min akaalagey diad abay na lamisaan tan nenengnengen so nilibon totoo ya ondadalan kada agew, amoria min malaklaknab so kimey ya gagawaen pian napulongan so totoo ed interon mundo. No nanenengneng mi dakel a totoo tan iisipen ya iyaansakit nen Jehova so balang sakey ed sikara, lalo kamin napapabiskeg ya itultuloy ya iyunad bilay mi so panagpulong. Naiimadyin min uusisaen nen Jehova so kapusoan na balang sakey ya ondadalan, tan nenengnengen to no siopa ray makana. Nalilikna min talagan iibaan kami na saray anghel ed sayan kimey.”
6. (a) Anto ni sakey ya paraan na panagpulong ed publiko ya inyuksoy na dakel a kongregasyon, tan antoy pidumaan na saya ed espisyal a panagpulong ed matoo iran syudad? (b) Panon ya makapikoopera iray kongregasyon sano mibibiang ed panagpulong ed publiko?
6 Panagpulong ed Publiko ya Inyuksoy na Kongregasyon: Likud nid espisyal ya panagpulong ed matoo iran syudad, wala ni sakey ya balon inyuksoy na dakel ya ulop na mamatatken diad teritorya ra. Saray manangipalapag et mangipuesto na lamisaan odino nandalig ya panagdispleyan diad matoo iran lugar ya sakop na teritoryay kongregasyon da. Duma iya ed espisyal ya panagpulong ed matoo iran syudad, ya saray payunir ed dakel a kongregasyon et manpulong ed parehon matoon syudad ya pinili na branch office.—Nengnengen so kahon ya “Kaukolan so Kooperasyon.”
7. No praktikal, panon ya iyuksoy na saray elder so pampulong ed publiko diad teritorya ra?
7 Aralen na saray elder no kasin walay teritorya na kongregasyon da ya matoo tan mandesisyon ira no praktikal so pangiyuksoy na pampulong ed publiko. Saray lugar a nayarin pangipuestoan na lamisaan odino nandalig ya panagdispleyan et diad saray terminal, plaza, parke, matoon karsada, mall, college campus, airport, tan arum ni ran lugar ya walay tinaon ya pantitipon. Walay bentaha no parehon lugar, agew, tan oras so pangipuestoan na lamisaan. Asali la na arum a mas epektibo so manpulong no akapuestoy lamisaan diad loob na mall imbes ya diad paway na sakey a baleg ya lakoan, ta kaslakan lan akapokus labat iray totoo ed labay dan saliwen ed satan ya lakoan. Mas matukoy ed arum a pasen a singa diad saray sidewalk so pangipuesto na melag ya nandalig a panagdispleyan na literatura. Wala ray imparaan ya file a nayarin i-download na saray elder diad Web site tayo pian makapangidispley na poster na Panag-bantayan, Onliing!, tan libron Ibabangat na Biblia. Sarayan file et espisipikon ginawa parad sayan paraan na panagpulong ed publiko. Saray mibiang ed sayan kimey et mangalig ed samay espisyal ya panagpulong ed matoo iran syudad tan nepeg dan tumboken so instruksion na manangasikasoy serbisyo. Saray address ya iter na interesadon agsakop na teritorya da et tampol dan isulat ed Please Follow Up (S-43) form tan iter ed sekretaryo na kongregasyon.
8. No anggapoy inyuksoy a panagpulong ed publiko diad kongregasyon yo, panon kayo nin siansian makapanpulong ed publiko?
8 Ipilad Personal a Ministeryom so Panagpulong ed Publiko: Nayarin diad arum a kongregasyon et anggapoy teritorya ran matoo kanian agmatukoy so pangipuesto na lamisaan odino nandalig ya panagdispleyan. Anggaman ontan, papasesegen nin siansia iray manangipalapag ya salien so pampulong ed publiko. Wala kasi grocery store odino melag a tindaan diad teritorya yo? Wala kasi parke odino lugar a pandudumogan na totoo? Kasin panapanaon et wala ray baleg ya pantitipon ed teritorya yo? No ontan, sarag yo nin siansia so makapanpulong ed publiko.
9. Akin a nepeg tayon pansagpotan a pulongan iray totoo inerman so kawalaan da?
9 Linawa nen Jehova ya “nilaban so amin a klase na totoo tan nawalaan ira na suston pikakabat ed katuaan.” (1 Tim. 2:4) Kanian, pansasagpotan tayon ipulong ed dakel a totoo so mensahe na Panarian antis ya onsabi so anggaan. (Mat. 24:14) Wala ray lugar ya agnababanaan iray totoo ed abung da. Balet, sarag tayo ran nakatongtong diad publiko iran pasen. Nayarin satan labat so paraan pian narengel day maong a balita. Kanian, komon ta sigpot tayon sumpalen so ministeryo tayo diad pampulong ed totoo inerman so kawalaan da.—2 Tim. 4:5.
[Kahon ed pahina 5]
Kaukolan so Kooperasyon
Wala ray naawat ya report a no maminsan, saray manangipalapag ed saray sanaabay a kongregasyon et manpupulong ed parehon karsada, paradaan, tan lugar na negosyo o terminal. Angitilak ira na saray magasin ed parehon lobby odino waiting area, tan nampulong ed parehon lugar na negosyo. Lapud satan, sinmawa iray totoon mantratrabaho odino manaayam ditan, anggano nanduruma ni oras na impanpulong da. Kanian no manpupulong tayod publiko, maabig no mansiansia tayo ed niasain a teritorya na kongregasyon tayo.
No labay na saray manangipalapag so manpulong ed publikon lugar ya teritorya na arum a kongregasyon, kaukolan day mitongtong ed manangasikasoy serbisyo ra. Insan sikatoy mankontak ed manangasikasoy serbisyo na kongregasyon ya akan-teritorya pian onkerew na permiso antis ya manpulong iray kakongregasyon to. No niasain ed sakey a lugar iray kongregasyon ya nandurumay lenguahe, nepeg ya mantotongtong iray manangasikasoy serbisyo pian agnairita iray totoo ed satan ya lugar. No walay kooperasyon, nagawa so amin a bengatla ed “masimpit tan diad mauksoy a paraan.”—1 Cor. 14:40.
[Litrato ed pahina 6]
[Litrato ed pahina 6]