Makapalikliket tan Balon Paraan na Public Witnessing
1. Antoy ipapaseseg ya gawaen na saray kongregasyon ya walay teritorya dan matoo?
1 Saray kongregasyon ya walay teritorya dan matoo et papasesegen ya mangorganisa na public witnessing, diad pangusar na lamisaan o mobile display. No mobile display so usaren, kaukolan ya walay anggan sakey a publisher ya onalagey o onyurong ed asingger na display. Balet no lamisaan so pan-displeyan, kaukolan ya duaran publisher so manbantay. Nepeg ya maimis, makaaro, tan mainomay ya asinggeran iramay niasain. No walay onasingger ed display, sarag na sakey so mitongtong, nayarin diad pangibagay, “Naisip mo ta lay ibabaga na Biblia tungkol ed satan a topic?” Nayarin wala ni sakey o duaran publisher ya man-informal witnessing ed pasen ya nabantayan day display.
2. Isalaysay so eksperiensyan mangipapanengneng ya importante so pan-public witnessing.
2 Sayan paraan na panagpulong et nanresultad dakel ya balon iyaaralan na Biblia. Walay sakey ya estudyante ed kolehyo ya pinili toy manggaway research paper tungkol ed Saray Tasi nen Jehova, balet ta anggapoy naalmo ton Kingdom Hall. Diad sinmublay ya simba, akanengneng na table display ed eskuelaan da. Nigapoy panangiyaral na Biblia tan natan et sikatoy abautismoan la tan kaiba met lad sayan paraan na panagpulong.
3. Antoy imbaga na arum nipaakar ed public witnessing?
3 Oniay komento na sakey ya sister ya agustoan to iyan paraan na public witnessing: “Wala ray ontutunda tan mangaalay balon magasin. Arum ed sikara et first time dan nakatongtong iray Tasi nen Jehova. Naimanok ya dakel so natutulongan ed sayan paraan na panagpulong.” Imbaga na sakey nin sister ya “makapalikliket iyan balon paraan na panagpulong ta saray totoo so onasingger ed sika tan, anggano ag-ira interesado, manuusisa ra.”
4. Akin et epektiboy pangipuesto na literature display diad parehon pasen, agew, tan oras kada simba?
4 Epektiboy pangipuesto na display diad parehon pasen, agew, tan oras kada simba. Diad ontan, napasal iray totoo ya makanengneng na display tan agmanbayag et agla ra nababaingan ya onasingger tan mantepet o mangalay literatura. Kasin wala lay onian paraan na public witnessing ed kongregasyon yo? No wala la, ompan sarag moy mibiang ed sayan makapaliket tan epektibon paraan pian ‘iyabawag so panarian na Dios ed amin a pasen.’—Luc. 9:60.