Iyopresi so Magasin ed Amin ya Interesado

¹ “Makapainteres, nipanpanaon, tan makapabiskeg na liknaan.” “Diad amin ya dyurnal ya abasak, saya so talagan makapaseseg.” Onia so komento na saray manbabasa na Say Panag-Bantayan tan Awake! diad interon mundo. On, saray magasin tayo et importantin tulong diad pangipapasabi tayoy maong a balita ed “amin a klase na totoo.” (1 Tim. 2:4) Balet ta unong ed rekord, daiset so niyoopresin magasin diad Pilipinas. Akin kasi? Tan antoy nagawaan tayo pian ondakel so niyopresi tayon magasin?

² Uksoyan ed Panagdonasyon: Posible kasin say arum et nababaingan ya mangala tan mangiyopresi na literatura o magasin ta say iisipen da et say iter dan kontribusyon? Ompan isipen dan kaukolan a mangiter iray espisipikon kontribusyon parad kada magasin o literaturan alaen da. Lapud ontay iisipen da tan limitadoy pakasarag da, daiset labat so alaen dan magasin odino ompan agla ra mangala. Duga kasi itan?

³ Nen Enero 2000, indirehi na Mananguley ya Ulop a diad Pilipinas tan ed amin a bansa, anggapo lay espisipikon kontribusyon ya kaukolan ya iter na saray manangipalapag tan interesado pian makaala iray magasin odino literatura. Walad balang sakey no pigay idonasyon to. Sano mangiyoopresi tayo na saray literatura diad ministeryo, aawaten tayoy boluntaryon donasyon na totoo pian nasuportaan so sankamundoan a kimey na panagpulong na maong a balita.

⁴ Kasin benendisyonan nen Jehova iyan uksoyan? Oniay insulat na sangan opisina ed Central African Republic: “Labay ya ibaga na saya ya anggan siopa, antokaman so kipapasen to’d pinansyal, et nayarin nawalaan na saray literatura tayo pian magmaliw a disipulo nen Kristo. Apresyaen a maong na saray manangipalapag tan arum ya totoo iyan uksoyan.” Onia met so imbaga na sangan opisina ed Indonesia: “Lapud saya, say talagan aanapen na agagi et saramay interesadon manbasa na saray publikasyon tayo, aliwan no siopa labat so makapangiter na espisipikon kontribusyon parad impangimprinta.” Oniay inreport na sangan opisina ed South Africa: “Masulok nen say doble so indakel na niyoopresin magasin, tan diad arum ingen ya lenguahe et masulok ya amipat a danay so indakel to! . . . Ipapanengneng na saya a dakel nin ‘bini’ na katuaan so nitatanem natan nen say kapiganman.​—Mat. 13:3-8.”

⁵ Kanian, kada manangipalapag et nepeg a mangala na literatura tan magasin a nakaukolan to parad panagkabkaabungan, panagpawil, tan panangiyaral na Biblia. Sano mandodonasyon itayo parad sankamundoan a kimey unong ed pakasarag tayo, agtayo babayaran imay literaturan inala tayo. Imbes, satan ya donasyon et parad amin ya aktibidades na organisasyon nen Jehova, kaiba lay panag-imprinta na literatura, panangipakurang na saray pasilidad ed Bethel, panangasikaso’d pankaukolan na saray misionero tan managbiahen manangasikaso, tan ed arum ni. Seguradon bebendisyonan nen Jehova iramay maliket a mangiiter unong ed pakasarag da.​—2 Cor. 8:1-4; 9:7.

⁶ Kaukolay Pakatebek Diad Panangiyopresi: Say prayuridad tayo et say pananap tan pambangat na maptek impanpuson totoo tan say itulong ed sikara pian makapambilay ira’d balon mundo. Pian nagawaan tayo iya, agtayo masuyat ya iyopresi iray magasin tan arum nin literatura tayo. Balet, naperdi labat iray magasin tayo no iter tayo iratan ed saramay agmangaapresya’d espiritual iran bengatla. Kanian agtayo bengatbengat ya iter iray literatura ed saramay agmangaapresya’d satan, saramay agda met lanlamang basaen, odino ed saramay mangilako’d satan.​—Isa. 26:10.

⁷ Magmaliw ya epektibo so pangiyopresi tayoy literatura no natebek tayo no talagan say too et interesado o andi. Panon tayon naamtaan no interesado imay too? Say sakey a pakapatnagan et no labay toy mitongtong ed sika. No madengel sano mansasalita ka, eebatan to ray tepet mo, tan mangibabagay opinyon to, labay ton ibaga, interesado ed pantotongtongan yo. No say pitotongtong to’d sika et marespeto tan makaaro, pakanengnengan iya a maabig so inkatoo to. Mapatnag met ya walay respeto to’d Salita na Dios no susubaybayan toy pambabasam ed Biblia. Maabig met so pantepet no labay ton basaen so iyoopresi tayon literatura. Ontan met, nayarin ibagam ya ompawil ka lamet pian ituloy so tongtongan yo. No inmabuloy, mapatnag ya talagan interesado. Saraya so obserbaan mo, ta pakapatnagan iraya ya basaen na too imay literaturan iyopresim.

⁸ Aruman so Niyoopresi Tayon Magasin: Nepeg ya panggunaetan tayon amin a manangipalapag ed Pilipinas ya aruman so niyoopresi tayon magasin. Antoray paraan pian nagawaan tayo iya?

● Nepeg a walay personal a kalat tayo no pigaray niyopresi tayon magasin diad kada bulan.

● Ipaamta ed Magazine Servant no pigaran magasin so regular ya order mo. Seguroen ya magenap so i-order mo parad panagkabkaabungan tan panagpawil.

● Mangiyeskedyul na sakey agew kada simba a makapibiang ka ed panagmagasin.

● Saniban iyopresi so Say Panag-Bantayan tan Awake!, anggano sakey labat ya magasin so ipabitar tayo’d presentasyon tayo.

● Anamoten so kada pankanawnawa. Iyopresi so magasin sano manpupulong ed kaabungan, karsada, lugar na negosyo, tan ed pampubliko iran lugar. Walara komoy awi-awit yon magasin sano manbiabiahe, mititindaan, mansho-shopping, tan sano oonla’d saray appointment. Iyopresi iratan ed kada pankanawnawa pian natulongan so totoon minabang ed Say Panag-Bantayan tan Awake!

● Iyopresi so wala ni’d sikayon daan la ran isyu. Anggano say isyu na saray magasin et linmabas lay sakey o duaran bulan, importante nin siansia so impormasyon ya karga to. Iyopresi iratan ed saray interesado.

⁹ Dakel so inter nen Jehova ya tulong pian nasumpal tayoy kimey ya panagpulong tan panaggaway babangatan. Kaiba’d saratan so Say Panag-Bantayan tan Awake! Sarayan magasin et makapangiliktar na bilay kanian agtayo masuyat ya inabang iratan ed saramay manaanap ed dalan ya ompugta’d bilay. Usaren tayo iratan pian tulongan so minilyon ya kabaten tan lingkoran si Jehova.

[Tepetepet Parad Panagaral]

1. Antoy naimano ed bilang na niyoopresin magasin diad Pilipinas tan akin ya kaukolan tayon paaligwasen itan?

2. Akin et ngalngali agmangala odino mangiyopresi na magasin so arum?

3. Anton pananguman so ginawa nen taon 2000 no nipaakar ed saray literatura tan magasin tayo?

4. Antoray bendisyon lapud balon uksoyan ed panagdonasyon?

5. (a) Pigaran magasin so nepeg ya alaen tayo? (b) Sioparay nepeg ya pangiyopresian tayo na saray magasin?

6. Akin a nakaukolan so pakatebek diad panangiyopresi?

7. Panon tayon natebek no talagan say too et interesado?

8. Antoray pigaran paraan pian naarumay niyoopresi tayon magasin?

9. Antoy personal ya determinasyon mo no nipaakar ed saray magasin tayo?