Apresyaen Iray Pasen a Pandadayewan Tayo

1-3. Antoy mamapakiwas ed saray mandadayew ed si Jehova a mangiter na kontribusyon parad pasen a pandadayewan da? Mangiter na saray alimbawa.

¹ Walay sakey a sister ya ngalngali 50 taon lan aktibo ed panaglingkor. Anggaman makapuy la lapud inkatatken, determinadon linma ed balon paalagey a Kingdom Hall. Sikatoy intabin na sakey a brother, tan kalkalnan dinmiretso diman ed contribution box. Impelag to so melag ya kantidad a tinipon to parad proyekto na panagpaalagey na Kingdom Hall. Labay toy makatulong, anggano agmakapibiang ed mismon panagpaalagey.

² Ipapanonot na saya imay “pobrin balo a bii” ya anengneng nen Jesus ya angipelag na duaran angkekelag a sinsilyo ed pananginan na donasyon diad templo. Imbaga ton “impelag toy amin a walad sikato, amin lan pambilay to.”​—Mar. 12:41-44.

³ Antoy amakiwas ed sarayan duaran bibii pian mangiter? Say panangapresya da ed inter nen Jehova ya pasen a panagdayewan. Melag labat so impelag da, balet parad Jehova et ipapanengneng na satan a talagan aapresyaen da so pasen a pandadayewan da ed sikato. Ontan so impanengneng met nen Arin David. Diad Salmo 26:8 et oniay imbaga to: “Jehova, inarok so . . . abung mo tan [say] pasen a panayaman na gloriam.” Impatnag to itan a panangaro to diad impangiter toy baleg a kontribusyon parad pampaalagey na templo.

4. Diad antoran paraan a nipanengneng tayoy apresasyon ed saray Kingdom Hall tayo?

⁴ Ipanengneng so Apresasyon Natan: Dakel so paraan pian nipanengneng tayo natan so apresasyon ed saray Kingdom Hall tayo. Nipanengneng tayo itan diad panangawes tayo sano mimiaral, diad mapagalang ya kondukta tayo legay aral, tan diad pitulongan tayo pian mansiansian malinis tan walad dugan kondisyon so Kingdom Hall tayo. Anggaman ontan, say panagdonasyon et talagan kabiangan met na tuan panagdayew tan pakapatnagan iya no kaunongan kaaralem so apresasyon tayo’d saray regalo nen Jehova. Saramay mangiiter ed onian paraan et makakaliknay tuan liket.​—1 Awa. 29:9.

5. Antoran uksoyan so ginawa na Mananguley ya Ulop pian makapanpaalagey na saray marakep a pasen parad pantitipon?

⁵ Lapud sayan Makasulatan a prinsipyo na boluntaryon panangiter, legay 1980’s et naabuloyan iray kongregasyon ed Pilipinas a man-loan ya anggapoy abang pian makapanpaalagey ira na saray Kingdom Hall. Nilasus a balon Kingdom Hall so nipaalagey lapud sayan uksoyan. Nen 1999, nanggaway balon uksoyan so Mananguley ya Ulop ya usaren so pundon nanlapud mayaman iran bansa pian naaruman so pundo parad pamaalagey na Kingdom Hall ed saray mairap a bansa. Nanlapu la nen 2001, say sanga ed Pilipinas et agunggonaan ed sayan uksoyan, tan lapud satan et 656 lan Kingdom Hall so nipaalagey, ya uusaren na 885 a kongregasyon. Labay min ipaamta’d sikayo no anto lay sankabaloan ya report ed sayan duaran uksoyan.

6. Antoy nepeg ya gawaen no say nipapawit na kongregasyon et kulang ed samay insipan dan bayaran parad Kingdom Hall loan da? Panon to no pigaran kongregasyon so manbabayar ed sakey a loan?

⁶ Saray Kongregasyon ya Wala ni Babayaran: Nen 1980’s tan 1990’s, masulok a 1,000 ya loan so inusar ed impamaalagey na Kingdom Hall. Karaklan ed sarayan loan et sigpot lan abayaran. Wala ni balet so 538 a loan ya impabayes ed 699 kongregasyon ya agni sigpot ya abayaran. Kada sakey ed sarayan kongregasyon et nanggawa na resolusyon, a ditan et insipan dan binulan iran mangipawit na espisipikon kantidad diad sangan opisina. Balet unong ed rekord mi, manga 40% labat ed saraya so binulan ya nipapawit. No oniay kipapasen ed kongregasyon yo, nepeg iyan ipaimano na saray elder ed saray manangipalapag, pian amta ray pankaukolan tan nawalaan iray “pribilehyon mangiter a mabunlok.” (2 Cor. 8:4) No pigaran kongregasyon so manbabayar ed sakey a loan, kaukolan a manmiting so amin ya elder na saratan a kongregasyon pian napantongtongan da no panon a naaruman so donasyon ya iiter na kada kongregasyon, diad ontan et nipawit ya intero imay insipan dan kantidad. Sarayan pundo et nausar lamet diad pangipaalagey na saray Kingdom Hall ed saray lugar a mankaukolan ni.

7, 8. (a) Panon ya impanengneng na saray kongregasyon so apresasyon da legay konstruksion na Kingdom Hall da? (b) Anton duaran paraan a nitultuloy dan nipanengneng so apresasyon da anggan sano asumpal lan nipaalagey so Kingdom Hall?

⁷ Saray Kongregasyon a Manguusar na Kingdom Hall a Kayarian na Sanga: Makapalikliket ta nilibon boluntaryo so manguusar ed panaon tan abilidad da diad panagpaalagey na Kingdom Hall, a maslak et diad nisulinek iran lugar. Legay konstruksion, ipapanengneng na saray agagi so apresasyon da diad pangipaparaan day tagano parad saray boluntaryo tan anggan sikaran mismo et mitutulongan met ed kimey. Makakabawas iya’d gastos na sangan opisina. Sano asumpal lan nipaalagey so Kingdom Hall, panon a nitultuloy na saray kongregasyon so pangipanengneng na apresasyon ed sayan alay-dakep ya regalo nen Jehova?

⁸ Nipanengneng da itan ed duaran paraan: Unona, diad regular a pandonasyon da parad panamantini ed Kingdom Hall, pian lawas marakep a nengnengen tan mamagalang ed si Jehova. Kaukolan a walay pundo ya nausar na operating committee, tan siempre, nepeg ya walay eskedyul parad panaglinis na Kingdom Hall. Komadua, mabulos iran manggawa na resolusyon a binulan iran mangipawit na espisipikon kantidad ed sangan opisina. Iner so laen na sayan kuarta? Onla iya’d Kingdom Hall Fund tan usaren lamet ed pamaalagey na arum nin Kingdom Hall. Talagan maaro iyan uksoyan! Saramay balo lay Kingdom Hall da et walaan na pankanawnawan ipanengneng so pisasalamat diad pitulongan da pian nipaalagey ni ray Kingdom Hall a para met ed arum.

9. Antoy imbaga nen Jesus a nepeg ya unoren na saray kongregasyon ya agda nipapawit ya intero so kantidad ya insipan da parad Kingdom Hall da? Akin et importantin unoren itan?

⁹ Base ed rekord mi, ipapawit na karaklan ed sarayan kongregasyon so kantidad ya insipan dan iter binulan. Balet diad aberids, 70% labat na kantidad ya insipan na 885 a kongregasyon so binulan a nipapawit ed sangan opisina. No regular dan nipawit ya intero imay kantidad ya insipan da, mas baleg so pundon nausar ed pamaalagey ed arum nin Kingdom Hall. Say kada kongregasyon so nandesisyon no pigaray iter da, kanian obligasyon dan unoren imay imbaga nen Jesus ya: “Komon ta say imbaga yon On et On.”​—Mat. 5:37.

10. Akin et nailaloan ya naaruman so kontribusyon na kongregasyon diad idarakel na manangipalapag ed kongregasyon?

¹⁰ Inreport na dakel a kongregasyon ya sanen asumpal a nipaalagey so Kingdom Hall da, dinmakel so mimiaral tan say bilang na manangipalapag. Lapud saya, seguradon sarag na arum a kongregasyon ya aruman so binulan ya ipapawit dan kantidad ed sangan opisina. No posible iya, nepeg ya mangipresenta na balon resolusyon ed kongregasyon pian makapandesisyon so balang manangipalapag ya aruman so binulan ya kontribusyon da.

11. Akin et nepeg a mitulongan so balang sakey diad panagdonasyon parad Kingdom Hall?

¹¹ Nepeg ya Mitulongan so Balang Sakey: Sanen indedika tayoy bilay tayo’d Jehova, insipan tayon amin a kayarian tayo et kayarian to la. Oniay imbaga nen Brother C. T. Russell: “Nepeg ya isipen na balang sakey ya say panaon to, pakayari to, kuarta to, tan arum ni, et inmatalek na Katawan ed sikato, tan kaukolan iratan ya usaren na balang sakey ed anggaay nayarian to, diad kigloriaan na Katawan.” Kasin mitutulongan itayo, mayaman man itayo o andi? Kasin nipapanengneng tayo’d paraan na panag-usar tayoy kuarta ya say panaglingkor ed si Jehova so sankaimportantian ed sikatayo?

12, 13. Anto so nepeg ya iyugali na kada indibidual tan pamilya? Antoy panmoria nen Jehova ed maliket a pangiiter tayo?

¹² Papasesegen mi so kada pamilya ya gawaen imay insulat nen Pablo diad 1 Corinto 16:2: “Diad kada unonan agew na simba et mangibiig komon so kada sakey ed sikayo diad abung ton dili na antokaman a natipon to.” Imanoen ya say panangiter et regular, nepeg ya iyugali. No regular a mangiiter na kontribusyon iray atateng, maabig iyan ehemplo ed ananak da. Tan agmet la kaukolan so lanang ya pangipanonot ta gawaen na balang sakey so “unong ed ginetma to ed puso to, ya aliwan ambelat ed liknaan to odino lapud napapasootan.”​—2 Cor. 9:7.

¹³ On, no kada indibidual, kada pamilya, tan kada kongregasyon et mangiter ‘unong ed ginetma ra ed puso ra,’ naliketan si Jehova, ta “aaroen na Dios so maliket a mangiiter.”