Asalim Ta Lan Inusar so Walad Beneg na Magasin?

Mabetbet a say unaan tayon nenengnengen ed magasin et say walad arap, insan tayo isublay a tampol imay walad beneg. Diad beneg na edisyon na Say Panag-Bantayan a parad publiko et nabasa tayo iray makapainteres a tepet tan say pahina a pakaromogay ebat.

Makaala tayoy ideya diad beneg na magasin no antoray marakep ya itepet pian nigapoy tongtongan. No mabetbet a nakikimeyan so teritorya tayo, sarag tayon uman-umanen so presentasyon tayo diad pangusar na nanduruman tepet. No busy so unabung, napatikey tayoy presentasyon tayo diad pangipanengneng na sakey ed saray tepet ed beneg na magasin tan ibagan, “No labay mon naamtaan so ebat na sayan tepet, itilak ko la’d sika irayan magasin tan nayarin pantongtongan ta iya no wala lay panaon mo.” Nayarin nigapo yo met so tongtongan no ipanengneng yo’d unabung imay beneg na magasin tan pampili yoy tepet a makapainteres ed sikato. Ipaimano yo imay pahina a pakabasaay ebat, insan basaen so teksto ya imparaan yo. Ompan wala ni ray nanonotan yon paraan pian nainteresan so unabung panamegley na beneg na Say Panag-Bantayan.