Tepet
◼ Akin et kaukolan so maong a pakatebek diad panangusar na telephone hookup parad saray pantitipon na kongregasyon?
Ginawan posible na arum a kongregasyon a saramay agmakaatendi ed saray pantitipon diad Kingdom Hall lapud sakit odino arum nin agnapaliisan a sirkumstansya et makarengel ed pantitipon diad abung da panamegley na telephone hookup. Pian naseguro a sayan maaron probisyon et usaren labat na saramay talagan agmakasarag, kaukolan so maong a pakatebek tan maalwar a pangorganisa. Kanian saramay elder a mangaasikaso ed sayan probisyon et nepeg dan seguroen ya organisado tan maabig so pakausar na saya, pian ‘nagawa so amin a bengatla diad masimpit tan mauksoy a paraan.’—1 Cor. 14:40.
Nepeg a seguroen na saray elder a say manunan minabang ed sayan probisyon et saramay manangipalapag a walaan na graben sakit, maletey, odino saramay talagan agmakaalis ed abung da. Nayari met a minabang ed sayan probisyon iramay manangipalapag a mansasakit, agmakayari, odino saramay iyaaralan na Biblia ya agmakaalis ed abung da, tan saraya et kaukolan a kabiangan ed bilang na saray inmatendi. No anggapo balet so magenap a linya na telepono pian makapinabang iray talagan mankaukolan, sarag ton usaren so arum a paraan a singa say pangirekord ed saray pantitipon.
Siempre, anggapoy makapipara ed gunggona a nagamoran diad iyatendi a mismo ed saray pantitipon tayo. Say pililimog tayo ed saray agagi et manreresulta ed ‘pampapasesegan’ tan natulongan iray balo ni a mangapresya ed kaimportantian na iyatendi. No presente itayo ed saray pantitipon, mas makaaral itayo ed saray demostrasyon, personal itayon natulongan na saray elder, tan nalikna tayon mismo so aroan na impanaagi. Talagan tua imay alikna na maedad lan agin bii, kayarin sikatoy nilakap na sakey ya agi legan ya ompapaway ed Kingdom Hall. Inkuan to: “Anggapo iya ed telephone hookup!”—Roma 1:11, 12.
Singa si Ana ya “agbalot onsasaew ed templo,” dakerakel ed saray maedad lan agagi tayo so regular ya onaatendi ed saray Kristianon pantitipon, basta iyabuloy na bunigas tan sirkumstansya ra. (Luc. 2:36, 37, NW) Anggaman uusaren da so telephone hookup, agda ipapasen iyan probisyon a kasandi na iyatendi ra ed saray pantitipon diad Kingdom Hall. Diad pangalig ed maabig ya alimbawa ra, komon ta itultuloy tayon panliketan so mansagpot pian naatendian iray pantitipon legan ya idadayew tayo so Makapanyarin-amin a Dios, si Jehova.—Sal. 95:1-3, 6; 122:1.