Eskedyul ed Pantitipon Parad Panagserbi

Simba na Hulyo 14

Kanta 126

10 min: Lokal iran pakabat. Idemostra no panon ya iyopresi so Hulyo-Setyembre a Panag-Bantayan tan Hulyo ya Awake! ya usaren iray suhestion a walad pahina 4 odino arum niran presentasyon a matukoy ed teritorya yo.

15 min: Kasin Walaan Ka na ‘Kawayangan a Mansalita’? Paliwawa a nibase ed Mayo 15, 2006, a Panag-Bantayan, pahina 13-16. Idanet so kaimportantian na makpel a panagpulong.

20 min: “Minabang ed Libron Say Sekreto na Liket ed Pamilya.”a Ipabitar iray nikadkaduman kabiangan na publikasyon. Repasoen so eskedyul parad panagaral na libro tan saray instruksion a naromog ed pahina 3 na sayan isyu na Ministeryo Tayo ed Panarian. Pasesegen so amin a magmaliw a regular ya onatendi tan sigpot a mibiang ed panagkomento. Interbioen a magano so sakey odino duaran manangipalapag a masakbay a manpaparaan parad saray pantitipon, tan tepetan ira no anto so amakiwas ed sikaran manggawa ed satan.

Kanta 147

Simba na Hulyo 21

Kanta 95

10 min: Lokal iran pakabat. Saray pinilin Pakabat manlapud Ministeryo Tayo ed Panarian. Panonotan iray dumerengel ya awiten da so Agosto 1 a Watchtower tan Agosto ya Awake! no ontumbok a Pantitipon Parad Panagserbi tan manparaan parad paningbat ed matukoy iran presentasyon a plano ran usaren.

15 min: Lokal iran pankaukolan.

20 min: “Panagparaan​—Makatulong Pian Epektiboy Panagpawil.”b Ilaktip so apatiran minuto a pitongtong ed dili na sakey a manangipalapag a manpaparaan ed panggawa na panagpawil. Repasoen to iray rekord to tan iplano ton bisitaen so duaran too ed sayan sampot-simba. Insan, nonoten to no antoy intongtong to nen imbeneg ed saratan a dua, tebeken to no antoy gagala to, tan manparaan no panon ton gawaen itan. Parad samay sakey, iparaan toy pangiyopresi na panangiyaral na Biblia. Tan diad samay sananey, iparaan ton bayuboan so interes diad pangusar ed sakey a suhestion ed parapo 5.

Kanta 189

Simba na Hulyo 28

Kanta 6

10 min: Lokal iran pakabat. Panonotan so amin ya iter da la iray report da parad Hulyo. Basaen so report na kuenta tan sulat nipaakar ed donasyon. Salambiten so literaturan opresi parad Agosto, tan mangipademostra na sakey a presentasyon.

15 min: Pamasiansia ed Liknaan ya Inkaganatan. Maligsan paliwawa a nibase ed Disyembre 15, 2006, a Panag-Bantayan, pahina 18-19, parapo 17-21.

20 min: Manparaan ed Pangiyopresi ed Peles Iran Magasin. Singbaten a mibiang iray dumerengel. Kayari antikey a panrepaso ed Agosto ya Awake! tan Agosto 1 a Watchtower, tepetan iray dumerengel no dinan iran artikulo so makapasagyat ed totoo ed lokal a teritorya tan akin. Kerewen ed saray dumerengel a mamitla na saray espisipikon punto ed artikulo ya iisipen dan iparungtal. Anto so nayarin itepet pian nigapoy tongtongan? Dinan a teksto ed artikulo so nayarin basaen? Ipademostra no panon ya iyopresi so kada magasin diad pangusar ed saray pangaligan a presentasyon manlapud Ministeryo Tayo ed Panarian odino sakey a presentasyon ya insuheri na agagi.

Kanta 106

Simba na Agosto 4

Kanta 222

10 min: Lokal iran pakabat.

15 min: Kasin Akaparaan Iray Ananak Yo Parad Nikaduman Teritorya? Paliwawa tan singbaten a mibiang iray dumerengel. Ibinsabinsa iray pigaran aarapen na saray Kristianon kalangweran diad eskuelaan. Ipaliwawa no panon a nausar na atateng tan ananak da so Watch Tower Publications Index pian anapen so makatulong ya impormasyon. Mangiter na pigaran alimbawa. (Nengnengen so manunan paulo ya “Schools,” segundaryon paulo ya “experiences.”) Tepetan iramay pinabaleg ed Kristiano iran sankaabungan no panon iran imparaan na atateng da ya onarap ed saray problema tan no panon dan inyaplika iray prinsipyo na Biblia diad eskuelaan. Nayari da met a salambiten iray ginawa ran report ed eskuelaan nipaakar ed saray tema a naromog ed Awake! Paipaliwawa ed sikara no panon a kinmanan proteksion so impanpulong da ed nikaduman teritorya ra.

20 min: “Babagbagen Tayo Iray Malet a Niletneg a Bengatla.”c Pakomentoan ed saray dumerengel no panon a saray angiyaral na Biblia ed sikara so maanos a tinmulong ed sikaran italirak so palso iran relihyoson sisisiaen.

Kanta 83

[Saray paimanod ed leksab]