Minabang ed Libron Say Sekreto na Liket ed Pamilya
1 Maliket kayon makaamta ya onggapo ed simba na Agosto 4, 2008, aralen tayo so libron Say Sekreto na Liket ed Pamilya diad Panagaral na Kongregasyon ed Libro. Anggapoy malabay a makasaew ed panagaral na grupo ed sayan praktikal a Makasulatan a giya parad maliket a bilay na pamilya. Say eskedyul ed panagaral so mangiter na malaem a panaon pian sigpot a nausisa so kada parapo tan teksto na Biblia a walad libro.
2 Say interon unonan kapitulo so singbaten ed unonan simba na panagaral, lapud pigpigara so ag-inaon a teksto ed satan. Ontan met, say kapitulo 15 tan 16 so singbaten ya interon kapitulo. Balet, arum lan kapitulo so pankaduaen, anggad kapalduan kapitulo so singbaten kada simba. Kanian, magenap so panaon pian nabasa tan nasingbat so amin a nisitas iran teksto tan maalwar a nausisa no iner onaplika so amin ya inaon iran teksto ed kada parapo.
3 Say importantin kabiangan na panagaral et say paningbat ed materyal ed kahon parad panagbangat diad sampot na kada kapitulo. Kanian, mangigana na magenap a panaon ed paningbat ed saray tepet tan ed nisitas iran teksto ed kahon.
4 Papasesegen iray manangasikaso na Panagaral na Kongregasyon ed Libro ya imanoen day panagparaan da parad panagaral tan pasesegen da so amin a kagrupo ra, pati saray balo ni, a manparaan a maong, onatendi a regular, tan mibiang.—od 69-72.