Kasin Manpaparaan so Pamilya Yo Parad Kiliktar?
1 Say nasusumpal a propesiya na Biblia so makakombinsin paneknek ed panasingger lan panampot na sayan mauges a mundo. Manbibilay itayo la ed mapeligron panaon a mipadpara ed panaon antis na Delap. (Mat. 24:37-39) Akaliktar si Noe ed inkaderal na saman a daan a mundo lapud sikatoy “akiulop-ulop ed Dios.” (Gen. 6:9) Seguradon imbangat nen Noe ed pamilya to iray paraan nen Jehova lapud sikaray akaliktar met. Panon tayon naalig si Noe tan manparaan bilang pamilya pian makaliktar ed anggaan na sayan peles a marelmeng a sistema na bengabengatla?
2 Managpulong na Inkatunong: Nanseet si Noe ed loob na 40 anggad 50 a taon bilang “managpulong na katunongan.” (2 Ped. 2:5) Saray kakaabay to, balang lan naimpluensiaan odino andi na saray rebelyoson anghel a nagmaliw a too, et seguradon amalaw ed panagpulong to. Diad panagpulong tayo et mabetbet a makakaabet tayo na andiay interes tan panagbalaw, a mamapaneknek a sayan sistema na bengabengatla et asingger lan manampot. (2 Ped. 3:3, 4) Balet, aliwan singa saramay totoo ed panaon nen Noe, dakel so onkikiwas ed saray sagpot tayo tan ‘unaagus’ ed panagdayew ed si Jehova. (Isa. 2:2) Niliktar tayo labat so ‘inkasikatayo tan saray ondengel met ed sikatayo’ no mantultuloy itayon manseet. (1 Tim. 4:16) Agaylan makana parad atateng ya ibangat ed ananak da so inkaganatan na panagpulong panamegley na salita tan ehemplo ra!—2 Tim. 4:2.
3 Ginawa To so “Ontan”: Say inkiliktar nen Noe tan say pamilya to so nandependi ed maalwar ya impanumbok da ed saray instruksion nen Jehova. (Gen. 6:22) Importante met parad sikatayo natan so pagmaliw ya “akaparaan ya ontulok” ed panangiwanwan na Biblia tan ed matoor ya aripen. (Sant. 3:17, NW) Inyaplika na sakey ya ama iray suhestion na organisasyon nen Jehova. Alimbawa, sikatoy sinimban angikondukta na pampamilyan panagaral tan kada sampot-simba et manpupulong ira unong ya irerekomenda. Kada simba et nanggunaetan toy makapiulop ed sakey ed saray anak to diad ministeryo. Lapud determinasyon ton manggawa na “ontan,” nipurek itan ed ananak to. Tan amin ya anemiran ananak to so binmaleg a matoor a lingkor nen Jehova.
4 Say anggaan na sayan sistema so biglan onsabi. (Luc. 12:40) Diad pangalig ed si Noe tan panisia ed kililiktar, sikatayo tan say pamilya tayo so seguradon akaparaan!—Heb. 11:7.