‘Tumboken so Bakat To’
1. Panon itayon magmaliw ya epektibon miministro?
1 Agnanaral si Jesus ed eskuelaan na saray rabbi, balet sikatoy sankatalonggaringan a Ministro ed awaran. Misalsalamat itayo ta say rekord na ministeryo nen Jesus so nipreserba parad pakagunggonaan tayo. Ta pian epektibo itayo ed ministeryo, nepeg tayon ‘tumboken so bakat to.’—1 Ped. 2:21.
2. Anto so ontulong ed sikatayon nabayuboan so singa Kriston panangaro ed totoo?
2 Ipanengneng so Aro ed Totoo: Si Jesus so pinakiwas na maaron panangiyansakit to ed totoo. (Mar. 6:30-34) Dakel ed teritorya tayo so “maniirap” tan kakkaukolan dan maong so katuaan. (Roma 8:22) No umamengen tayoy pakaskasin kipapasen da tan say maaron interes nen Jehova ed sikara, napakiwas itayon mantultuloy a manpulong. (2 Ped. 3:9) Sakey ni, mabulos a mangawat iray totoo ed mensahe tayo no natebek dan iyaansakit tayo ira.
3. Antoran pankanawnawa a nampulong si Jesus ed arum?
3 Manpulong ed Amin a Pankanawnawa: Inanamot nen Jesus so amin a pankanawnawa ya inabang ed arum so maong a balita. (Mat. 4:23; 9:9; Juan 4:7-10) Mipadpara ed satan, labay tayoy manparaan a mangitongtong ed katuaan legan tayon gagawaen iray inagew-agew a kimey tayo. Arum so mangaawit na Biblia tan literatura ta pian makapanpulong diad trabaho, eskuelaan, sano manbiabiahe tan mansasaliw, tan arum ni ra.
4. Panon tayon napagmaliw so Panarian a tema na ipupulong tayo?
4 Lawas Iyuna so Panarian: Say maong a balita na Panarian so tema na impulong nen Jesus. (Luc. 4:43) Anggaman agtayo tampol odino direktan tukoyen so Panarian ed presentasyon tayo, lawas tayon nononoten so panulong ed unabung pian natebek dan kaukolan da itan. Anggan sano sasalambiten tayo iray makapuy a kipapasen na mundo a pakapatnagan a manbibilay itayo la ed kaunoran iran agew, manunan ipupulong tayo ‘iray magayaga a balita na saray maong a bengatla.’—Roma 10:15.
5. Pian epektibo so ministeryo tayo, akin a nepeg tayon usaren so Biblia?
5 Usaren so Salitay Dios: Diad interon ministeryo nen Jesus et mabetbet ton inusar so Kasulatan a manuporta ed ibabangat to. Agto imbangat so dili ton opinyon. (Juan 7:16, 18) Inaral to so Salita na Dios tan inyaplika to itan bilang proteksion sumpad si Satanas. (Mat. 4:1-4) Ta pian epektibo tayon nibangat iray arum, nepeg tayon basaen so Biblia ya inagew-agew tan iyaplika so naaralan tayo. (Roma 2:21) No eebatan iray tepet sano manpupulong, nepeg tayon usaren so Kasulatan a panuporta ed ibabaga tayo tan basaen a mismo ed Biblia no posible. Labay tayon natebek na unabung ya agtayo ibabalikas so personal iran opinyon tayo noagta ibabase tayo iray ibabaga tayo ed kanonotan na Dios.
6. Anto so ginawa nen Jesus pian nasabi so kapusoan na saray dumerengel to?
6 Sabien so Puso diad Panagbangat Yo: “Anggapo ni too a nansalita na onia.” (Juan 7:46) Ontan so inkuan na saray opisyal nipaakar ed si Jesus sanen tinepet ed sikara na saray manunan saserdote tan Fariseo no akin a sikatoy agda inaresto. Imbes ya ibaga labat iray katuaan, say impanbangat nen Jesus so tinmanek ed kapusoan na saramay binangatan to. (Luc. 24:32) Sikatoy angusar na saray tuan agawa ya ilustrasyon pian natalosan da so mensahe to. (Mat. 13:34) Agbinuntonan nen Jesus iray dumerengel to na dakerakel ya impormasyon. (Juan 16:12) Impaimano toy Jehova imbes a say inkasikato. Singa si Jesus, nayari itayon magmaliw a maong a managbangat no ‘imatonan tayoy ibabangat tayo.’—1 Tim. 4:16.
7. Akin a nantultuloy si Jesus ed miniteryo?
7 Mantultuloy Anggaman Ag-isengan-sengan tan Susumpaen: Anggaman nanggawa si Jesus na makapanyari iran gawa, dakel so agdinmengel ed sikato. (Luc. 10:13) Anggan saray mismon kapamilyaan nen Jesus et impasen dan sikatoy “nanaambagel.” (Mar. 3:21, Maung a Balita) Anggaman ontan, nantultuloy si Jesus. Impansiansia toy inkapositibo to lapud sigpot a kombensido a walad sikatoy katuaan a makapangibulos ed totoo. (Juan 8:32) Diad tulong nen Jehova, determinado itayo met ya ag-ontunda.—2 Cor. 4:1.
8, 9. Panon tayon naalig so impansakripisyo nen Jesus nisengeg ed maong a balita?
8 Manggawa na Nakaukolan Iran Sakripisyo Pian Sigpot a Makapibiang: Insakripisyo nen Jesus so inkakomportabli nisengeg ed ministeryo. (Mat. 8:20) Sikatoy agkinmesaw a nampulong, a no maminsan et anggad ngarngarem la. (Mar. 6:35, 36) Amta nen Jesus a limitado so panaon to pian sumpalen so kimey. Lapud “say panaon apatikeyan la,” kaukolan tayo met ya isakripisyo so panaon, biskeg, tan saray kaykayarian tayo pian aligen si Jesus.—1 Cor. 7:29-31.
9 Saray Kristiano nen inmunan siglo so epektibon miministro lapud akaaral ira ed si Jesus. (Gawa 4:13) Sigpot tayo met a nagawaan so ministeryo tayo no aligen tayo so sankatalonggaringan a Ministro ed awaran.—2 Tim. 4:5.