“Agak Interesado”
1 Diad arum a lugar et ontan so kaslakan ya ibabaga na totoo ed mensahe tayo. Anto so makatulong ed sikatayo ta pian ag-itayo nadismaya sano walaray ag-interesado diad teritorya tayo? Panon tayon nasagyat so interes da ed maong a balita?
2 Mansiansian Maliket: Napansiansia tayo so liket tayo sano nonoten tayon naynay iray rason no akin a dakel so totoon ag-interesado. Saramay nibangat ed teorya na ebolusyon odino binmaleg ed sosyedad ya agmanisia ed Dios so nayarin agni akaamta ed kaimportantian na Biblia. Arum so nayarin adismaya la ed nanenengneng dan pansimpisimpitan ed relihyon. Anggapo met lay interes na arum lapud dismayado la ra tan anggapo lay ilalo ra. (Efe. 2:12) Arum so ‘agmangiimano’ lapud nabebelatan ira ed saray kapagaan ed bilay.—Mat. 24:37-39.
3 Anggaman ed negatibon reaksion na arum, napansiansia tayo so liket diad ministeryo lapud amta tayon saray sagpot tayo et mangiglogloria ed si Jehova. (1 Ped. 4:11) Niarum ni, napabiskeg so pananisia tayon mismo no ipupulong tayo so katuaan, anggan diad saramay agni mangaapresya ed saya. Panggunaetan tayon aligen so panmoria nen Jehova ed saray totoon walad teritorya tayo. Akasian to iramay taga-Ninive ya ‘agda amta so lima ran kawanan tan lima ran kawigi.’ (Jon. 4:11) Natan met et kakkaukolan a narengelan na saray totoo ed teritorya tayo so maong a balita! Ag-itayo sirin ontutunda noagta panggunaetan tayon anapen iray paraan pian nasagyat so interes da ed mensahe na Biblia.
4 Saglawien Iray Pampapagaan na Totoo ed Lugar Yo: Nayarian yon saglawien ed introduksion yo so sakey a problema ed lugar yo insan tepetan so unabung no antoy nibaga to ed satan. Dengelen so ibaga to, insan ipabasa ed sikato so makaligliwan mensahe na Biblia bilang ebat ed saray pampapagaan to. Kayari na sakey a trahedya diad lugar da, imbalikas na sakey a Tasi ed kada unabung so ermen to lapud agawa. “Insan,” inkuan to, “manbebesngaw laray totoo. Dakel so akatongtong ko ed saman ya agew lapud impatnag ko so personal ya interes ko ed sikara.”
5 Amin a problema ya aarapen na katooan et solbaren na Panarian na Dios. Panggunaetan sirin a tebeken no anton problema so pampapagaan a maong na unabung. Nayarin abuloyan to kayon mangipaliwawa ed makaligliwan mensahe na Biblia. Balet no agto labay, nayarin sikatoy mabulos ya ondengel diad “arum a pankanawnawa.”—Gawa 17:32, NW.